Read gitonga Mikeya 4 Bible Online

Mikeya 4 - gitonga bible

Mikeya 4

¹Aholu, khu matshigu nya guhegise, gu na wonega gigomoni momu nya Nyumba ya PFHUMU Nungungulu, gi na khusedzwa vbatshani nya sigomo satshavbo, gi lapha guvbindra sigomwana satshavbo, mafumbu yatshavbo ya mafuni ma na tutumela iyoyo.

²Mayigo yatshavbo ma nata ma ta khayo: Hongoleni hi gwele gigomoni gya PFHUMU Nungungulu ni Nyumbani ga Nungungulu wa Jakobe, gasi a ta hi hevbudze dzindzila dzaye, ethu hi na landra sindzilana saye; kholu nayo wu na duga khu Siyoni, khu Jerusalema gu na duga magana ya PFHUMU Nungungulu.

³ A na lamula vbakari nya mafumbu nya mangi, a na tsayisa mayigo nya tshivba a ma yisa hwindzo, va na dzega matshari va gira mavbadza, sighalala va si gira sivbwero; litigo kha li na khusa litshari li wugela litigo likwawe, vathu kha va na hevbula gambe gu dwana nyimbi.

⁴ Muthu ni muthu, a na khala mutsani nya uvha waye, ni mutsani nya ngure waye, kha gu na manega muthu nya gu va thurugisele, kholu PFHUMU Nungungulu nya Tshivba Yatshavbo ganede.

⁵Kholu mafumbu yatshavbo ma na gimbila, muthu ni muthu ni nungungulu waye, aholu ethu hi na landra lina la PFHUMU Nungungulu wathu, khavbo gu si vbeligo.

⁶Khu litshigu lolo, a ngu ganela PFHUMU Nungungulu, nyi na tombanisa vale va ndzodolago, nyi tombanisa vale nyi nga va phalalegisa ni vale nyi nga va tshanisa.

⁷Avo va ndzodolago nyi na va gira mitshaledwa, ni avo va nga bani va phalalegisidwe va yiswa hwindzo, nyi na va gira litigo nya tshivba; PFHUMU Nungungulu a na fuma vbatshani gwawe gigomoni gya Siyoni, gukhugela olu kala gupindruga.

⁸Uwe likhokhola [3] nya tshambi, gigomo nya lidhoropa la Siyoni, avbo gwago wu nata wufumu nya guhegule, a gu mufumo wa nyamahegyane wa Jerusalema.

⁹Gasi olu, khu ginani u wombago huwa nya yikhongolo, ina u mwalo mufumeli, gani? A difa singalagadzi wago, gani? Gu kala u pwa wuvi nya nga wa nyamayi a lumwago?

¹⁰Uwe lidhoropa la Siyoni, vbisega nga nyamayi a vbwetago gu velega, kholu u na duga dhoropani u ya khala khabini, u vboha kala Bhabhiloni; khiyo u na gu ya tshudziswago iyo. Khiyoyo PFHUMU Nungungulu, a na gu tshudzisa mandzani ga valala vago.

¹¹Olu mayigo nya mangi ma tshanganide gasi gu gu wugela, ma ganela khayo: “Siyoni a na nyenyeziswe, gasi maho yathu, ma fela gu wona gunavela gwawe.”

¹²Aholu, ayo kha ma mati maalakanyo ya PFHUMU Nungungulu, gambe kha va pimi makungo yaye, kholu a va wungedzede nga dzinyandra vbagithalatunu.

¹³Khuga u vbula uwe nyamahegyane wa Siyoni, kholu nyi na gu girela dzikheho nya dzisimbi, ni samba nya sugu; u na sasela mayigo nya mangi, thomba yago yi na phasedwa PFHUMU Nungungulu, ni dzithomba dzawe, u phasela khidzo Mune nya litigo latshavbo.