Read gitonga Mitengo 21 Bible Online

Mitengo 21 - gitonga bible

Mitengo 21

¹ Mukhanani moyo a nga bani ari mufumeli wa Aradhi, a di gu vbanyela Negebhi, na dzitide gukhuye va na Israyeli va guta khu ndzila ya Atarimi; a di dwana navo, a gu mola vambe nya gukari vawe.

²Khavbo avbo, va na Israyeli va di gira gisambanyo ga PFHUMU Nungungulu, khavo: “Wa gu vega mandzani gwathu vathu vava, madhoropa yawe yatshavbo hi na ma khungumulela muphelo.”

³PFHUMU Nungungulu a dipwa lito la va na Israyeli, a va ninga mandzani gwawe Vakhanani; khavbo avbo, va di khungumulela madhoropa yawe yatshavbo. Wulanga wule wu di ranwa pwani Horima.

⁴Khu guralo, va di khuga khu gigomoni ga Hori, va bela khu ndzila nya Yiphwa nya Gufuvile gasi gu vambaladza litigo la Edhomi, aholu vathu va di garala khu ndzila.

⁵Vathu va di wugela Nungungulu gumogo ni Mosi, khavo: “U hi dusede ginani khu Egipito, gasi hi ta fela giwulani momu? Omu gu mwalo guhodza mwendro mati, olu hi garade khu guhodza gogu nyamba khurisa.”

⁶ Aholu, PFHUMU Nungungulu a di va rumela dzinyoga nya guthise nya wuhungu nya gusonge, dzi nga hodzago vathu, khu kharato gu difa va na Israyeli nya vangi.

⁷Khavbo avbo, avo va nga tshalago va di hongola ga Mosi va ya mu embela, khavo: “Hi ghohide khu guyeyisa PFHUMU Nungungulu ni uwe. Hi lombelele ga PFHUMU Nungungulu gasi a ndreyisela hwindzo ni ethu dzinyoga dzedzi.” Mosi a di lombelela khu vathu.

⁸PFHUMU Nungungulu a di embela Mosi, khuye: “Gira gifananiso nya nyoga nya wuhungu nya gusonge u yi vbayega vbasimbotunu. Muthu a gu hodzwa khu nyoga a khedzisa vbanyogatunu nya sugu, a na vbanya.”

⁹ Khu guralo, Mosi a di gira nyoga nya sugu a yi vbayega vbasimbotunu. Avbo muthu a hodzwago khu nyoga, a gu khedzisa nyoga nya sugu, a di vbanya.

¹⁰Khu guralo, va na Israyeli va di khuga va ya ghova tigoni ga Obhoti.

¹¹Va di khuga khu Obhoti va ya ghova Ye-Abharimi, giwulani gi manegago mbeli ga Mowabhi, khu Khugadambo.

¹²Va khuga khu vbale va ya ghova kovani wa Zeredhi.

¹³Va khuga gambe khu vbale va ya ghova khisikheyi nya tsongo wa Arinoni, wu dugago khu tigoni ga Amori li tsemakanya giwula; kholu tsongo wa Arinoni khuye vbingano wa Vaamori ni va na Mowabhi.

¹⁴Khigyo gi girago gu ganedwa umo nya Libhuku nya Dzinyimbi[11] dza PFHUMU Nungungulu gupwani: “Vhayebhi, tigoni ga Sufa, Arinoni, ni mikova nya sitsongwana saye

¹⁵wuyago kala mayigoni ga Ari ni dzibambe nya tsongo wu longoloka ni vbingano wa Mowabhi.”

¹⁶Khu vbale va di hongola Bheyeri,[12] owu khu nambo PFHUMU Nungungulu a nga embelago Mosi, khuye: “Tombanisa vathu Eni nyi na va ninga mati.”

¹⁷Khavbo avbo, Israyeli a di emba ndzimo yeyi, khuye: “Khugegani, enu mati nya nambo! Kulungelani!

¹⁸Nambo va nga polago vafumeli, ma nga kembago manganagana, khu dzindronga dzawe nya wufumu.” Va di khuga khu giwulani, va gu hongola kala Matana;

¹⁹khu Matana va diya Nahaliyeli, va khuga khu Nahaliyeli va hongola Bhamoti;

²⁰va khuga khu Bhamoti va bela kovani wu manegelago mahangeni ya Vamowabhi, tshokani ga Pisiga, khu phuvbo ga giwulatunu.

²¹Israyeli a di rumela myango ga Seyoni, mufumeli wa Vaamori a mu embela, khuye:

²²“Hi dzumedzise hi vbindra khu tigoni gwago; kha hi na ndreya hi bela khu marembweni gwago ni dzivhinyani gwago, ambari gu sela mati nya milambo. Hi na landra likondro kala hi vbindra tigoni gwago.”

²³Aholu mufumeli Seyoni kha va dzumedzisa gukhuye va tsemakanye litigo laye; Seyoni a di tombanisa vathu vaye a duga a khinga va na Israyeli, mugiwulani. A dita tigoni ga Jasa ata dwana ni va na Israyeli.

²⁴Israyeli a di sasela Seyoni ni vathu vaye vatshavbo khu matshari, a wandra litigo laye gukhugela Arinoni kala Jabhoki ni litigo la va na Amoni, kholu vbingano wa na Amoni wu di vhikedwa khu likhokhola.

²⁵Israyeli a di dzega madhoropa yale yatshavbo, a vbaha umo ga yatshavbo madhoropa ya Vaamori, Hesibhoni ni ga yatshavbo mitalala yaye.

²⁶Hesibhoni a diri lidhoropa nya tsindza nya mufumo wa Seyoni, mufumeli wa Vaamori. Seyoni, guhegula a di dwana ni mufumeli nya guphele wa Mowabhi a mu wandrela litigo laye latshavbo kala Arinoni.

²⁷Khidzo kharato vathokhozeli, va ganelago, khavo: “Deluni Hesibhoni! Gu na vbahedzwe ni gu thedwa likhokhola lidhoropa la Seyoni!

²⁸Khaguva nilo wu dugede Hesibhoni, ni luvbya khu lidhoropani ga Seyoni li di mbembisa Ari ni Mowabhi, ni vamune nya sigomwana sa Herimoni!

²⁹Libango avbo gwago Mowabhi! Mu vbede, enu vathu va nungungulu Kemosi! Giride madzaha yanu ma thava, ni dzimbiri dzanu dzi khala dzikhumbi ga Seyoni, mufumeli wa Vaamori

³⁰Ethu hi va hekhide khu sighalala; va pfhungumudwe gukhugela Hesibhoni kala Dhibhoni; hi sasede kala Nofa khu nilo kala Medhebha!

³¹Khu guralo, Israyeli a di vbaha tigoni ga Vaamori.

³²Mosi a di rumela gu ya khedzisela gwadi litigo la Jazeri; va di wandra madhoropa yawe, va tutumisa Vaamori va nga bani va gu vbanya umomo.

³³Khavbo avbo, va di thendregedza va gwela khu ndzila ya Bhasani. Ogi, mufumeli wa Bhasani gumogo ni vathu vaye vatshavbo va di duga va va khinga gasi gu ta dwana navo tigoni ga Edhereyi.

³⁴Khavbo avbo, PFHUMU Nungungulu a di embela Mosi, khuye: “U nga mu thavi, kholu nyi na mu ningela mandzani gwago uye gumogo ni vathu vaye vatshavbo va tigoni gwaye. U na mu gira kha nga idzo u giridego Seyoni, mufumeli wa Vaamori, uye a nga bani a vbahide tigoni ga Hesibhoni.”

³⁵Va di va pala, a mbembisa sanana sawe ni vathu vawe vatshavbo avbo gu ngamba tshala ni moyo nya guvbanye, khu kharato, va di wandra litigo lawe.