Read gitonga Mikeya 1 Bible Online

Mikeya 1 - gitonga bible

Mikeya 1

¹ Aya khu magana ya PFHUMU Nungungulu ma ngata ga Mikeya, wa Morasita, matshiguni ya Jotamo, vafumeli va Judha, na ma guta khu giwoniso a wonisidwego khu kotani ya Samariya ni Jerusalema.

²Upwani enu mayigo yatshavbo, tulani dzindzeve mu yingise, uwe litigo ni satshavbo si guromo umo, Mune PFHUMU Nungungulu, a na khale fakazi vbakari gwanu, Uye Pfhumu gukhugela khu nyumbani gwaye nya gukatege.

³Kholu, wonani nya gukhenu PFHUMU Nungungulu a ngu duga khu wulangani gwaye. A na tshiga ata gimbila khu vbatshani nya sigomo sa mafuni.

⁴Sigomo si na nyiviliga vbavbatshi nya migondro yaye, ni mikova yi na tulega nga mafura vbavbatshi nya nilo, kha nga mati ma gogago releloni ma khala nondrwa.

⁵Satshavbo si na girega khu kotani nya guyeyise ga Jakobe ni sighoho sa nyumba ya Israyeli, khu gevbini gighoho gya Jakobe? Ina khandri Samariya? Khu wevbini wulanga nya miphaso nya vanungungulu nya malipha va Judha? Khandri Jerusalema, gani?

⁶Khu guralo, nyi na gira gu Samariya a khala litala nya siwindri sa khabini, wulanga nya gu yale misimbo nya vhinya; siwindri saye si na thindriligela kovani, kala nyi tugula giseketelo gyaye.

⁷Sithombe saye satshavbo nya guvatwe, si na khungumuledwa ni satshavbo iso a nga bhindzulago khu wuphuphulu, si na dagarela khu nilo, sithombe saye satshavbo si na khungumuledwa, kholu uye a si wungedzede khu tengo nya wuphuphulu, kha nga hakhelo nya wubhayi waye.[1]

⁸Khu kotani nya isoso, nyi na lila nyi bwelo khavbo nyipwa wuvi, nyi gimbila wumbwiri ni gumba ambala silato, nyi na lila nga lisolwa, nyi womba huwa kha nga dzimbowa.

⁹Kholu gilondra gyaye khya gimange, gi vbohide kala Judha; gi endrelega kala dzinyangwani dza vathu vangu, gi vboha kala Jerusalema.

¹⁰Mu nga tivisini isoso tigoni ga Gati, gambe mu nga lili ngudzu. Puluwundrani ngumani, enu vavbanyi va Bheti-Leyafira.[2]

¹¹Dugani wumbwiri na mu tade khu dzitshoni, enu vavbanyi va Safiri; vavbanyi va Zahanani kha va na duga khu dhoropani gwawe; mwa gupwani gililo gya vathu va Bheti-Ezeli, pimani gukhenu mwalo gambe lipindru nya gu mi phaseni.

¹²Kholu vathu va vbanyago Maroti vomo guvbisegani nya gukhongolo ngudzu na va gu lirela guvbanyiswa, aholu kha va na gu mana; kholu libango leli li rumedwe khu PFHUMU Nungungulu, li vboha kala vbanyangwatunu ga Jerusalema.

¹³Enu vavbanyi va Lakisi, hungani mipatwa nya dzikavalu vbadzikaretatunu, (ogu khu guphela nya gughohe ga nyamahegyane wa Siyoni) kholu avbo gwanu gu manegide sighoho sa Israyeli.

¹⁴Khu kotani nya isoso mu na ningela miningelo nya guvbanganane ga Moreseti-Gati; dzinyumbani dza Akizebhi dzi na wonega kha nga wukanganyisi ga vafumeli va Israyeli.

¹⁵Nyi nga na gu mu resela uye a na guta mu wandrela mufumo wanu enu vavbanyi va Maresa; wudhumo wa Israyeli wu na vboha kala Adhulamo.

¹⁶Vbalulani ndzudzu hungoni, mu lila sanana sanu mu si golago; vbalulani mihungo yanu yi fanana ni uwo nya lighama, kholu sanana sanu si dzegidwe si yiswa wugumbini.