Read gitonga Mitengo 16 Bible Online

Mitengo 16 - gitonga bible

Mitengo 16

¹Tshigu mwedo, Kore, mwamana wa Isari, mwamana wa Khowati, mwamana wa Levhi, a di senga Dhatani ni Abhiramo, sanana sa Eliyabhi, ni Oni, mwamana wa Peleti nya lihundzu la Rubheni.

² Va di wugela Mosi na vari ni mazana mavili ni livbandre magumi vama nya sanana sa Israyeli, a gu vathangeli nya tshangano va hathidwego, vari vama va gu ni wuzundzo.

³Va di ya tombana ga Mosi ni Aroni, va va embela, khavo: “Hi garade khu enu! Tshangano watshavbo wu agide, muthu ni muthu nya avo va agide, PFHUMU Nungungulu womo vbakari gwawe. Khu ginani mu dzi khusedzago vbatshani nya tshangano wa PFHUMU Nungungulu?”

⁴Mosi na pwide isoso, a di thega khu khovbe vbavbatshi.

⁵A di ganela ga Kore gumogo ni tsawa waye, khuye: “Mindru, gu ngari dzimindru, PFHUMU Nungungulu a na va yeyedza avo va gu vaye, ni gu khu mani a agidego a na gu mu hidzimisa avbo gwaye; khu guralo, wule a na gu mu hathago a na mu vbohisa avbo gwaye.

⁶Khavbo avbo, girani, kharati: Uwe Kore gumogo ni tsawa wago dzegani sombo nya libani;

⁷mindru thelani nilo somboni mu thela libani umomo mbeli ga PFHUMU Nungungulu. Wule a na hathwago khu PFHUMU Nungungulu a na bani a agide; hi garade khenu va na Levhi!”

⁸Mosi a di embela gambe Kore, khuye: “Yingisani enu va na Levhi!

⁹Ina enu mwa gu wona nari gilo nya gidugwane olu Nungungulu wa Israyeli a mi hathidego vbakari nya tshangano wa na Israyeli, a mi hidzimisa vbafuvbi gwaye gasi mu ta thuma thumo wa Walangani nya Guage wa PFHUMU Nungungulu, ni gu ema mbeli nya tshangano kha nga vathangeli vaye, gani?

¹⁰A gu hidzimiside vbafuvbi gwaye, uwe gumogo ni vandriyago vatshavbo va na Levhi, mu nga gu vbweta gambe gu khala vaphasi nya mhamba, gani?

¹¹Khu guralo, uwe gumogo ni tsawa wago mwa gu wugela PFHUMU Nungungulu, gani? Gasi Aroni khwa mani nya gukala mu mu lembani?”

¹²Mosi a di rumela gu ya ranwa Dhatani ni Abhiramo, sanana sa Eliyabhi, aholu avo va di bomba, khavo: “Kha hiyi!

¹³Ina sidugwana olu, u hi dusidego khu ga litigo li gogago mahwe ni wulombe gasi hi tafa mugiwulani momu, gani? Olu u nga gu vbweta gambe gu hi khozisa, gani?

¹⁴Khwa hi dusa u hi yisa ga litigo li gogago mahwe ni wulombe ambari gu hi ninga thomba nya marembwe nya sivhina gasi si khale sathu; gasi olu wa gu vbweta gu thela kudzudzwane mahoni nya vathu vava, gani? Kha hi hongoli!”

¹⁵Mosi a di swireka ngudzu a embela PFHUMU Nungungulu, khuye: “U nga dzumeli gu hakha miningelo yawe! Eni gima kha nya va dzegela giburwana gyawe ambari gu gira guvivba ga moyo wawe.”

¹⁶Mosi a di embela gambe Kore, khuye: “Uwe ni vatshavbo nya tsawa wago, mindru indrani mu ya dzi wonegisa ga PFHUMU Nungungulu, uwe ni avo gumogo ni Aroni.

¹⁷Moyo ni moyo wa na gyanu a na dzege gyombo mu thela umo libani mu ya bikela mbeli ga PFHUMU Nungungulu. Muthu ni muthu a na dzege givbiselo gyaye nya libani, satshavbo si na enedza mazana mavili ni livbandre magumi (250) sivbiselo. Uwe ni Aroni khu wuvili wanu mu na dzega nenu sivbiselo sanu.”

¹⁸Muthu ni muthu a di dzega givbiselo gyaye, a thela magala a gi tadza khu libani, va ya si vega vbanyangwatunu Tshatsha nya Tshangano, gumogo ni Mosi ni Aroni.

¹⁹Khu guralo, Kore a di tshanganisa vbanyangwatunu nya Tshatsha nya Tshangano vathu vaye vatshavbo. Gungangamela gwa PFHUMU Nungungulu gu di wonega ga tshangano watshavbo.

²⁰Khavbo avbo, PFHUMU Nungungulu a di ganela ga Mosi ni Aroni, a va embela, khuye:

²¹“Ndreyani vbakari nya tshangano yoyo, kholu nya gu vbweta gu va mbembisa khu gikhati nya gidugwana.”

²²Aholu avo va di thega vbavbatshi khu khovbe va ganela, khavo: “Ama Nungungulu, Nungungulu nya maphuvbo ya vathu vatshavbo! Muthu moyo basi a ghohidego, ina U na gorogela tshangano watshavbo, gani?”

²³Khu guralo, PFHUMU Nungungulu a di ganela ga Mosi, khuye:

²⁴“Ganela ga tshangano, u va embela, khuwe: Khugani vbafuvbi ni avbo va vbanyago avbo Kore, Dhatani ni Abhiramo.”

²⁵Khavbo avbo, Mosi a di khuga a hongola ga Dhatani ni Abhiramo na gu landrwa khu madhota ya Israyeli.

²⁶A di embela tshangano, khuye: “Ndreyani mitshatshani nya vathu vava nya guvivbedwe khu myonyo, mu nga khumbi ni gimwegyo gi va lumbago, mu nga mbembiswa khu kotani nya sighoho sawe.”

²⁷Khavbo avbo, va di duga khu mitshatshani ga Kore, ga Dhatani ni ga Abhiramo khu maphuvbo yatshavbo; Dhatani ni Abhiramo va di duga navo va ta khala nyangwani nya mitshatsha yawe gumogo ni vagadzi vawe, sanana sawe niso sa beleni.

²⁸Khavbo avbo, Mosi a di ganela, khuye: “Olu khavbo mu na dzitigo gukhenu PFHUMU Nungungulu khuye a nyi rumidego guta gira satshavbo silo sesi. Kha si dugeli monyoni gwangu.

²⁹Vathu vava va guromo avba va gufa kha nga idzo vafago khidzo vathu vatshavbo, ni gu vathu vava vafa khu gu dugeledwa khesi si dugelelago vambe vathu, gu yeyedza gupwani khandri PFHUMU Nungungulu a nyi rumidego.

³⁰Aholu, PFHUMU Nungungulu a gu gira khu gisamadziso, mafu ma pandrega ma va midza gumogo ni satshavbo va gu naso, va relela na va nga gu vbanya tigoni nya vafi, khu guralo mu na dzitini nya gukhenu vathu vava va di vala PFHUMU Nungungulu.”

³¹Avbo a nga vbedza gu ganela magana yatshavbo yaya, mafu ma di pandrega khu vbavbatshi gwawe,

³²ma tula likana ma va midza ni mapango yawe, gumogo gambe ni vathu vatshavbo va nga bani va lumba Kore ni thomba yawe yatshavbo.

³³Avo gumogo ni satshavbo si nga bani si va lumba va di relela phalani nya vafi na va nga gu vbanya; va fenengedzwa khu mafu, va mbemba vbakari nya tshangano.

³⁴Vatshavbo va na Israyeli va nga bani va va randrede va di tutuma khu gupwa dzihuwa dzawe avbo mafu ma nga va midzago, khu gukhavo va nga midzwa navo khayo.

³⁵Khavbo avbo, gu dita khiyo ga PFHUMU Nungungulu, nilo wuta mbembisa avo nya mazana mavili ni livbandre magumi (250) va nga bani va vbiside libani.

³⁶PFHUMU Nungungulu a di embela Mosi, khuye:

³⁷“Embela Eleyazari, mwamana wa muphasi nya mhamba Aroni, a duse sivbiselo nya libani khu vbakari nya nilo a vbaladza hwindzo nilo, kholu sivbiselo si agide.

³⁸Khu sombo soso nya libani va ghohidego khiso va luza ni womi, girani khiso sivbambato nya guleme khiso giluvelo; kholu si ningedwe ga PFHUMU Nungungulu, iso niso si na agiswa, gasi si khala gialakanyiso ga va na Israyeli.”

³⁹Khu guralo, Eleyazari, muphasi nya mhamba, a di dzega sombo soso nya sugu si ningedwego khu avo va vbisidwego, si girwa gifenengedzo nya sugu gasi gu handzegwa vbagiluvelotunu;

⁴⁰si gira gialakanyiso ga va na Israyeli gasi gu si manegi ni moyo wa vbavbandze nya lihundzu la Aroni a hidzimelago aya ningela libani mbeli ga PFHUMU Nungungulu, gu nga girega kha nga esi si dugeledego Kore gumogo ni tsawa waye, gukhwatshi khu edzi PFHUMU Nungungulu a leletedego khu ga Mosi.

⁴¹Aholu, khu litshigu li landrelago, va di wugela gambe Mosi ni Aroni, khavo: “Enu mu songide vathu va PFHUMU Nungungulu.”

⁴²Avbo tshangano wu nga tombanago gasi gu wugela Mosi ni Aroni, va khedza Tshatsha nya Guage; va di wona lipfhi na li fenengedzide Tshatsha, gu wonega gungangamela ga PFHUMU Nungungulu.

⁴³Khavbo avbo, Mosi ni Aroni va di ya ema mbeli nya Tshatsha nya Tshangano.

⁴⁴PFHUMU Nungungulu a di ganela ga Mosi, khuye:

⁴⁵“Khugani khu vbakari nya tshangano yoyo, kholu nya gu vbweta gu va mbembisa kamwe olu.” Khavbo avbo va di thega va tsitsa khu dzikhovbe mafuni.

⁴⁶Mosi a di embela Aroni, khuye: Dzega givbiselo gyago nya libani u thela umo magala ya vbagiluvelotunu, u thela libani. Indra khu gu vbiredza vbakari nya tshangano u ya gira phaso nya ditshedzo, kholu PFHUMU Nungungulu gorogide ngudzu; wu ngu phela tungu.”

⁴⁷Aroni a di gira ugo a nga embedwa khu Mosi, a tutuma aya vbakari nya tshangano nya vathu; tsayiso wu di phede vbakari nya gwawe. Khavbovbo, a di thela libani givbiseloni a gu girela vathu phaso nya gutsetseledwe sighoho.

⁴⁸A di ema vbakari nya sirumbi ni va nya guvbanya; khu guralo, tungu wu di vbela.

⁴⁹Avo va nga fago khu tungu wule va diri likhumi na mana ni livbandre na mavili mazana (14.700), khavo va ngafago khu kotani ya Kore.

⁵⁰Aroni ni Mosi va di bwelela nyangwani nya Tshatsha nya Tshangano. Tungu wu di vbela.