Read gitonga Mitengo 34 Bible Online

Mitengo 34 - gitonga bible

Mitengo 34

¹PFHUMU Nungungulu a di engedza a embela Mosi, khuye:

²“Ruma sanana sa na Israyeli, khuwe: Mu na bela tigoni gwa Khanani nyamba hwela, khilo eli litigo li na mi lumbago kha nga thomba; litigo la Khanani gukhedza khu mivbingano yaye.”

³Khu phuvbo ga Marandzi, vbingano wanu wu na khugela giwulani gya Zimi, kala Edhomi; khu guralo, vbingano wowu wa Marandzi avbo gwanu wu na phelela tshokatunu nya Yiphwa nya Munyu[23] khu phuvbo ga Khugadambo;

⁴vbingano wu na dzundruluga khu phuvbo ga Marandzi khu ndzila yi gwelago gu hongola Akirabhimi, wu vbindra khu Zimi, wu vboha Marandzi ga Kadhesi-Bharineya; khu hwane wu na vbindra khu Hazari-Adhari, wu tsemakanya Azimoni.

⁵Khu Azimoni vbingano wu na dzundruluga wu thonona gitsongwanani gya Egipito, wu ya hegisela phwani.

⁶Vbingano wa Muhwadambo wu na bani wuri Yiphwa nya Yikhongolo, uwowo wu na bani wuri vbingano wanu wa Muhwadambo.

⁷Vbingano wanu wa Wuronga, khowu: Mu na pandra gukhugela ga Yiphwa nya Yikhongolo kala gigomoni ga Hori;

⁸khu gigomotunu ga Hori mu na wu pandra kala nyangwani ga Hamati, vbingano waye wu na bani wuri mahegiso ga Zedhadi;

⁹khu vbale wu na khugela Ziforoni kala Hazari-Enani. Owu wu na bani wuri uwo vbingano wanu khu phuvbo ga Wuronga.

¹⁰Enu mu na pandra vbingano wanu khu phuvbo ga Khugadambo gukhugela Hazari-Enani kala Sefani;

¹¹khu guralo, vbingano wanu wu na khugela Sefani wu relela kala Ribila, khu phuvbo ga Khugadambo ga Ayini, wu simama gu relela khu gu landra bambe nya Yiphwa ya Kinereti[24] khu phuvbo ga Khugadambo;

¹²khavbo avbo, wu na relela wu landra tsongo wa Joridhani, wu ya hegisa ga Yiphwa nya Munyu. Eli li na bani liri litigo lanu gumogo ni mivbingano yaye khu maphuvbo yatshavbo.

¹³ Mosi a di leletela va na Israyeli, khuye: “Eli khu litigo mu yelago gu li kabanisela khu gu lola dzisolo, PFHUMU Nungungulu a rumedego gu ningela ga livbandre na mana mahundzu ni gipandre.

¹⁴Lihundzu la na Rubheni, gukhedza khu dzinyumba dzawe, lihundzu la na Gadhi, gukhedza khu dzinyumba dzawe ni gipandre nya lihundzu la na Manasi, va hakhide thomba yawe.

¹⁵Mahundzu yaya yamavili ni gipandre ma hakhide thomba yawe khisikheyi nya tsongo wa Joridhani, mbeli ga Jeriko, khu phuvbo ga Khugadambo.”

¹⁶PFHUMU Nungungulu a di ganela gambe ga Mosi, khuye:

¹⁷Malina ya vama va na gu kabaniselago litigo vbakari gwanu, khaya: Khu muphasi nya mhamba Eleyazari ni Josuwa, mwamana wa Nuni.

¹⁸Gu diga nya ava, mu na dzega gambe muthangeli moyo khu lihundzu ni lihundzu, gasi va kodze gu kabanisela litigo.

¹⁹Malina ya vama vovo khaya: Ga lihundzu la Judha, khu Kalebi, mwamana wa Jefoni;

²⁰ga lihundzu la na Simiyoni, khu Samuweli, mwamana wa Amiyudhi;

²¹ga lihundzu la Bhejami, khu Elidhadhi, mwamana wa Kisiloni;

²²ga lihundzu la na Dhani, muthangeli khu Bhuki, mwamana wa Jogili;

²³ga livelego la Josefe; nya lihundzu la na Manasi, muthangeli khu Haniyeli, mwamana wa Efodhi;

²⁴ga va na Efrayimi, muthangeli khu Kemuweli, mwamana wa Sifitani;

²⁵ga lihundzu la na Zabhuloni, muthangeli khu Elizafani, mwamana wa Parinaki;

²⁶ga lihundzu la na Isakari, muthangeli khu Palitiyeli, mwamana wa Azani;

²⁷ga lihundzu la na Aseri, muthangeli khu Ayudhe, mwamana wa Selomi;

²⁸ni ga lihundzu la na Nafitali, muthangeli khu Pedhayeli, mwamana wa Amiyudhi.

²⁹Ava khavo va leletedwego khu PFHUMU Nungungulu gasi gu va kabanisela litigo la Khanani ga va na Israyeli.