Read gitonga Mikeya 6 Bible Online

Mikeya 6 - gitonga bible

Mikeya 6

¹Olu upwani esi PFHUMU Nungungulu a ganelago, wari, khuye: “Khuga u eme u rwega nandru sigomo, sigomwana si na yingise lito lago.

²Enu sigomo yingisani, mu ngu rwegwa nandru khu PFHUMU Nungungulu, ni enu siseketelo nya litigo mu tiyidego ngudzu; kholu PFHUMU Nungungulu a ngu dwanisa vathu vaye, gambe a na lamula va na Israyeli.

³Enu vathu vangu, ginani nyi mi giredego? Nyi di mi lemedza ngudzu, gani? Nyi phindruleni.

⁴ Nyi gu duside khu tigoni ga Egipito, nyi gu tshudzisa nyumbani nya wugumbi; nyi mi rumede Mosi, Aroni ni Miriyamu.

⁵ Vathu vangu, alakanyani esi Bhalaki, mufumeli wa Mowabhi a lombidego, ni esi Bhalahama, mwamana wa Bheyori a mu phindrudego. Alakanyani lipfhumba nyi mi giredego gukhugela Sitimi kala Giligali, tugula gukhuwe mithumo ya PFHUMU Nungungulu yi lulamide.

⁶Ginani nyi yelago gu hongola nagyo ga PFHUMU Nungungulu, nyi ya noga mbeli ga Nungungulu a Khusegidego ngudzu? Nyi nata mu ninga miphaso nya guvbiswe, gimombyana nya mwaga moyo, gani? [4]

⁷Ina PFHUMU Nungungulu a di hadza gutsaka khu mazanazana nya dzihamba, ni likhumi mazana mitsongo nya mafura, gani? Nyi na ni fanelo nya guningele gyanana gyangu nya matiwula khu kotani nya sihoso sangu, a gu handro nya melego wangu khu sighoho nyi giridego, gani?

⁸Uwe muthu, Uye a gu nonedzide iso si gu sadi, iso PFHUMU Nungungulu a si vbwetago gukhuye u si gira khu esi: Gira iso si lulamidego, gola wuwadi, u gimbila khu gu dzi nogisa mbeli ga Nungungulu wago.

⁹Lito la PFHUMU Nungungulu li ngu huwelela ga lidhoropa; uye a gengedego a ngu thava lina laye. Upwani lipitso ni uye a li rumedego.

¹⁰Ina yi nga gu simama thomba nya gunyenyeze ni pimo nya guvbungudwe ndrangani ga muthu nya guvivbedwe khu monyo, gani?

¹¹Ina gu ngu kodzega gu Eni nyi tsetselela muthu nya gukari nari ni gikalo nyamba tumbega ni pimo nya wudambane, gani?

¹²Kholu sitetema si vbanyago vbakari gwanu si tade khu dzihanyi; ni vathu vawe va gu ganela malipha; ni malimi yawe khya wudambane.

¹³Khu kotani nya isoso eni kamwe nyi na gu tshanisa, nyi gu mbembisa khu kotani nya sighoho sago.

¹⁴Uwe u na hodza, aholu khu na khura; u na khala gupwa ndzala gikhati gyatshavbo. U na wungedzela, aholu kha wu na wuyedwa khu gilo; kholu iso si na vbulugago nyi na si mbembisa khu litshari.

¹⁵U na yala, aholu khu na nga vbwera; u na gamela dziolivha, aholu khu na tola mafura yakone; u na gamela dziuvha, aholu khu na sela vbinyu yakone.

¹⁶ Kholu mwa gu yingisa sileletelo sa Oniri ni mithumo yatshavbo ya va na Akabi, mu landrisa gambe ni sihena sawe. Kotani nya isoso, nyi na mi mbembisa ni vathu vanu nyi va gira gihegiso, nyi na mi gira mu hegwa khu mayigo yatshavbo.”