Read gitonga Mitengo 6 Bible Online

Mitengo 6 - gitonga bible

Mitengo 6

¹PFHUMU Nungungulu a di embela Mosi, khuye:

²“Ganela ga va na Israyeli u va embela, khuwe: Muthu nya gukari, mwama mwendro nyamayi, a gu dzi hathela gu gira gisambanyo ga PFHUMU Nungungulu, a tumbisa guvbanya kha nga Munaziri,

³ a nga seli vbinyu mwendro wadwa nya guvave; gima a nga seli ginageri nya dziuvha ambari ginageri nya wadwa nya guvave; a nga seli dosi nya dziuvha, mwendro gu hodza dziuvha nya guvidzwe mwendro nya gubange.

⁴Matshigu yatshavbo nya wunaziri waye, gima a nga hodzi iso si dugago khu simboni nya uvha, gukhugela dzithanga kala marego yaye.

⁵Matshigu yatshavbo nya wunaziri waye, gima a nga vidwi hungoni gwaye khu gisingwana; kala ma gu tadzisega matshigu a dzi hathedego gu thumela PFHUMU Nungungulu, a na bani nari muthu a agidego, a na diga ndzudzu waye wu dandra.

⁶Matshigu yatshavbo a dzi hathedego gu thumela PFHUMU Nungungulu, a nga tshuki a kuha girumbi;

⁷ ambari nari babe waye mwendro mayi waye, ndriyaye nya mwama, mwendro ndriyaye nya nyamayi, va gufa, a nga dzi nyenyezisi khavo; kholu gudziningela gwaye ga Nungungulu waye, gomo hungoni gwaye.

⁸Matshigu yatshavbo nya wunaziri waye a na bani a agisedwe ga PFHUMU Nungungulu.

⁹A gu tshuka afa muthu khu githugedza vbafuvbi gwaye, a nyenyeziswa hungo waye wu agisidwego khu gifungo nya wunaziri, uye a na vbalula ndzudzu waye khu litshigu nya gu dzi agise gwaye, a na wu vbalula khu litshigu nya livbandre na mavili.

¹⁰Khu litshigu nya livbandre na mararu a na resa ga muphasi nya mhamba matuva mavili, mwendro sifondro sivili nya sipomba, nyangwani nya Tshatsha nya Tshangano;

¹¹muphasi nya mhamba a na ningela gimwegyo gi khala phaso nya guditshedzwe sighoho, gasi egi gimbe gi na khala phaso nya guvbiswe; a na mu girela phaselo nya gutsetseledwe sighoho saye kholu a dzi nyenyeziside khu gu kuha girumbi, khu litshigu lolo kamwe, uye a na agisa hungo waye.

¹²A na engedza a dzi hathela matshigu nya wunaziri waye ga PFHUMU Nungungulu. Khu guralo, a na hatha gihambana nya tanga nya mwaga moyo, gasi gu gira ningelo nya sighoho; aholu matshigu ma nga vbindrago na nyenyezide gima kha ma na nga saywa, kholu wunaziri waye wu di nyenyezide.

¹³Owu khuwo nayo nya wunaziri; litshigu a tadzisago matshigu nya wunaziri waye, va na mu resa nyangwani nya Tshatsha nya Tshangano;

¹⁴uye a na ningela ningelo waye ga PFHUMU Nungungulu, a gu gihambana nya mwaga moyo nyambana livala, gasi gu gira phaso nya guvbiswe, ni ginvutana nya mwaga moyo nyambana livala, gasi gu tsetseledwa sighoho, ni hamba gasi gu gira phaselo nya gurule.

¹⁵Guvbwetega u dzega gambe rava nya sibaba nyambana mela, si giridwego khu wuguvbi nya wadi nya gusugwe khu mafura, ni mikati nyambana mela, na yi thedwe mafura, vbatshani, u na gira ningelo nya dzimbewu ni wadwa.

¹⁶Muphasi nya mhamba a na si resa mbeli ga PFHUMU Nungungulu, a bikela ningelo nya gutsetseledwe sighoho gumogo ni phaso nya guvbiswe;

¹⁷a na ningela nvutana gasi gu gira phaso nya gurule ga PFHUMU Nungungulu, ni rava nya sibaba nyambana mela; muphasi nya mhamba a na bikela gambe ningelo nya guhodze ni wadwa.

¹⁸Khavbo avbo, Munaziri a na vila ndzudzu waye wu gu ni gifungo nya wunaziri vbanyangwatunu nya Tshatsha nya Tshangano, aya wu thela niloni yi vbisedwago umo miphaso nya gurule.

¹⁹Khu hwane muphasi nya mhamba, a na dzega libogo nya nvutana li vidzidwego, a dzega ravani gibaba gimwegyo nyambana mela, ni kati nya guvawudwe, a si vega mandzani ga Munazari, hwane nya gu bani na vide ndzudzu waye nya wunaziri.

²⁰Muphasi nya mhamba a na si ndziwitela mbeli ga PFHUMU Nungungulu, esi si na bani na si agide ngudzu, si na lumba muphasi nya mhamba gumogo ni khana ni litundru nya ningelo nya gundziwitedwe; khu hwane nya isoso, Munaziri a ngu dzi kodza gu sela wadwa.

²¹Owu khuwo nayo wa Manaziri a dzi hungago khu gifungo gu gira ningelo ga PFHUMU Nungungulu, gasi gu landrisa gisambanyo gyaye, vbavbandze ga sile a si kodzago gu gira, khu gugola gwaye. Guvbwetega a landrisa satshavbo khu lisine, kha nga idzo a tumbisidego khidzo.”

²²PFHUMU Nungungulu a di embela Mosi, khuye:

²³“Embela Aroni ni sanana saye, khuwe: Mu na kategisa sanana sa Israyeli mu si embela, khenu:

²⁴PFHUMU Nungungulu a na gu kategise a gu vhikela;

²⁵PFHUMU Nungungulu a na ngangamedzise khovbe yaye avbo gwago a gu pwela wuhindzi;

²⁶PFHUMU Nungungulu a na thendregedze khovbe yaye avbo gwago, a gu ninge gurula.

²⁷Khu guralo, mu na rana Lina langu vbatshani ga sanana sa Israyeli, Eni nyi na va kategisa.”