Read gitonga Mitengo 9 Bible Online

Mitengo 9 - gitonga bible

Mitengo 9

¹Khu mwaga nya wuvili nya guduge gwawe khu tigoni ga Egipito, khu ngima nya guhegule, PFHUMU Nungungulu a di ganela ga Mosi na vari giwulani ga Sinayi, a mu embela, khuye:

²“Va na Israyeli va ngu yela gu gira phaso nya Phasika khu gikhati gi vegisidwego.

³Khu litshigu nya likhumi na mana nya ngima yoyu, vbasilambotunu mu na girani buzo nya Phasika khu gikhati gi vegisidwego; gukhedza khu sileletelo saye satshavbo, ni miphaselo yaye yatshavbo.”

⁴Khavbo avbo, Mosi a di embela vatshavbo va na Israyeli khuye va gire buzo nya Phasika.

⁵ Khu guralo, va na Israyeli va di gira buzo nya Phasika giwulani ga Sinayi khu litshigu nya likhumi na wu na nya ngima nya guphele, khu gikhati nya silambo, va gira satshavbo esi PFHUMU Nungungulu a nga leletela Mosi, nyamba tshiya ni gimwegyo.

⁶Va diromo vama nya gukari va nga bani va dzi nyenyeziside khu gu kuha girumbi nya mufi, va di si yeli gu gira buzo nya Phasika litshigu lolo. Va diya dzi wonegisa ga Mosi ni ga Aroni,

⁷va ya va embela, khavo: Ethu hi nyenyezide kholu hi nga kuhago girumbi. Ina kamwe hi ngu himbedzedwa gu gira ningelo wathu ga PFHUMU Nungungulu gumogo ni sanana sa na Israyeli, khu gikhati gi emisedwego, gani?”

⁸Mosi a di va hakha, khuye: “Lirelani vbadugwana kala nyi mana sileletelo PFHUMU Nungungulu a na nyi ningago khu mahungu yanu.”

⁹PFHUMU Nungungulu a di embela Mosi, khuye:

¹⁰“Tivisa va na Israyeli, khuwe: A gu manega moyo vbakari nya mahundzu yanu, a dzi nyenyezisidego khu kotani nya gukuhe girumbi, mwendro khu gu na endride aya hwindzo, ambari khu kharato, uye nuye a ngu yela gu gira buzo nya Phasika ga PFHUMU Nungungulu.

¹¹Khu litshigu nya likhumi na mana, nya ngima nya wuvili, vbasilambotunu mu na gira phaso nya Phasika; khu sibaba nyambana mela, mu hodza mitongwe nya guvave.

¹² Va na hodza nvutana yatshavbo nyamba tshiya gilo kala mindru, gambe va nga fanyi marambo yaye ambari ni limwedo basi; va na gira buzo yoyu gukhedza khu edzi wu rumago khidzo nayo nya Phasika.

¹³Aholu muthu a gu bani a dzi agiside, na sa endra, a diga gu gira buzo nya Phasika, muthu yoyo a na fuviswa vbakari ga va na gyawe, kholu kha dusa ningelo ga PFHUMU Nungungulu khu gikhati gi vegisidwego; muthu yoyo a na rwala nandru waye abune.

¹⁴Muwuyi, a vbanyago kha nga muluveli vbakari gwanu, a gu gola gu gira nuye buzo nya Phasika ya PFHUMU Nungungulu, a na landrise milayo ni sileletelo satshavbo nya Phasika. Mu na ni nayo moyo basi nya idzosaye ga vatshavbo, muluveli ni givelegwa gya tigoni.”

¹⁵Khu litshigu va emisidego Tshatsha nya Tshangano, lipfhi li di ta fenengedza Wulanga nya Guage; ni vbasilambotunu li di ngangamela nya gu fanane ni nilo khu vbatshani nya Wulanga nya Guage kala gugya.

¹⁶Gu di gira kharato matshigu yatshavbo, lipfhi li di fenengedza Wulanga nya Guage, vbawutshigutunu wu gira gukhwatshi nilo.

¹⁷Gikhati lipfhi li khugago vbatshani nya Wulanga nya Guage, va na Israyeli va di khuga va gimbila; avbo lipfhi li nga bani li gu ema, avo va di zumba va ghwimba mitshatsha yawe.

¹⁸Khu magirelo yaya, va na Israyeli va di virela guruma gwa PFHUMU Nungungulu, gasi gu khuga va gimbila mwendro gu ghova. Va di khala mitshatshani gwawe gikhati lipfhi li fenengedzago vbatshani nya Tshatsha.

¹⁹Gikhati lipfhi li hwelago matshigu nya mangi vbatshani nya Tshatsha, va na Israyeli va di landrisa sileletelo sa PFHUMU Nungungulu va si khugi.

²⁰Aholu khu gimbe gikhati lipfhi la gu khala matshigu madugwana vbatshani nya Tshatsha, kha nga guleletela ga PFHUMU Nungungulu, va di khala avbo, khu guruma ga PFHUMU Nungungulu, va di khuga va gimbila.

²¹Ga dzimbe dzinyondro lipfhi li nga bani li gu khala gukhugela gupfolani nya lidambo kala vbadzimindrutunu; gikhati lipfhi li khusegago vbadzimindrutunu, avo va di khuga va hongola, gani mihani, gani vbawutshigutunu, la gu khugega lipfhi, avo va di khuga va gimbila.

²²Lipfhi la gu fenengedza vbatshani nya Tshatsha, matshigu mavili, ngima moyo mwendro gikhati nya gulaphe ngudzu, na li nga gu vbuvba vbatshani gwaye, va na Israyeli va di simama gu zumba, va di si khugi va gimbila; aholu la gu khusega, avo va di khuga.

²³Khu guruma ga PFHUMU Nungungulu avo va di ghwimba mitshatsha yawe, khu guleletela ga PFHUMU Nungungulu avo va di khuga va gimbila, va di landrisa fanelo yawe ga PFHUMU Nungungulu, kha nga edzi PFHUMU Nungungulu a nga leletelago khidzo Mosi.