Read gitonga Mitengo 29 Bible Online

Mitengo 29 - gitonga bible

Mitengo 29

¹“Khu litshigu nya guhegule nya ngima nya livbandre na wuvili, mu na gira tshangano nya guage; mu nga thumi thumo nya gulemele khu litshigu lolo, avbo gwanu li na bani liri litshigu nya guwombwe mipundru!

²Mu na paya mombe, hamba ni livbandre na dzimbili dzinvutana nyamba hasa, gasi gu gira phaso nya guvbiswe nya mahema nya gunungele nya gusalalegise PFHUMU Nungungulu.

³Ni ningelo nya wuguvbi nya wadi nya gusugwe khu mafura, sipandre siraru nya likhumi nya efa, khu mombe, ni sipandre sivili nya likhumi nya efa, khu hamba,

⁴ni gipandre gimwegyo nya likhumi nya efa, khu nvutana ni nvutana ga dzatshavbo nya livbandre na dzimbili.

⁵Mu na ningela ni nyamabhongwe gasi gugira phaso nya guditshedzwe sighoho sanu.

⁶Vbavbandze nya miphaselo yi girwago khu ngima ni ngima ni miningelo yaye nya guhodze ni wadwa, a na bani nari phaselo nya gusimamise kala gupindruga gukhedza khu sileletelo saye; wu na bani wuri phaso nya guvbisedwe PFHUMU Nungungulu, wu dusa mahema nya gunungele nya gu Mu salalegise.”

⁷Khu litshigu nya likhumi nya ngima yoyu nya livbandre na wuvili, mu na girani tshangano nya guage, mu dawulela sighoho, mu nga thumi thumo nya gulemele.

⁸Mu na ningelani phaso nya guvbiswe nya mahema nya gusalalegise PFHUMU Nungungulu, mombe, hamba ni livbandre na dzimbili dzinvutana nya mwaga moyo, nyamba hasa.

⁹Mu si ningela gumogo ni miningelo nya guhodzwe a gu esi: Sipandre siraru nya likhumi nya efa nya wuguvbi nya gusugwe khu mafura, khu mombe, ni sipandre sivili nya likhumi nya efa, khu hamba,

¹⁰ni gipandre nya likhumi nya efa, khu nvutana ni nvutana nya edzi nya livbandre na dzimbili.

¹¹Mu ningela ni nyamabhongwe gasi gu gira phaso nya guditshedzwe sighoho, vbavbandze nya phaso nya sighoho, ni ningelo nya guvbiswe nya gusimamise kala gupindruga ni phaselo waye nya guhodze ni mawadwa yaye.

¹² Khu litshigu nya likhumi na livbandre nya ngima nya livbandre na wuvili, mu na gira tshangano nya guage; mu nga thumi gilo khu litshigu lolo; aholu mu na vbedza livbandre na mavili matshigu mu na gu girela buzo PFHUMU Nungungulu.

¹³Avbo nya ningelo nya phaso nya guvbiswe nya mahema nya gusalalegise PFHUMU Nungungulu, mu na ningela likhumi na dzitharu dzimombe, dzihamba dzimbili ni likhumi na dzina dzinvutana nya mwaga moyo; dzatshavbo nyamba hasa.

¹⁴Khu gimombyana ni gimombyana nya esi nya likhumi na siraru mu na ningela phaselo nya guhodza nya wuguvbi nya wadi nya gusugwe khu mafura sipandre siraru nya likhumi nya efa, ni sipandre sivili nya likhumi nya efa khu hamba ni hamba,

¹⁵ni gipandre gimwegyo nya likhumi, khu nvutana ni nvutana nya edzi nya likhumi na dzina;

¹⁶mu ningela gambe ni nyamabhongwe gasi gu gira phaso nya guditshedzwe sighoho; esi sa gu yela gu girwa vbavbandze nya miphaselo nya guvbiswe nya gusimamise kala gupindruga, ni miningelo yaye nya dzimbewu ni wadwa.

¹⁷Khu litshigu nya wuvili gu yela gu ningedwa esi: Likhumi na dzimbili dzimombe, dzihamba dzimbili ni likhumi na dzina dzinvutana nya mwaga moyo, nyamba hasa,

¹⁸gumogo ni miningelo nya guhodza ni wadwa yi patwago ni dzimombe, dzihamba ni dzinvutana gukhedza khu tengo ni nayo wakone;

¹⁹Mu na ningela gambe ni nyamabhongwe nya phaso nya guditshedzwe sighoho, vbavbandze nya miphaselo nya guvbiswe nya gusimamise kala gupindruga ni miningelo yaye nya guhodza ni wadwa.

²⁰Khu litshigu nya wuraru mu na ningela likhumi na mweyo dzimombe, dzihamba dzimbili ni likhumi na dzina dzinvutana nya mwaga moyo, nyamba hasa;

²¹ni miningelo nya guhodza ni wadwa khu dzimombe, dzihamba ni dzinvutana, gukhedza khu tengo ni nayo wakone;

²²ni nyamabhongwe moyo nya phaso nya guditshedzwe sighoho, vbavbandze nya phaso nya guvbiswe nya gusimamise kala gupindruga ni miningelo yaye nya guhodza ni wadwa.

²³Khu litshigu nya wu na, mu na ningela likhumi dzimombe, dzihamba dzimbili ni likhumi na dzina dzinvutana nya mwaga moyo, nyamba hasa;

²⁴ni miningelo yaye nya guhodza ni wadwa, gukhedza khu tengo nya dzimombe, dzihamba ni dzinvutana khu tengo ni nayo wakone;

²⁵mu na ningela gambe ni nyamabhongwe gasi gu gira phaso nya guditshedzwe sighoho, vbavbandze nya phaselo nya guvbiswe nya gusimamise kala gupindruga, miningelo yaye nya guhodze ni wadwa.

²⁶Khu litshigu nya livbandre, mu na ningela, livbandre na dzina dzimombe, dzihamba dzimbili ni likhumi na dzina dzinvutana nya mwaga moyo, nyamba hasa,

²⁷gumogo ni miningelo yaye nya guhodza ni wadwa, gukhedza khu tengo nya dzimombe, dzihamba ni dzinvutana, khu tengo wawe ni nayo wakone;

²⁸ni nyamabhongwe moyo nya gugire phaso nya guditshedzwe sighoho, vbavbandze nya phaso nya guvbiswe nya gusimamise kala gupindruga, ni miningelo yaye nya guhodza ni wadwa.

²⁹Khu litshigu nya livbandre na limwedo, mu na ningela livbandre na mweyo dzimombe, dzihamba dzimbili ni likhumi na dzina dzinvutana nya mwaga moyo, nyamba hasa,

³⁰ni miningelo yaye nya guhodza ni wadwa, dzimombe, dzihamba ni dzinvutana, khu tengo ni nayo wakone;

³¹ni nyamabhongwe moyo nya gugire phaselo nya guditshedzwe sighoho, vbavbandze nya phaselo nya guvbiswe nya litshigu ni litshigu, ni miningelo yaye nya guhodze ni wadwa.

³²Khu litshigu nya livbandre na mavili, mu na ningela livbandre na dzimbili dzimombe, dzihamba dzimbili ni likhumi na dzina dzinvutana nya mwaga moyo, nyamba hasa,

³³ni miningelo yaye nya guhodza ni wadwa, dzimombe, dzihamba ni dzinvutana, gukhedza khu tengo ni nayo wakone;

³⁴ni nyamabhongwe moyo nya gugire khuwo phaso nya guditshedzwe sighoho, vbavbandze nya phaso nya guvbiswe nya gusimamise kala gupindruga, ni miningelo yaye nya guhodze ni wadwa.

³⁵Khu litshigu nya livbandre na mararu, mu na gira tshangano nya guage; mu nga thumi gilo khu litshigu lolo;

³⁶Mu na ningela gasi gu gira phaselo nya guvbiswe, gasi gu gira mahema nya gunungele nya gusalalegise PFHUMU Nungungulu, mu na ningela mombe mweyo, hamba mweyo ni livbandre na dzimbili dzinvutana nya mwaga moyo, nyamba hasa,

³⁷gumogo ni miningelo nya guhodza ni wadwa, mombe, hamba ni dzinvutana, gukhedza khu tengo ni nayo wakone,

³⁸ ni nyamabhongwe moyo nya phaso nya guditshedzwe sighoho, vbavbandze nya phaso nya guvbiswe nya gusimamise kala gupindruga, ni miningelo yaye nya guhodza ni wadwa.

³⁹Silo sesi khiso mu na si ningelago ga PFHUMU Nungungulu, ga matshigu nya mibuzo mu ma vegisedego, vbavbandze nya sisambanyo sanu ni miningelo yanu nya guningele khu gugola gwanu, nya guvbiswe, nya guhodza, nya wadwa niyo nya gurule.

⁴⁰Mosi a di embela va na Israyeli, kha nga idzo a rumidwego khidzo khu PFHUMU Nungungulu.