Read gitonga Zakariya 1 Bible Online

Zakariya 1 - gitonga bible

Zakariya 1

¹ Khu ngima nya livbandre na miraru nya mwaga nya wuvili nya gufume ga Dhariyo, lito la PFHUMU Nungungulu li dita ga muprofeti Zakariya, mwamana wa Bherekiya, mwamana wa Idho, khilo:

²“PFHUMU Nungungulu, gorosidwe ngudzu khu vababe vanu.

³Khu guralo, uwe va embele, khuwe: PFHUMU Nungungulu nya Tshivba Yatshavbo, a ngu ganela kharati, khuye: Wuyani gwangu, a ngu ganela PFHUMU Nungungulu nya Tshivba Yatshavbo, eni neni nyi na wuya gwanu, a ngu ganela PFHUMU Nungungulu nya Tshivba Yatshavbo.

⁴Mu nga girini kha nga vababe vanu, va nga huweledwa khu vaprofeti nya guhegule, va nga ganela gwawe, khavo: PFHUMU Nungungulu nya Tshivba Yatshavbo, a ngu ganela kharati, khuye: Vbindrugedzani, mu diga dzindzila dzanu nya guvivbe ni mithumo yanu nya gunyenyeze. Aholu avo kha va nyi yingisa, gambe gima kha va thela kota khu eni, a ngu ganela PFHUMU Nungungulu.

⁵Vomo hayi vababe vanu? Ahati vaprofeti, va na vbanya kala gupindruga, gani?

⁶Aholu, magana ni sileletelo sangu, nyi si tivisidego khu magana ya vaprofeti, sithumi sangu, ina kha sa pwala dzindzeveni ga vababe vanu, gani? Khavbo avbo, avo va di dzi laya va vbindrugedza va ganela, khavo: PFHUMU Nungungulu nya Tshivba Yatshavbo a hi pharidego kha nga idzo a hungidego khidzo gu hi tsayisa gukhedza khu mavbanyelo ni mithumo yathu.”

⁷Khu litshigu nya magumavili na mana nya ngima nya likhumi na moyo, a gu ngima nya sebati, khu mwaga nya wuvili nya gufume ga Dhariyo, lito la PFHUMU Nungungulu li dita ga muprofeti Zakariya, mwamana wa Bherekiya, tugulu wa Idho, khilo:

⁸ Ni wutshigu, nyi di lora ndroro yeyi: Nyi di wona mwama moyo na khilede kavalu nya gufuvile, na emide vbakari nya misimbo yi ranwago gupwani murita, releloni nya kova nya guete; hwane gwaye gu diri ni dzikavalu nya gufuvile, nya gusivbale nidzo nya guage.

⁹Khavbo avbo, nyi di wudzisa, kheni: “Pfhumu yangu, gasi khu va mani ava?” Ngilozi yi nga bani yi ganela ni eni, yi di, khiyo: “Nyi na gu nonedza gukheni khavo va mani.”

¹⁰Mwama a nga bani na emide vbakari nya misimbo nya murita, a di hakha, khuye: Ava khu vale PFHUMU Nungungulu a va rumedego gu gudzundrulugela litigo.

¹¹Avo va di resa phindrulo ga ngilozi ya PFHUMU Nungungulu, yi nga bani yi emide vbakari nya misimbo nya mimurita, khavo: “Ethu hi vbedzide gu dzundrulugela litigo latshavbo, hi wonide nya gukhethu, li rude ni gutangala.”

¹²Khavbo avbo, ngilozi ya PFHUMU Nungungulu, yi di wudzisa, khiyo: “Ama PFHUMU Nungungulu nya Tshivba Yatshavbo, u na kala lini nu si pweli wusiwana Jerusalema ni madhoropa yatshavbo ya Judha u ma tshanisago khu likhulo lago ndrani nya gipandre gegi nya livbandre na mavili magumi (70) myaga?”

¹³Khavbo avbo, PFHUMU Nungungulu a di hakha ngilozi yi nga bani na yi gu ganela ni eni khu magana nya yadi, magana nya gutangadzise.

¹⁴Khavbo avbo, ngilozi yi nga bani na yi ganela ni eni, yi di nyi embela, khiyo: Huwelela esi, u ganela, khuwe: PFHUMU Nungungulu nya Tshivba Yatshavbo, a ngu ganela kharati, khuye: Nyi ngu vbisega ngudzu khu kotani ya Jerusalema ni Siyoni;

¹⁵Gambe nyi ngupwa likhulo nya likhongolo ngudzu khu kotani nya mayigo ma guromo gukhadzisegani; kholu avbo eni nyi nga bani nyi gorogide vbadugwana khu kotani nya vathu vangu, ayo ma di engedzela gu gira guvivba.

¹⁶Khu guralo, PFHUMU Nungungulu, a ngu ganela kharati, khuye: “Eni nyi na wuya nyaluphye Jerusalema na nyi tade khu gisiro; nyumba yangu yi na vbahedzwa umo, a ngu ganela PFHUMU Nungungulu nya Tshivba Yatshavbo, ni ngodzi nya gupime khiyo, yi na thawuludzwa Jerusalema.”

¹⁷“Huwelela gambe, u ganela, khuwe: PFHUMU Nungungulu nya Tshivba Yatshavbo a ngu ganela kharati, khuye: Madhoropa yangu ma na bwelo khavbo ma tala gambe khu makategwa; PFHUMU Nungungulu a na tangadzisa Siyoni, a wuya gambe a hatha nyaluphye Jerusalema.”

¹⁸Nyi di khusa maho nyi wona dzikheho dzina.

¹⁹Khavbo avbo, nyi di wudzisa ngilozi yi nga bani na yi ganela ni eni, kheni: “Dza gu tshamusela ginani dzikheho dzedzi?” Ngilozi yi di nyi hakha, khiyo: “Dzikheho dzile, khu dzitshivba dzi nga phalalegisago Judha, Israyeli ni Jerusalema.”

²⁰PFHUMU Nungungulu a di nyi nonedza vapfhuli vana nya dzisimbi.

²¹Khavbo avbo, eni nyi di wudzisa, kheni: “Gasi ava va guta thuma ginani?” Iyo yi di nyi hakha, khiyo: Dzikheho dzedzi, khidzo dzi nga phalalegisago Judha, avbo nya gu mwalo muthu a nga dzi kodzago gu khusedza hungo. Khu guralo, vapfhuli vava, va dzude gasi guta thusedzela ni gu pfhungumula dzitshivba nya mayigo ma nga wugelago litigo la Judha, ma phalalegisa sanana saye ni mayigo yatshavbo.