Read gitonga Mitengo 28 Bible Online

Mitengo 28 - gitonga bible

Mitengo 28

¹PFHUMU Nungungulu a di embela gambe, Mosi, khuye:

²“Ruma va na Israyeli, u va embela, khuwe: Mu na nyi girela miningelo nya guvbiswe khu gikhati gi vbwetegago, guhodza gwangu, nya mahema nya gunungele gwadi gwangu.

³U na va embela gambe, khuwe: Owu khu ningelo nya phaso nya guvbiswe gu vbwetegago mu girela PFHUMU Nungungulu: Khu litshigu ni litshigu mu na ningela sihambana sivili nyamba hasa nya mwaga moyo, wu na bani wuri phaso nya guvbiswe kala gupindruga.

⁴U na ningela gihambana gimwegyo dzimindrudzile, gimbe u na ningela gupfolani nya lidambo.

⁵U na ningela gambe gipandre nya likhumi nya efa[20] nya wuguvbi nya wadi, na wu sugidwe khu gipandre nya wu na nya deva nya mafura nya guhutwe gasi gu gira ningelo nya guhodze.

⁶Owu khu phaso nya guvbiswe nya litshigu ni litshigu, wu vegidwego kha nga nayo gigomoni ga Sinayi, gasi wu khale phaso nya gunungele gwadi wu vbisedwago PFHUMU Nungungulu.

⁷Ningelo wakone nya wadwa, wu na bani wuri wa gipandre nya wu na nya deva ga gihambana nya guhegule; vbinyu nya yadi yi fanede gu khala mhamba nya guvbaladzedwe PFHUMU Nungungulu Wulangani nya Guage.

⁸Gihambana nya wuvili guvbwetega mu gi ningela gupfolani nya lidambo, kha nga ningelo wa vbadzimindrutunu; mu na ningelani ningelo nya guhodze ni wadwa wakone, mu gira phaso nya gunungele gwadi ga PFHUMU Nungungulu.”

⁹“Khu litshigu nya Sabhadho mu na ningelani dzihambana dzimbili nyamba hasa, nya mwaga moyo, ni sipandre sivili nya likhumi nya wuguvbi nya wadi nya ningelo nya guhodze na wu sugidwe khu mafura ni ningelo nya vbinyu.

¹⁰Owu khu phaso nya guvbiswe nya Sabhadho ni Sabhadho, gudiga nya phaso nya guvbiswe nya litshigu ni litshigu gumogo ni ningelo waye nya vbinyu.”

¹¹“Khu litshigu nya guhegule nya ngima ni ngima, mu na ningela phaso nya guvbiswe ga PFHUMU Nungungulu, a gu owu: Dzimombe dzimbili, nvuta mweyo, livbandre na dzimbili dzihambana nyamba hasa, nya mwaga moyo,

¹²ni sipandre siraru nya likhumi nya wuguvbi nya wadi, na wu sugidwe khu mafura, khu mombe ni mombe; sipandre sivili nya likhumi nya wuguvbi nya wadi, na wu sugidwe khu mafura, khu nvutana ni nvutana;

¹³ni gipandre nya likhumi nya efa nya wuguvbi nya wadi, na wu sugidwe khu mafura khu gihambana ni gihambana: Owu phaso nya guvbiswe nya gunungele gwadi, a gu ningelo nya guvbiswe wu ningedwago PFHUMU Nungungulu.

¹⁴Ningelo wakone nya vbinyu wu na bani wuri wa gipandre nya deva khu mombe ni mombe, gipandre nya wuraru nya deva khu nvutana ni nvutana ni gipandre nya wu na nya deva khu gihambana ni gihambana. Owu khu phaso nya guvbiswe nya litshigu nya guhegule nya ngima ni ngima nya mwaga watshavbo.

¹⁵Gu na ningedwa gambe ga PFHUMU Nungungulu mabhongwe moyo gasi gu gira phaso nya guditshedzwe sighoho, gu diga phaso nya guvbiswe ni vbinyu yaye nya litshigu ni litshigu.”

¹⁶Khu litshigu nya likhumi na mana nya ngima nya guhegule, yi na bani yiri Phasika ya PFHUMU Nungungulu;

¹⁷khu litshigu nya likhumi na livbandre nya ngima yoyo, wu na manega buzo; mu na hodzani sibaba nyambana mela gipimo nya livbandre na mavili matshigu.

¹⁸Khu litshigu nya guhegule, gu na manega tshangano nya guage; mu nga girini ni wevbini thumo nya gulemele.

¹⁹Khu guralo, mu na ningelani dzimombe dzimbili, nvutana mweyo ni livbandre na dzimbili dzihambana nyamba hasa, nya mwaga moyo, gasi gu girwa phaso nya guvbiswe wu vbisedwa PFHUMU Nungungulu.

²⁰Miningelo nya guhodza, mu na ningela khu wuguvbi nya wadi nya gusugwe khu mafura; sipandre siraru nya likhumi khu mombe ni mombe, sipandre sivili nya likhumi khu hamba ni hamba.

²¹Avbo nya livbandre na dzimbili dzinvutana, mu na ningela gipandre gimwegyo nya likhumi,

²²ni nyamabhongwe gasi gu gira phaso nya guditshedzwe sighoho sanu.

²³Mu na ningela gumogo ni ningelo nya guvbiswe wa vbadzimindrutunu, a gu phaso nya gusimamise kala gupindruga.

²⁴Khu guralo, mu na ningela khu litshigu ni litshigu kala livbandre na mavili matshigu, gasi gu khala guhodza nya guvbiswe nya mahema nya gunungele nya gusalalegise PFHUMU Nungungulu; vbavbandze nya phaselo nya guvbiswe nya gusimamise kala gupindruga, mu na ningela gumogo ni wadwa.

²⁵ Khu litshigu nya livbandre na mavili, mu na gira tshangano nya guage, mu nga thumi thumo nya gulemele khu litshigu lolo.

²⁶Mu na gira gambe tshangano nya guage khu litshigu nya gulume dzimbewu, avbo mu ningelago dzimbewu nya guphele ga PFHUMU Nungungulu, mayelano ni Mibuzo yanu nya Dzisemana,[21] mu nga thumi thumo nya gulemele.

²⁷Khu guralo, mu na ningela ga PFHUMU Nungungulu phaso nya guvbiswe: Simombyana sivili, hamba ni livbandre na dzimbili dzinvutana nya mwaga moyo, gasi gu khala mahema nya gunungele nya gu Mu salalegise.

²⁸Ningelo wanu nya guhodze, wu na bani wuri wa wuguvbi nya wadi nya gusugwe khu mafura, sipandre siraru nya likhumi nya efa khu gimombyana, ni sipandre sivili nya likhumi nya efa, khu hamba ni hamba,

²⁹gipandre gimwegyo nya likhumi nya efa, khu ga hamba ni hamba nya edzi nya livbandre na dzimbili,

³⁰ni nyamabhongwe gasi gu dzi girela phaso nya guditshedzwe sighoho.

³¹Mu na ningela silo sesi gumogo ni ningelo nya phaso nya guvbiswe nya gusimamise kala gupindruga, ni ningelo nya guhodza gumogo ni wadwa wakone, satshavbo gu vbwetega na siri silo nya sadi nyamba solega.