Read gitonga Mitengo 31 Bible Online

Mitengo 31 - gitonga bible

Mitengo 31

¹PFHUMU Nungungulu a di embela Mosi, khuye:

²“Phodzela va na Israyeli ga Vamedhiyani, hwane nya isoso u naya patana gumogo ni vavelegi vago.”

³Khu guralo, Mosi a di embela vathu, khuye: “Vbakari gwanu, hathani vambe vama va soma matshari, va ya sasela Vamedhiyani, mu phodzela PFHUMU Nungungulu khu iso va giridego.

⁴Mu somisa likhumi mazana (1.000) vama khu ga lihundzu ni lihundzu nya mahundzu yatshavbo ya Israyeli, mu va rumela guya nyimbitunu.”

⁵Khu guralo, ga mazanazana ya va na Israyeli, khu lihundzu ni lihundzu, gu di duga likhumi mazana (1.000), yatshavbo ma enedza likhumi na mavili magumi mazana (12.000) nya gusome matshari gasi guya nyimbitunu.

⁶Mosi a di va rumela gudwanatunu, lihundzu ni lihundzu na liri ni likhumi mazana vama, na vari ni Fineya, mwamana wa muphasi nya mhamba Eleyazari, nari ni sombo nya miphaso, ni mipundru nya guwombe gu tiviswa nyimbi.

⁷Va di dwana ni Vamedhiyani kha nga idzo PFHUMU Nungungulu a leletedego khidzo Mosi; va di songa vama vatshavbo.

⁸Va di songa gambe ni vafumeli va Vamedhiyani, vbakari ga avo va nga songwago va di romo navo Evhi, Rekemi, Zuri, Huri ni Rebha, a gu livbandre vafumeli va Vamedhiyani; va di songa gambe khu litshari Bhalahama, mwamana wa Bheyori.

⁹Aholu va na Israyeli va di mola vanyamayi va Vamedhiyani gumogo ni sanana sawe; va dzega gambe ni sifuyo sawe, mitshambi yawe nya dzimombe ni thomba yawe yatshavbo.

¹⁰Va vbisa madhoropa yawe yatshavbo gumogo ni mitshatsha va nga bani va gu vbanya umo.

¹¹Va di dzega thomba yatshavbo va yi phangidego, sifuyo ni dzikhumbi nya vathu.

¹²Va di resa ga Mosi ni ga muphasi nya mhamba Eleyazari, gumogo ni ga tshangano watshavbo wa na Israyeli, dzikhumbi niso va nga si manago gumogo ni thomba yatshavbo, va si resa mazumboni, mikovani ya Mowabhi vbafuvbi ni tsongo wa Joridhani, gigomoni gya Jeriko.[22]

¹³Mosi ni muphasi nya mhamba Eleyazari, ni vathangeli nya tshangano, va di duga guya va hakha vbavbandze nya lizumbo.

¹⁴Mosi a di gorogela vathangeli nya nyimbi, dzindruna nya sikwata nya likhumi mazana, ni dzindruna nya sikwata nya lizana va nga bani va wuya khu nyimbitunu.

¹⁵Mosi a di va embela, khuye: Ina mu di diga vanyamayi vatshavbo va vbanya, gani?

¹⁶ Wonani nya gukhenu, vanyamayi khavo va nga ghohisa va na Israyeli mbeli ga PFHUMU Nungungulu khu silayelo sa Bhalahama, gu kala va na Israyeli va ghoha mbeli ga PFHUMU Nungungulu, khu makungo ya Bhahali-Peyori, gu kala gu duga tungu wule tshanganoni ga PFHUMU Nungungulu.

¹⁷Khu guralo, songani madzaha yatshavbo, ni vanyamahegyane vatshavbo va tshanganidego ni mwama;

¹⁸aholu vanyamahegyane vatshavbo va si gu pheligo gu tshangana ni mwama, va digeni va vbanye, avovo va na lumba ethu.

¹⁹Enu khalani vbavbandze nya lizumbo kala mu enedza livbandre na mavili matshigu, watshavbo wule a na gu bani na songide muthu nya gukari, ni watshavbo wule a nga kuhago girumbi, a na dzi agise khu litshigu nya wuraru ni litshigu nya livbandre na mavili, enu gumogo ni dzikhumbi dzanu.

²⁰Mu na agisani guambala gwanu gwatshavbo, ni sombo nya malowo, ni thumo watshavbo wu giridwego khu mawoya nya phongo, gumogo ni sombo satshavbo nya mapulango.”

²¹Khavbo avbo, muphasi nya mhamba Eleyazari, a di embela vama va nga bani va hongode nyimbitunu, khuye: “Owu khuwo Nayo PFHUMU Nungungulu a leletedego Mosi, khuye:

²²Ndralama, parata, sugu, simbi, thofu ni riko,

²³satshavbo esi si si kodzigo guvbya khu nilo, mu na si vbindrisa khu niloni, gasi si kodze gu aga; khu guralo, si na agiswa khu mati nya giagiso; aholu satshavbo si vbyago khu nilo mu na si nega matini.

²⁴Mu na handza guambala gwanu khu litshigu nya livbandre na wuvili, gasi mu kodza gu aga; khu hwane nya isoso mu ngu dzi kodza gu bela lizumboni.”

²⁵PFHUMU Nungungulu a di embela Mosi, khuye:

²⁶“Uwe ni muphasi nya mhamba Eleyazari ni vathangeli nya tshangano, sayani tengo nya iso si phangidwego, vathu gumogo ni sifuyo.

²⁷U na kabanisa pfimba khu vbakari, gipandre gi lumba avo va hongodego nyimbitunu, gimbe gi lumba tshangano watshavbo.

²⁸Ga esi si lumbago masotshwa ma nga hongolago nyimbitunu, mu na dusani ndruwo nya guluve PFHUMU Nungungulu: Gipandre nya livbandre mazana nya silo satshavbo nya phango, nya vathu, nya dzimombe, nya dziburu ni dzinvuta.

²⁹Mu na vbungula khu vbakari ga esi si va lumbago mu ninga muphasi nya mhamba Eleyazari, gasi wu khale ningelo nya gundziwitedwe ga PFHUMU Nungungulu.

³⁰Aholu, ga giavelo gya na Israyeli, khu ga livbandre magumi, mu na dusa hungo moyo, umo nya vathu, nya dzimombe, nya dzinvuta ni ga dziburu, satshavbo si vbanyago mu na si ningela ga va na Levhi, avo va sayisago Tshatshani wa PFHUMU Nungungulu.”

³¹Mosi ni muphasi nya mhamba Eleyazari va di gira kha nga idzo PFHUMU Nungungulu a nga rumago khidzo Mosi.

³²Tengo nya pfimba wu nga phangwago khu vama va nga hongolago nyimbitunu wu diri livbandre na limwedo, ni livbandre na mavili ni livbandre magumi mazana (675.000) dzinvuta,

³³livbandre na mavili magumi ni magumavili mazana (72.000) dzimombe,

³⁴livbandre na limwedo magumi ni likhumi mazana (61.000) dziburu,

³⁵magumararu magumi ni magumavili mazana (32.000) vanyamayi va nga bani va si gu lali ni mwama.

³⁶Gipandre nya iso si nga bani siri giavelo gya vale va nga hongola nyimbitunu, si diri tengo nya mazana mararu ni magumararu na livbandre na mavili magumi ni livbandre mazana (337.500) dzinvuta;

³⁷idzo nya guningedwe PFHUMU Nungungulu dzi diri livbandre na limwedo mazana ni livbandre na mavili magumi ni livbandre (675) dzinvuta.

³⁸Gipandre nya dzimombe dzi diri magumararu na livbandre na limwedo magumi mazana (36.000), ningelo wa PFHUMU Nungungulu wu diri livbandre na mavili magumi na dzimbili (72) dzimombe.

³⁹Gipandre nya dziburu dzi diri magumararu magumi ni livbandre mazana (30.500), ningelo wa PFHUMU Nungungulu wu diri livbandre na limwedo magumi na mweyo (61) dziburu.

⁴⁰Gipandre nya vathu, va diri, likhumi na livbandre na limwedo magumi mazana (16.000), ningelo wa PFHUMU Nungungulu wu diri wa magumararu na vavili vathu.

⁴¹Khu guralo, Mosi a di ningela ga muphasi nya mhamba Eleyazari ningelo nya ndruwo nya guluve ga PFHUMU Nungungulu, kha nga idzo PFHUMU Nungungulu a rumidego khidzo Mosi.

⁴²Gasi gipandre nya iso si nga kavedwago va na Israyeli, hwane nya gu Mosi na kavede vama va nga dwanago nyimbi,

⁴³gipandre gi lumbago tshangano dzi diri mazana mararu ni magumararu na livbandre na mavili magumi ni livbandre mazana dzinvuta (337.500);

⁴⁴magumararu na livbandre na limwedo magumi mazana dzimombe (36.000);

⁴⁵ni magumararu magumi na livbandre mazana (30.500) dziburu;

⁴⁶ni likhumi na livbandre na limwedo magumi mazana (16.000) vathu.

⁴⁷Avbo nya gipandre gya va na Israyeli, Mosi a di dzega ga moyo ni moyo ga avo nya gikwata nya livbandre magumi, umo nya vathu numo nya sifuyo, a ningela ga va na Levhi avo va sayisago Tshatsha wa PFHUMU Nungungulu, kha nga idzo PFHUMU Nungungulu, a rumidego khidzo Mosi.

⁴⁸Aholu, vathangeli nya masotshwa va nga bani va thangede sikwata nya likhumi mazana, ni sikwata nya lizana va dita ga Mosi, vata, khavo:

⁴⁹“Ethu hi ngu sayela masotshwa hi nga bani hi va thangede, gani olu hi wonide nya gukhethu, kha ga kiyela ni moyo vbakari gwathu.

⁵⁰Khu guralo, moyo ni moyo nya ethu a gu vbweta gu gira ningelo ga Pfhumu nungungulu nya esi a si manidego nya nga sombo: Nya ndralama, mikarara, masindra, maniya, ni dziphera ni simbe, gasi gu gira phaso nya guditshedzwe sighoho, kholu PFHUMU Nungungulu a hi vbulugisidego.”

⁵¹Mosi ni muphasi nya mhamba Eleyazari, va di dzumela gu hakha ndralama yawe yatshavbo nya silo nya wumburi.

⁵²Ndralama nya ningelo va dusidego vathangeli nya likhumi mazana (1.000), ni vathangeli nya lizana (100) va luva PFHUMU Nungungulu yi di tshanganisa pimo nya likhumi na livbandre na limwedo magumi ni livbandre na mavili mazana ni livbandre magumi (16.750).

⁵³Mwama ni mwama nya vale va nga hongola nyimbitunu a di tshala ni esi a nga phangago, si khala saye.

⁵⁴Mosi ni muphasi nya mhamba Eleyazari va di hakha khu ga vathangeli nya sikwata nya likhumi mazana ni ga vathangeli nya sikwata nya lizana, ndralama va yi yisa Tshatshani nya Tshangano, kha nga gialakanyiso gya va na Israyeli, mbeli ga PFHUMU Nungungulu.