Read gitonga Mitengo 11 Bible Online

Mitengo 11 - gitonga bible

Mitengo 11

¹Va na Israyeli, va di phela gungurangura ga PFHUMU Nungungulu. Gikhati PFHUMU Nungungulu a nga si pwago, a di goroga ngudzu a khondrisa nilo nya guthise lizumboni, wu vbisa dzitshokhani nya lizumbo.

²Vathu va di lila ga Mosi, uye a di lombelela ga PFHUMU Nungungulu, wu tshimega nilo.

³Wulanga wule va di wu rana khavo Tabhera;[2] kholu khavbo vbale nilo wa PFHUMU Nungungulu wu nga khondra avbo gwawe.

⁴Vbakari ga va na Israyeli gu diri ni tsawa nya valuveli, va nga bani va gu dogorela navo guhodza nya gwadi ga Egipito. Va na Israyeli navo va di engedzela gulila va ganela, khavo: “Khu mani a na gu hi ningago nyama hi hodza?

⁵Ha gu alakanya dzindzandzi hi nga bani hi hodza mahala tigoni ga Egipito; marigiri ni madzwani ni dzisobola nya guhambanelane ni ayo.

⁶Olu hi vbede tshivba, kholu gimwalo hi gi wonago mbeli gwathu, vbavbandze ga manaha yaya basi.”

⁷Manaha yaya, ma gu fanana ni dzithanga nya tembura, livala lakone nya nga dzitshege.

⁸Va na Israyeli va di duga, va phalalega va ma rolela, vaya ma hindza magununi, va ma phula dzikhalini va gira dzifiyoso; gutshamba gwaye ma di fanana ni dzifiyoso nya gugadzingwe khu mafura.

⁹Manaha ma di thega ni vbakari nya wutshigu, gikhati gu thegago thondrwane lizumboni.

¹⁰Khu guralo, Mosi a dipwa gulila ga va na Israyeli, dzindrangani gwawe, muthu ni muthu nari vbamwanya nya tshatsha waye. PFHUMU Nungungulu a di goroga ngudzu, Mosi nuye a vbisega.

¹¹Mosi a di embela PFHUMU Nungungulu, khuye: “Khu ginani u giredego guvivba githumi gyago, khu ginani u si nyi pweligo wusiwana, olu u nyi lemedzago khu rwalo nya vathu vava?

¹²Ina eni nyi di khura mimba nya vathu vatshavbo vava, gani? Gasi kheni nyi nga va velega, gu kala U ganela gukhuwe nyi na va rwale magatani, gufanane ni melegi a velegago gyanana gya beleni, kala nyi va vbohisa ga litigo U sambanyidego gu ninga vababe vawe, gani?

¹³Nyi na yi mana hayi eni nyama nya guninge vathu vatshavbo vava? Kholu va ngu lila gwangu, va ganela, khavo: Hi ninge nyama hi hodze.

¹⁴Eni nyenga kha nyi dzi kodzi gu rwala rwalo nya vathu vatshavbo vava, kholu wu ngu lemela ngudzu.

¹⁵A gu bani nari kharato, nyi ngu gu lomba u nyi songe, gasi nya gu bani na nyi manide wuhigo mahoni gwago, nyi nga woni tshanisa yeyi.”

¹⁶PFHUMU Nungungulu a di embela Mosi, khuye: “Nyi hathele livbandre na mavili magumi vama, avo u vatigo vari madhota vbakari ga va na Israyeli, va kodzago gulamula mahungu, u va resa vbafuvbi ni Tshatsha nya Tshangano, u ya ema gumogo navo.

¹⁷Khavbo avbo, nyi na relela vbale nyi ta ganela nago, nyi na vbungula Liphuvbo li guromo gwago, nyi li thela gwawe, avo navo va na rwala gumogo nago, rwalo nya vathu, gasi u si lemedwi khuwo wenga.

¹⁸Embela vathu, khuwe: Dzi agiseni gasi mindru mu hodzani nyama; kholu mu lide ga PFHUMU Nungungulu na mu gu ganela, khenu: Khu mani a na gu hi ningago nyama hi hodza? Kholu hi di khadzisegide gwadi tigoni ga Egipito. Khu guralo, PFHUMU Nungungulu a na mi ningani nyama mu hodza.

¹⁹Kha mu na hodzani litshigu limwedo basi, matshigu mavili, livbandre matshigu, likhumi matshigu ambari magumavili matshigu;

²⁰aholu mu na yi hodza ngima rumba, kala mu kodwa khiyo yi duga khu dzithonvuni, kholu enu mu yeyiside PFHUMU Nungungulu, Uye a guromo vbakari gwanu, gambe mu lide mbeli gwaye na mu gukhenu: Khu ginani hi dugidego khu tigoni ga Egipito?”

²¹Mosi a di hakha, khuye: “Tengo nya vathu vava va guromo mbeli gwangu livbandre na limwedo magumi magumi mazana (600.000). Gasi Uwe U ngu ganela khuwe U na va ninga nyama va na hodzago ngima rumba.

²²Ina va na songedwa dzimombe ni dzinvuta nya gukala va enela vatshavbo, gani? Mwendro guta wungedzedwa dzindzandzi dzatshavbo dza phwani gu kala va enela, gani?”

²³Khu guralo, PFHUMU Nungungulu a di phindrula Mosi, khuye: “Ina tshivba ya PFHUMU Nungungulu yi di vbunguga, gani? Olu u na wona wabune gukhuwe esi nyi gu embelago si na girega mwendro kha si na girega.”

²⁴Khavbo avbo, Mosi a di duga aya va embeledzela magana ya PFHUMU Nungungulu, a di tombanisa livbandre na mavili magumi vama nya madhota, a va fodzisa khu bambe nya Tshatsha.

²⁵Khavbo avbo, PFHUMU Nungungulu a di tshiga vbalipfhitunu, a ta ganela ni Mosi; khu guralo a di vbungula Liphuvbo li nga bani liri avbo gwaye, a li thela ga vale nya livbandre na mavili magumi madhota; Gikhati Liphuvbo nya Guage li nga mbakago gwawe, avo va di profeta, aholu kha va nga engedza gambe gu profeta hwane nya litshigu lile.

²⁶Aholu lizumboni gu di tshade vama vavili; moyo wakone lina laye a diri uye Elidhadhi; mumbe lina laye a diri uye Medhadhi; Liphuvbo li di mbaka vbatshani gwawe kholu va di lovedwe navo, ambari va ngamba khuga va hongola Tshatshani, aholu avo va di profeta na vari lizumboni.

²⁷Khavbo avbo, lidzaha limwedo li di tutuma li ya tivisa Mosi, li mu embela, khilo: “Elidhadhi ni Medhadhi, va ngu profeta lizumboni.”

²⁸Aholu Josuwa, mwamana wa Nuni githumi gya Mosi, moyo nya madzaha yaye a nga ma hathago, a di hakha, khuye: “Mosi, mune wangu, va himbedzele.”

²⁹Khu guralo, Mosi a di hakha, khuye: “Gasi uwe wa gupwa wufu khu eni, gani? A diri tshukwana naripwani PFHUMU Nungungulu a ngu thela Liphuvbo ga vathu vatshavbo va profeta!”

³⁰Khu hwane, Mosi gumogo ni madhota ya na Israyeli va di bwelela lizumboni.

³¹Khavbo avbo, gu di furugedza phuvbo ya PFHUMU Nungungulu yi resa sikenya[3] na si gu duga khu phuvbo ga phwani, a si mbambamisela maphuvbo yatshavbo nya lizumbo gukhwatshi pfhuka nya guenele litshigu rumba; si dzundrulugela lizumbo latshavbo tanga nya mikono mivili gukhugela vbavbatshi nya mafu guya vbatshani.

³²Vathu vatshavbo, khu litshigu lile, ni wutshiguwule ni litshigu li landrelago, va di thuma gu rolela sikenya; wule a nga rolago sidugwana ni wule a nga rolago likhumi dzinyandra, va di si anegela bambe nya lizumbo.

³³Avbo nyama yi nga bani yi ngari magwahani gwawe na va nga gu tsagudza, PFHUMU Nungungulu a di tala khu likhulo a wugela va na Israyeli, a va sasela khu lufu nya guthise.

³⁴Khu guralo, wulanga wule va di wu riya lina la Kibheroti-Hatava, kholu vbale va di dzingwa vathu nya limidzo.

³⁵Khu Kibheroti-Hatava, va na Israyeli va di hongola Hazeroti vaya gira iyo lizumbo.