Read gitonga Mikeya 3 Bible Online

Mikeya 3 - gitonga bible

Mikeya 3

¹Nyi di engedza nyi ganela, kheni: Yingisani enu mu gu vathangeli va Jakobe, ni enu vafumeli nya ndranga ya Israyeli; ina khandri enu mu yelago guti gululama, gani?

²Aholu mwa gu nyenya gululama mu gola wuvivbi; mwa gu dusa lidowo la vbatshani la vathu vangu, ni nyama yawe ya vbatshani nya marambo yawe.

³Mu ngu hodza nyama nya vathu vangu, mu va dusa lidowo lawe, mu va fanyeledzela marambo yawe, mu ma pilela kha nga khwatshi nyama mu vbwetago gu thela khalini mwendro bhotani.

⁴Khu guralo, mu na rana PFHUMU Nungungulu, aholu uye kha na mi hakha, gambe khu gikhati gyogyo uye a na mi sihela khovbe yaye, khu kotani nya mithumo nya guvivbe va nyi giredego.

⁵PFHUMU Nungungulu a ngu ganela kharati, mayelano khu vaprofeti va ndreyisago vathu vangu va va hodzago khu magwaha yawe, va huwelela, khavo: “Gurula!” Aholu va wugela khu dzinyimbi vale va gumba va thela gilo kanani.

⁶Khu guralo, ligovbeni gwanu avbo mu na lalago, kha mu na wona siwoniso; gu na manega gidema, gasi mu si tuguli misihalo, vaprofeti vava, va na pfoledwa khu lidambo, litshigu lawe li khala gidema.

⁷Va tuguli nya misihalo va na khala dzitshoni, va nya dzisolo va na kanganyisega, vatshavbo va na sega magana yawe, kholu kha gu na manega phindrulo nya gute khiyo ga Nungungulu.

⁸Aholu khu lisine eni nyi tade khu tshivba nya Liphuvbo la PFHUMU Nungungulu nyi tade khu mapimo nya gululame ni gumbana hwanga, gasi gu huwelela va na Jakobe khu gu ndraga gwawe nya nayo ni gu yeyedza sighoho sa na Israyeli.

⁹Nga yingisani esi olu, enu vathangeli nya nyumba ya Jakobe, nenu vakhongolo nya litigo la Israyeli, mu nyenyago lisine mu hambanisa iso si lulamidego,

¹⁰enu mu vbahago Siyoni khu gu vbaladza novba, ni Jerusalema khu gu gira wuvivbi.

¹¹Vathangeli vawe va gu lamula, va gu rwega milandru vathu khu gu rengeledwa, vaphasi vawe nya mhamba va gu hevbudza khu gu vbweta gu hakha, vaprofeti va gu profeta khu gu vbweta dzitsapawu, aholu va gu dzi seketela khu PFHUMU Nungungulu, khavo: Khu lisine PFHUMU Nungungulu mwalo vbakari gwathu. Li mwalo libango li na gu hi dugelelago.

¹² Khu guralo, khu kotani yanu, Siyoni gu na limwa nga lithembwe, ni Jerusalema gu na khala litala nya siwindri, ni gigomo nya Nyumba ya Nungungulu, gi na khala gigomo nya likhabi.