Read gitonga Sofoniya 2 Bible Online

Sofoniya 2 - gitonga bible

Sofoniya 2

¹Rambanani mu tshangana mu wuyisela mapimo, enu vathu nyambana dzitshoni.

²Mu si gu phalalegiswi kha nga mungu wu mwalalegago khu litshigu limwedo, mu si gu thegedwi khu likhulo nya guthise la PFHUMU Nungungulu; ina, mu si gu vbohedwi khu litshigu nya likhulo la PFHUMU Nungungulu.

³Vbwetani PFHUMU Nungungulu, enu mwatshavbo, va nya gurula va mafuni, enu mu landrisago milayo yaye. Zamani guvbweta gululama, dzi nogiseni mbeli gwaye, a gu dzina saye mu na mana wuthavelo litshigu nya likhulo la PFHUMU Nungungulu.

⁴Kholu lidhoropa la Gaza li na khala giwula, eli la Asikaloni, li na khala marumbi; Asidhodhi, gu na phangwa vbakari nya mihani, vathu va Ekoroni va na vbagedwa.

⁵Libango gwanu enu mu vbahidego bambe nya yiphwa, vathu va Kereta! Magana ya PFHUMU Nungungulu, ma ngu wugela enu vathu Vakhanani, litigo nya Vafilisitiya, khayo: Eni nyi na mi gupfhungumula mu khala marumbi nyambana muthu.

⁶Litigo lanu la bambe nya yiphwa, li na vbindrugedza li khala wuhaviselo nya sirengo, li manega ni mitshatsha nya vahavisi ni mavbandro nya mitshambi.

⁷ Mitshaledwa nya lihundzu la Judha yi na ta bela yi dzega litigo leli. Va na havisela umo mitshambi yawe, wutshiguwule va na lala mudzinyumbani ga Asikaloni. Kholu PFHUMU Nungungulu wawe, a na va endrela nyaluphye, a wuyisa vale va nga bani vari wugumbini.

⁸ Nyi pwide guyuyutela ga vathu va Mowabhi ni gupoyila ga sanana sa Amoni gikhati va nga valago vathu vangu, va dzi khusedza khu litigo lawe.

⁹Khu kharato, nyi ngu sambanya khu womi wangu, a ngu ganela Pfhumu nya Tshivba Yatshavbo, Nungungulu wa Israyeli, khu lisine, Mowabhi a na fanana ni Sodhoma, sanana sa Amoni si fanana ni Ghomora, marembwe yawe ma na tala khu miba ni siruga nya munyu, gu na vbindrugedza gu khala giwula kala gupindruga. Va na phangwa khu mitshaledwa nya vathu vangu ni mitshaledwa nya vathu vangu yi na wandra mayigo yawe ma khala thomba yawe.

¹⁰Oyu wu na bani na wuri tshatshazelo nya matshandza yawe, kholu va di vala ni gu poyila vathu va Pfhumu, Nungungulu nya Tshivba Yatshavbo.

¹¹ PFHUMU Nungungulu a na thisa vbakari gwawe, kholu a na fuvisa vbakari gwawe vanungungulu vatshavbo va mafuni; vatshavbo va nata mu khozela, muthu ni muthu gukhugela tigoni gwawe, ambari sidwa sa hwindzo ni lihundzu lawe.

¹² Enu nenu vathu Vaetiyopiya, mu na songwani khu litshari langu.

¹³PFHUMU Nungungulu a na thawuludza gyandza gyaye a veta phuvbo ga Wuronga, a na mbembisa Asiriya, a na vbindrugedza Ninivha gu khala wulanga nya giwula nyambana muthu.

¹⁴Vbakari gwaye, gu na khala mazumbo nya mitshambi, nya mafumbu yatshavbo nya sirengo sa khabini; matembe ni sisungurukhuru si na mana wuthavelo vbatshani nya madingo yawe; ligwaha nya sinyoni, li na pwala khu sihogoni nya dzinyumba, vamahigonganye khu myanyani, kholu si guledwe mihasimo nya mapulango nya sena.

¹⁵ Khidzo kharati lidhoropa nya matshandza li nga bani li gu vbanya gukhadzisegani li dzi khusedza khu monyoni gwaye, khilo: “Kheni nyenga, mwalo mumbe nya gufanane ni eni.” Olu li vbindrugedzide kharini li khala marumbi, li khala liphala nya sirengo nya likhabi, muthu watshavbo a vbindrago khu vbafuvbi, a na li hega a womba ndrodzi, a ninginingisa hungo.