Read gitonga Mikeya 5 Bible Online

Mikeya 5 - gitonga bible

Mikeya 5

¹Olu uwe nyamahegyane nya dzinyimbi, tombanisa mabutho nya dzinyimbi, va hi randrede khu malanga yatshavbo, va bayisa khu lipitso giwombo gya mulamuli wa Israyeli.

² Ni uwe Bhetlehema wa Efrata, ambari u gu dugwana vbakari nya mazanazana ya Judha, khavbo gwago gu na duga uye a na khalago mufumeli wa Israyeli, uye a nga bani ari gitugulwana gukhugela gikhatini gya gale, gukhugela matshiguni ma si vbeligo.

³Khu guralo, a na va ningela kala gikhati oyu a lumwago a na velegago. Khavbo vandriyaye va nga tshalago, va na wuyago vata dzi tshanganisa ni va na Israyeli.

⁴Uye a na simama a havisa vathu tshivbani ga PFHUMU Nungungulu, ni wugulu nya tshivba khu lina la PFHUMU Nungungulu waye avo va na khala mugurulani, kholu wugulu waye wu na vboha kala mahegiso nya litigo.

⁵Uye a na bani nari gurula gwathu. Vaasiriya va gu tshuka va dhumela litigo lathu va vbindra khu vbakari nya dzinyumba dza vafumeli vathu, hi na va emisela livbandre na vavili vahavisi ni livbandre na dzitharu dzindruna dzi na hathwago vbakari nya vathangeli nya lisima.

⁶ Avo va na mbembisa litigo la Asiriya khu matshari ni litigo la Ninirodhi, kala dzinyangwani gwalo. Khu kharati, a na hi vbulugisa mandzani ga Asiriya, a guta dhumela litigo lathu khu gu ndraga mivbingano yathu.

⁷Mitshaledwa ya Jakobe, yi na manega vbakari nya mafumbu nya mangi, kha nga hunguva yitago khu ga PFHUMU Nungungulu, kha nga mafesefese nya ndzadzi mwasini, kha yi na vega gitumbo gyaye ga muthu, ambari gu lirela sanana nya vathu.

⁸Mitshaledwa ya Jakobe yi na bani yiri vbakari nya mafumbu nya mangi, ni vbakari nya vathu nya mangi, kha nga nghala vbakari nya sirengo nya likhabi, kha nga ginghalana vbakari nya mitshambi nya dzinvuta, avbo gi vbindrago, gi na dzi gandredzela ni gu dzi vbadzulela nyamba manega muthu nya gu dzi vbulugise.

⁹Gyandza gyago gi na khusedzwe vbatshani ga avo va gu wugelago, valala vago vatshavbo va na mbembiswa.

¹⁰Khu litshigu lolo, a ngu ganela PFHUMU Nungungulu, khuye: Nyi na mbembisa dzikavalu dzago, nyi pfhungumula dzikareta dzago nya nyimbi;

¹¹nyi na khungumulela madhoropa ya tigoni gwago, nyi thesa vbavbatshi makhokhola yago yatshavbo.

¹²Nyi na vbedza wuloyi wa mandzani gwago; khu na nga mana gambe va nya gu lola dzisolo;

¹³Nyi na fuvisa vbakari gwago sifananiso sago nya guvatwe ni sihuru sago nya miphaso, uwe gima khu na khidzima gambe mbeli nya thumo nya mandza yago.

¹⁴Nyi na dusa vbakari gwago sihuru sa vanungungulu vago, nyi khungumula madhoropa yago.

¹⁵Khu likhulo ni giviti gyangu, nyi na phodza ga mayigo ma ngamba nyi yingisa.”