Read gitonga Mitengo 14 Bible Online

Mitengo 14 - gitonga bible

Mitengo 14

¹Tshangano watshavbo wu di khuga, wu womba huwa khu lito nya gukhugege, vathu va di lila ni wutshiguwule.

²Va na Israyeli vatshavbo gumogo ni tshangano watshavbo va di ngurangura va wugela Mosi ni Aroni, va ganela khu gyawe, khavo: “I tshukwana na hi fede tigoni ga Egipito mwendro giwulani momu!

³Khu ginani PFHUMU Nungungulu a hi residego tigoni momu gasi hi fela guta songwa khu matshari, vagadzi vathu ni sanana sathu va na modwa va tshaniswa; khandri di gwadi hi bwelela tigoni ga Egipito, gani?”

⁴Muthu ni muthu a di embela ndriyaye, khuye: “Hongoleni hi hathe muthangeli, hi bwelela tigoni ga Egipito!”

⁵Khavbo avbo, Mosi ni Aroni va di thega khu khovbe vbavbatshi mbeli nya tshangano watshavbo wa na Israyeli.

⁶Khu guralo, Josuwa, mwamana wa Nuni gumogo ni Kalebi, mwamana wa Jefoni, a gu vamowo nya vale va nga hongolago guya holelela litigo, va di pferula guambala gwawe,

⁷va gu ganela ga tshangano watshavbo wa na Israyeli, khavo: “Litigo hi nga li tsemakanya hi li holelela, litigo nya ladi ngudzu.

⁸Nari gukhwatshi gugola ga PFHUMU Nungungulu gu na ni ethu, a hi vbohisa ga litigo lolo, a hi ninga li khala lathu, litigo nya ladi li gogago mahwe ni wulombe!

⁹Mu nga wugelini PFHUMU Nungungulu, gambe mu nga thavi vathu va tigoni mule, kholu, avo va na khala guhodza gwanu. Va mwalo wuthavelo kholu PFHUMU Nungungulu a na ni ethu. Mu nga va thavi!”

¹⁰Tshangano watshavbo wu di alakanya gu mu pfara khu siwindri, aholu wudhumo wa PFHUMU Nungungulu wu di wonega vbatshani nya Tshatsha nya Tshangano ni ga vatshavbo va na Israyeli.

¹¹PFHUMU Nungungulu a di embela Mosi, khuye: “Kala lini vathu na va gu nyi yeyisa? Kala lini na va bomba gu nyi tumba? Ambari na nyi giride sisamadziso nya singi vbakari gwawe?

¹²Nyi na va vbedza khu tungu nyi va mbembisa, aholu uwe nyi na gu gira lihundzu nya likhongolo eli li gu na ni tshivba nya guvbindre avo.”

¹³Aholu, Mosi, a di phindrula PFHUMU Nungungulu, khuye: “Vagipiti khandri va dipwa basi, avo va pwide gupwani u duside vathu vava khu tshivba yago vbakari gwawe,

¹⁴Aholu va embede gambe vathu va tigoni momu. Avo va pwide gupwani Uwe PFHUMU Nungungulu u womo vbakari ga vathu vava, ni gu uwe u ngu va yeyedza khovbe yago, ni gupwani lipfhi lago la gu khala vbatshani gwawe, vbamihanitunu wa gu thanga mbeli gwawe khu lipfhi, vbawutshigutunu gambe u womo vbakari gwawe khu nilo.

¹⁵Wa gu songa vathu vava gukhwatshi wa gu songa muthu moyo, va nya mayigo vale va ngapwa ndruma yago khu gale va na ganela, khavo:

¹⁶“PFHUMU Nungungulu di sasede va na Israyeli mugiwulani, kholu a di tandrega gu va vbohisa ga litigo a tumbisidego gu va ninga.

¹⁷Khu guralo, olu, nyi ngu gu lomba Uwe PFHUMU Nungungulu, u nonedza tshivba yago nya yikhongolo ngudzu; kha nga idzo u leletedego khidzo, khuwe:

¹⁸Eni PFHUMU Nungungulu nyi ngu hwela gu goroga, Nyi na ni wuhindzi ni gu divalela; nyi tsetselelago milandru ni sighoho; gambe kha nyi digi gu tsayisa avo va ghohidego, nyi ngu tsayisa sanana khu sighoho sa vavelegi, kala gitugulwana nya wuraru nigyo nya wu na.

¹⁹“Khu guralo, tsetselela vathu vava, gukhedza khu wuwadi wago nya wukhongolo; kha nga gambe u tsetseledego vathu vava gukhugela tigoni ga Egipito kala avba.”

²⁰PFHUMU Nungungulu a di ganela, khuye: “Nyi na va tsetselela kha nga guganela gwago.

²¹Aholu, khu lisine, kha nga olu nyi vbanyago ni wudhumo wa PFHUMU Nungungulu wu na tadzago litigo, nyi ngu tiyisa gukheni

²²mwalo ni moyo ga vathu vatshavbo va wonidego wudhumo wangu, ni sisamadziso nyi giridego tigoni ga Egipito ni giwulani, aholu va nyi lingidego likhumi dzinyondro, va si yingisi lito langu;

²³mwalo ni moyo a na wonago litigo eli nyi sambanyidego gu ninga vababe vawe, mwalo na moyo nya ava va nga nyi yeyisago a na gu li wona.

²⁴ Aholu, githumi gyangu Kalebi, nyi na mu vbohisa ga litigo lolo a hongodego aya li sola, li na khala laye ni la livelego laye, kholu a nga tedwago khu liphuvbo nya guhambane ni vambe, ni olu a landrisago khu lisine ndzila yangu,

²⁵Vaamaleki ni Vakhanani va gu vbanyela kovani, mindru bwelelani, gimbilani mu thonona giwulani khu ndzila nya Yiphwa nya Gufuvile.”

²⁶PFHUMU Nungungulu a di embela Mosi ni Aroni, khuye:

²⁷“Kala lini na nyi gu timisela tshangano yoyu nya guvivbe na wu gu nyi wugela? Nyi pwide gungurangura ga va na Israyeli va nyi girelago litshigu ni litshigu.

²⁸U na va embela, khuwe: Kha nga olu nyi vbanyago, a ngu ganela PFHUMU Nungungulu, nyi na mu girela kha nga edzi mu ganedego dzindzeveni gwangu.

²⁹Sirumbi sanu si na thega giwulani momu ni mwatshavbo enu mu nga lovedwago, gukhugela enu mu nga enedzago magumavili myaga guya mbeli, enu mu nga nyi yeyisago.

³⁰Khu guralo, ni moyo nya enu mwalo a na belago ga litigo nyi sambanyidego gukheni nyi na mi vegani mu khala umo, vbavbandze basi ga Kalebi, mwamana wa Jefoni, ni Josuwa, mwamana wa Nuni,

³¹ni sanana esi mu nga khenu si na modwa khu valala vanu, avovo Eni nyi na va vbohisa gasi va kodza guti litigo enu mu li bombidego.

³²Aholu ga enu vambe, sirumbi sanu si na thegela giwulani momu.

³³ Sanana sanu si na legalega giwulani momu, gipimo nya magumana myaga, na va rwala nandru nya gumba tumbega gwanu, kala guvbela sirumbi sanu giwulani momu.

³⁴Kha nga olu mu vbedzidego magumana matshigu na mu gu holelela litigo, mu na rwala milandru yanu gipimo nya magumana myaga, kholu litshigu limwedo mwaga rumba; gasi mu fela gu dziti gukhenu Eni nyi Swihade.

³⁵Eni PFHUMU Nungungulu nyi ganede isoso; Nyi na gira kharalo ga tshangano yoyu nya guvivbedwe khu monyo, wu nyi wugedego; va na vbela giwulani momu, va fela umo.

³⁶Vama vava va nga rumedwago khu Mosi guya sola litigo, avbo va nga wuyago, va dita thela ghudzeghudze ga tshangano watshavbo va ganela guvivba khu litigo, va wugela Mosi.

³⁷Avo vama vale va nga ganelago guvivba khu litigo, va difa khu tungu mbeli ga PFHUMU Nungungulu.

³⁸Aholu Josuwa, mwamana wa Nuni, ni Kalebi, mwamana wa Jefoni, vamowo nya vale va nga bani va hongode guholelelatunu nya litigo, kha vafa gilo.

³⁹Mosi a di ganela magana yatshavbo yaya ga vatshavbo va na Israyeli, khavbo avbo, va di lila khu wuvi nya wukhongolo.

⁴⁰Va di phindrula ni mambagugya, va gwela tshokhatunu nya gigomo, vaya, khavo: “Khethu ava! Hi ghohide; gambe hi dzi emisede gu gwela wulanga PFHUMU Nungungulu a hi tumbisidego.”

⁴¹Aholu Mosi a di va embela, khuye: “Khu ginani mu hambanisago sileletelo sa PFHUMU Nungungulu? Enu gima kha mu na dugelela.”

⁴²Mu nga hongoli, kholu PFHUMU Nungungulu a na bani nari mwalo vbakari gwanu; mu ngayi mu ya dzi ningela ga valala vanu.

⁴³Kholu Vaamaleki ni Vakhanani, vomo vbale mbeli gwanu, mu naya sasedwa khu matshari, kholu mu nga hambana ni PFHUMU Nungungulu; PFHUMU Nungungulu kha na mi dwanela.

⁴⁴Aholu, avo va di dzi gurumedza va gwela tshokhatunu nya gigomo, ambarulo, Ngasa nya Gidzumeledzwano ya PFHUMU Nungungulu, gumogo ni Mosi, kha va nga khuga khu vbakari nya lizumbo.

⁴⁵Vaamaleki ni Vakhanani, va nga bani va gu khala gigomoni mule, va di relela vata va sasela, va gu va lundra kala tigoni ga Horima.