Read gitonga Mitengo 1 Bible Online

Mitengo 1 - gitonga bible

Mitengo 1

¹Khu litshigu nya guhegule, nya ngima nya wuvili, nya mwaga nya wuvili, nya guduge ga va na Israyeli khu tigoni ga Egipito, na vari giwulani ga Sinayi, Tshatshani nya Tshangano, PFHUMU Nungungulu a di ganela ga Mosi, khuye:

²“Girani gilovela gya vatshavbo va na Israyeli, gukhedza khu lihundzu lawe ni dzinyumba dza vababe vawe, mu saya vama vatshavbo moyo khu moyo, khu malina yawe.

³Va na Israyeli vatshavbo avo va ninganago gu gusoma matshari, va gu ni tanga nya magumavili myaga guya mbeli; uwe ni Aroni mu fanede gu va lovela, gukhedza khu mabutho yawe.

⁴Ga lihundzu ni lihundzu, gu na duga mwama moyo a gu muthangeli nya linyumba lawe a ta mi phasani.

⁵Malina ya vama va na mi phasago khaya: Ga lihundzu la Rubheni, khu Elizuri, mwamana wa Sedhewuri;

⁶ga lihundzu la Simiyoni, khu Selumiyeli, mwamana wa Surisadhayi;

⁷ga lihundzu la Judha, khu Nasoni, mwamana wa Aminadhabhi;

⁸ga lihundzu la Isakari, khu Nataniyeli, mwamana wa Suwari;

⁹ga lihundzu la Zabhuloni, khu Eliyabhi, mwamana wa Heloni;

¹⁰ga sanana sa Josefe: Khu ga Efrayimi, khu Elisamani, mwamana wa Amiyudhi; khu ga Manasi, khu Gamaliyeli, mwamana wa Pedhasuri;

¹¹ga lihundzu la Bhejami, khu Abhidhani, mwamana wa Gidheyoni;

¹²ga lihundzu la Dhani, khu Ayezeri, mwamana wa Amisadhayi;

¹³ga lihundzu la Aseri, khu Pegiyeli, mwamana wa Okarani;

¹⁴ga lihundzu la Gadhi, khu Eliyasafi, mwamana wa Dheweli;

¹⁵ga lihundzu la Nafitali, khu Ayirani, mwamana wa Enani.”

¹⁶Ava khavo va ranidwego tshanganoni, na vari manganagana nya mahundzu ya vababe vawe, avo na vari vathangeli nya mazanazana ya Israyeli.

¹⁷Khavbo avbo, Mosi ni Aroni va di dzega vama vava va nga bani va lovedwe khu malina.

¹⁸Khu litshigu nya guhegule nya ngima nya wuvili, va di tombanisa tshangano watshavbo, va ta lovedwa khu dzinyumba dzawe ni lihundzu lawe, mayelano khu dzinyumba dza vababe vawe. Va lovedwa khu malina yawe, gukhugela avo va enedzidego magumavili myaga guya mbeli, muthangeli ni muthangeli.

¹⁹Mosi a di va lovela giwulani ga Sinayi, kha nga idzo a nga leletedwago khidzo khu PFHUMU Nungungulu.

²⁰Ga Livelego la Rubheni, matiwula ya Jakobe, va di lovedwa mayelano khu mapango yawe, gumogo ni dzinyumba dza vababe vawe, muthu ni muthu a lovedwa khu lina laye, vama vatshavbo gukhugela magumavili myaga guya mbeli na va gu ningana gu soma matshari guya nyimbitunu.

²¹Avbo nya lihundzu la Rubheni, gu lovedwe tengo nya magumana na livbandre na limwedo magumi ni livbandre mazana (46.500) vama.

²²Ga livelego la Simiyoni, va lovedwe mayelano khu mapango yawe ni dzinyumba dza vababe wawe, muthu ni muthu a lovedwa khu lina laye, vama vatshavbo va enedzidego tanga nya magumavili myaga guya mbeli, na va gu kodza gu soma matshari guya nyimbitunu.

²³Avbo nya lihundzu la Simiyoni, gu lovedwe livbandre magumi ni livbandre na mana, ni mazana mararu (59.300) vama.

²⁴Ga livelego la Gadhi, va di lovedwa mayelano khu mapango yawe, ni dzinyumba dza vababe vawe, muthu ni muthu a lovedwa khu lina laye, vatshavbo vama va enedzidego magumavili myaga guya mbeli, na va gu kodza gu soma matshari vaya nyimbitunu.

²⁵Avbo nya lihundzu la Gadhi, gu lovedwe tengo nya magumana na livbandre magumi ni livbandre na limwedo mazana ni livbandre magumi (45.650) vama.

²⁶Ga livelego la Judha, va di lovedwa mayelano khu mapango yawe, ni dzinyumba dza vababe vawe, va lovedwa muthu ni muthu khu lina laye, vatshavbo vama va enedzidego magumavili myaga guya mbeli na va gu kodza gu soma matshari vaya nyimbitunu,

²⁷umo nya lihundzu la Judha gulovedwe livbandre na mavili magumi na mana, ni livbandre na limwedo mazana (74.600) vama.

²⁸Ga livelego la Isakari, va di lovedwa gukhedza khu mapango yawe ni dzinyumba dza vababe vawe, muthu ni muthu a di lovedwa khu lina laye, vatshavbo vama va enedzidego magumavili myaga guya mbeli, vatshavbo na va kodza gu soma matshari guya nyimbitunu.

²⁹Avbo nya lihundzu la Isakari, gulovedwe livbandre magumi na mana, ni mazana mana (54.400).

³⁰Ga Livelego la Zabhuloni, va di lovedwa gukhedza khu mapango yawe ni dzinyumba dza vababe vawe, muthu ni muthu a di lovedwa khu lina laye, vatshavbo va enedzidego magumavili myaga guya mbeli, na va gu kodza gu soma matshari vaya nyimbitunu.

³¹Ga lihundzu la Zabhuloni gu di lovedwa livbandre magumi ni livbandre na mavili, ni mazana mana (57.400).

³²Gasi ga lihundzu nya livelego la Josefe: Livelego la Efrayimi, va di lovedwa gukhedza khu mapango yawe ni dzinyumba dza vababe vawe, muthu ni muthu a di lovedwa khu lina laye, vatshavbo va enedzidego magumavili myaga guya mbeli, na va gu kodza gu soma matshari guya nyimbitunu.

³³Ga lihundzu la Efrayimi gu di lovedwa magumana magumi ni livbandre mazana (40.500).

³⁴Livelego la Manasi, li di lovedwa gukhedza khu mapango yawe ni dzinyumba dza vababe vawe, muthu ni muthu a di lovedwa khu lina laye, vatshavbo va enedzidego magumavili myaga guya mbeli, na va gu kodza gu soma matshari guya nyimbitunu.

³⁵Ga lihundzu la Manasi, gu di lovedwa magumararu na mavili magumi ni mazana mavili (32.200).

³⁶Ga livelego la Bhejami, va di lovedwa gukhedza khu mapango yawe ni dzinyumba dza vababe vawe, muthu ni muthu a di lovedwa khu lina laye, vatshavbo va enedzidego magumavili myaga guya mbeli, na va gu kodza gu soma matshari guya nyimbitunu.

³⁷Avbo nya lihundzu la Bhejami, gu di lovedwa magumararu na livbandre magumi ni mazana mana (35.400).

³⁸Ga livelego la Dhani va di lovedwa gukhedza khu mapango yawe ni dzinyumba dza vababe vawe, muthu ni muthu a di lovedwa khu lina laye, vatshavbo va enedzidego magumavili myaga guya mbeli, na va gu kodza gu soma matshari guya nyimbitunu.

³⁹Avbo nya lihundzu la Dhani, gu di lovedwa livbandre na limwedo magumi na mavili, ni livbandre na mavili mazana (62.700).

⁴⁰Ga livelego la Aseri va di lovedwa gukhedza khu mapango yawe ni dzinyumba dza vababe vawe, muthu ni muthu a di lovedwa khu lina laye, vatshavbo va enedzidego magumavili myaga guya mbeli, na va gu kodza gu soma matshari guya nyimbitunu.

⁴¹Avbo nya lihundzu la Aseri, gu di lovedwa magumana na limwedo magumi ni livbandre mazana (41.500).

⁴²Ga livelego la Nafitali, va di lovedwa gukhedza khu mapango yawe ni dzinyumba dza vababe vawe, muthu ni muthu a di lovedwa khu lina laye, vatshavbo va enedzidego magumavili myaga guya mbeli, na va gu kodza gu soma matshari guya nyimbitunu.

⁴³Avbo nya lihundzu la Nafitali, gu di lovedwa livbandre magumi na mararu, ni mazana mana (53.400).

⁴⁴Khigyo egi gilovela gi giridwego khu Mosi ni Aroni gumogo ni vathangeli va Israyeli avo nya likhumi na vavili vama, muthu ni muthu a diri muthangeli dzinyumbani ga vababe vawe.

⁴⁵Va di lovedwa gukhedza khu dzinyumba dza vababe vawe, vatshavbo va na Israyeli va enedzidego magumavili myaga guya mbeli, vatshavbo va kodzago gu soma matshari guya nyimbitunu.

⁴⁶ Vatshavbo va nga lovedwago va diri tengo nya livbandre na limwedo magumi ni magumararu na livbandre mazana ni livbandre magumi (603.550).

⁴⁷Aholu va na Levhi kha va vegwa tengoni gukhedza khu lihundzu la vababe vawe,

⁴⁸kholu PFHUMU Nungungulu, a di ganela ga Mosi, khuye:

⁴⁹U nga loveli lihundzu la na Levhi; tengo wawe u nga wu sayi vbakari ga va na Israyeli;

⁵⁰aholu uwe va rwege thumo nya gusayise Tshatsha nya Gidzumeledzwano ni sombo saye, ni satshavbo si lumbago umo. Avo va na rwala Tshatsha ni sombo saye satshavbo; va na thumela ndrani nya Tshatsha, va wu randrela khu vbavbandze.

⁵¹Avbo gu vbwetegago gu khuswa Tshatsha, va na Levhi khavo va na wu tshulago; wa gu vbweta gu tsitswa, khavo va na wu ghwimbago; uye a si lumbigo va na Levhi, a gu hidzimela vbafuvbi, a na songwa.

⁵²Sanana sa Israyeli, si na ghova khu mitsawa yawe mazumboni gwawe, muthu ni muthu vbafuvbi ni ngavbya yawe.

⁵³Aholu, va na Levhi, va na ghova khu vbavbandze nya Tshatsha nya Gidzumeledzwano va wu randrela, kha nga vawoneleli, gasi likhulo la Nungungulu li si wugeli va na Israyeli.”

⁵⁴Va na Israyeli va di gira satshavbo esi PFHUMU Nungungulu, a leletedego Mosi; va di gira kharato.