Read gitonga Mitengo 4 Bible Online

Mitengo 4 - gitonga bible

Mitengo 4

¹PFHUMU Nungungulu a di ganela ga Mosi ni Aroni, khuye:

²“Girani gilovela nya livelego la Khowati, vbakari ga va na Levhi, gukhedza khu linyangwa lawe ni dzinyumba dza vababe vawe,

³vatshavbo vale va gu ni tanga nya magumararu myaga guya mbeli kala livbandre magumi myaga, na va kodza gu thumela ni gu sayisa Tshatsha nya Tshangano.

⁴Owu khuwo wu na bani wuri thumo wa va na Khowati: Gusayisa silo nya guage ngudzu sa umo nya Tshatsha nya Tshangano.

⁵ Gikhati li khugago lizumbo, a nata Aroni ni sanana saye va ta dusa myendra nya makhuvi va fenengedza khiyo Ngasa nya Wufakazi;

⁶ va na yi fenengedza khu malowo nya guvbevbuge, khu vbatshani va ghwimba mwendra nya livala la damboni, va vega mipingo.

⁷Va na ladza mwendra nya livala la damboni vbatshani nya meza nya sibaba, va vega dzimbiya ni mikho, simbiyana nya libani ni mikanvu nya miningelo nya wadwa: Sibaba si na simama si na romo vbatshani nya mwendra yoyo gikhati gyatshavbo.

⁸Khu vbatshani ga satshavbo sesi va na fenengedza mwendra nya giwunguwungu, va fenengedza gambe khu malowo nya guvbevbuge va thela mipingo yakone.

⁹Va na dzega mwendra nya livala la damboni va fenengedza khuwo gidzigaredzo nya dzikandriya, myenge yakone, sitshimo sakone, sombo nya nguma ni mikanvu yatshavbo nya guthele mafura va thumago khayo.

¹⁰Va na vega gumogo ni satshavbo sombo omu nya vholo nya malowo nya guvbevbuge, va mi vega avbo nya mipingwi yakone.

¹¹Vbatshani nya giluvelo nya ndralama va na ladza mwendra nya livala la damboni; va fenengedza gambe vholo nya malowo nya guvbevbuge, va vbaregedza mipingo yakone.

¹²Va na dzega gambe sombo satshavbo nya thumo, va thumago khiso wulangani nya guage; va si thela umo nya mwendra nya livala la damboni, va si fenengedza khu vholo nya malowo nya guvbevbuge, va handzega vbatshani nya mipingo.

¹³Va na dusa nguma wa vbagiluvelotunu, khu vbatshani gakone va na ladza mwendra nya giwunguwungu;

¹⁴vbatshani gwaye va vega satshavbo sombo va thumago khiso thumo nya miphaso; gyombo nya magala, mikho, mafosola ni sikuwa; satshavbo sombo sa vbagiluvelotunu, khu vbatshani gakone va na ladza vholo nya malowo nya guvbevbuge, va tshomega mipingwi yaye.

¹⁵Avbo Aroni gumogo ni sanana saye, a na gu bani na vbedzide gu fenengedzela Wulanga nya Guage ni satshavbo sombo sa vbawulangatunu nya guage, gikhati li khugago lizumbo, sanana sa Khowati si nata si ta rwala; aholu, va nga kuhi silo nya guage, kholu va ngafa; thumo wowu wa gu lumba va na Khowati, umo nya Tshatsha nya Tshangano.

¹⁶Aholu Eleyazari, mwamana wa muphasi nya mhamba Aroni, a na sayisa mafura nya gukhondrise khayo dzikandriya, libani nya gunungele, ni ningelo nya miphaso nya dzimbewu, ni mafura nya gutodze; thumo watshavbo wa Tshatshani ni satshavbo si guromo wulangani nya guage gumogo ni mikanvu yaye.”

¹⁷PFHUMU Nungungulu a di ganela ga Mosi ni Aroni, khuye:

¹⁸“Thelani kota khu nyangwa nya lihundzu la Khowati, va si duswi vbakari ga va na Levhi.

¹⁹Aholu, gasi va vbanya, va si mani lufu, gikhati va hidzimelago ga silo si agidego ngudzu, mu na va girelani esi: Aroni ni sanana saye, va na bela va nonedza muthu ni muthu thumo waye a fanedego gu gira, va mu nonedza gambe ni rwalo waye.

²⁰Aholu va nga beli va ya wona Wulangani nya Guage wu fenengedzidwego, kholu va ngafa.”

²¹PFHUMU Nungungulu a di engedza a embela Mosi, khuye:

²²“Lovela gambe tengo nya sanana sa Gerisoni, gukhedza khu dzindranga dza vababe vawe, gumogo ni longoloko wawe;

²³u na va saya gukhugela vale va gu na ni tanga nya magumararu myaga guya mbeli kala livbandre magumi myaga, u na saya muthu watshavbo wule a belago thumoni nya Tshatsha nya Tshangano.

²⁴Thumo wu lumbago lihundzu la Gerisoni, esi va yelago gu thuma ni gu rwala, khowu:

²⁵Va na rwala myendra ya Wulanga nya Guage ni ya Tshatshani nya Tshangano, ni gifenengedzo gyakone, ni gifenengelo nya malowo nya guvbevbuge, esi si handzegwago khu vbatshani, ni mwendra wa vbamwanyatunu nya Tshatsha nya Tshangano;

²⁶ni myendra nya likupakupa, ni mwendra wa vbamwanyatunu nya likupakupa wu bhiyago Wulanga nya Guage ni giluvelo khu malangani yatshavbo; ni dzingodzi dzaye ni sombo satshavbo nya thumo wakone; gasi va thuma mithumo yi vbwetegago.

²⁷Khu gurumwa khu Aroni ni sanana saye, va na Gerisoni, iso va na gu thumago, niso va na rwalago, avo khavo va yelago gu va embela esi va yelago gu si sayisa mwendro gu si rwala.

²⁸Owu khuwo thumo wa sanana nya nyumba ya Gerisoni umo nya Tshatsha nya Tshangano; muwoneleli wawe a na bani ari Itamari, mwamana wa muphasi nya mhamba Aroni.”

²⁹U na lovela va na Merari gukhedza khu lihundzu lawe ni dzinyumba dza vababe vawe;

³⁰gukhugela avo va gu na ni magumararu myaga guya mbeli kala livbandre magumi, u na lovela vatshavbo vale va kodzago gu ya thumela umo nya Tshatsha nya Tshangano.

³¹Thumo va yelago gu ya wu gira Tshatshani nya Tshangano, khowu: Mapulangu nya Wulanga nya Guage, ni dzimbano dzaye, madingo yakone ni sirandro saye,

³²madingo ma randrelago likupakupa, ni sirandro saye ni sitshiko saye, dzingodzi dzaye ni sombo saye satshavbo ni thumo waye watshavbo; mu na lovela khu malina ya satshavbo sombo esi va fanelago gu si sayisa ni gu si rwala.

³³“Owu khuwo thumo wu lumbago mapango ya sanana sa na Merari; thumoni gwawe gwatshavbo umo nya Tshatsha nya Tshangano va na thangedwa khu Itamari, mwamana wa muphasi nya mhamba Aroni.”

³⁴Khu guralo, Mosi ni Aroni ni vathangeli vatshavbo nya tshangano, va di saya va na Khowati khu lihundzu lawe ni dzinyumba dza vababe vawe;

³⁵gukhugela vale nya tanga nya magumararu myaga guya mbeli kala livbandre magumi, vatshavbo va nga bani va gu yela gu thuma thumo wa Tshatshani nya Tshangano.

³⁶Tengo wawe gukhedza khu lihundzu lawe va di gu enedza magumavili na livbandre na mavili mazana ni livbandre magumi (2.750).

³⁷Khavo ava va lovedwego umo nya lihundzu la na Khowati, vatshavbo na va gu thuma umo nya Tshatsha nya Tshangano va nga lovedwago khu Mosi ni Aroni khu guleletela ga PFHUMU Nungungulu avbo ga Mosi.

³⁸Va di lovela va na Gerisoni gukhedza khu lihundzu lawe ni dzinyumba dza vababe vawe,

³⁹gukhugela avo va nga enedzago magumararu myaga guya mbeli kala livbandre magumi, vatshavbo vale va bedego thumoni momu, nya guthumele umo nya Tshatsha nya Tshangano.

⁴⁰Avo va nga sayedwago, gukhedza khu lihundzu lawe ni dzinyumba dza vababe vawe, va di enedza tengo nya magumavili na livbandre na limwedo mazana ni magumararu (2.630).

⁴¹Ava khavo va nga sayedwago omu nya livelego la Gerisoni, vatshavbo avo va nga bani va kodza gu thuma thumo wa Tshatshani nya Tshangano, va lovedwe khu Mosi ni Aroni, khu guleletela ga PFHUMU Nungungulu.

⁴²Tengo wa avo va nga sayedwago umo nya lihundzu la va na Merari, gukhedza khu lihundzu lawe ni dzinyumba dza vababe vawe,

⁴³gukhugela avo va nga enedzago magumararu myaga guya mbeli, kala livbandre magumi, watshavbo wule a bedego thumoni nya guthumele umo nya Tshatsha nya Tshangano.

⁴⁴Avo va nga sayedwago, gukhedza khu lihundzu lawe, va di enedza magumararu mazana ni mazana mavili (3.200).

⁴⁵Ava khavo va nga sayedwago khu Mosi ni Aroni nya lihundzu la va na Merari; kha nga idzo PFHUMU Nungungulu a nga leletelago khidzo khu mandzani ga Mosi.

⁴⁶Vatshavbo va nga sayedwago khu Mosi ni Aroni ni vathangeli va na Israyeli ni va na Levhi, gukhedza khu lihundzu lawe, ni dzindranga dza vababe vawe;

⁴⁷gukhugela ava va enedzidego magumararu myaga guya mbeli, kala livbandre magumi, muthu watshavbo wule a nga bani na gu bela gu ya gira thumo nya wuphasi, ni thumo nya gurwale ndrani nya Tshatsha nya Tshangano,

⁴⁸avo va nga sayedwago va di enedza tengo nya livbandre na mararu magumi, ni livbandre mazana ni livbandre na mararu magumi (8.580).

⁴⁹Gu di lovedwa vatshavbo, muthu ni muthu ni thumo waye gumogo ni rwalo waye kha nga idzo PFHUMU Nungungulu a nga leletago khidzo ga Mosi.