Read gitonga Zakariya 14 Bible Online

Zakariya 14 - gitonga bible

Zakariya 14

¹Wonani, li ngu vboha litshigu la PFHUMU Nungungulu, avbo phango wanu wu na guta kabaniswa vbakari gwanu.

²Kholu nyi na tombanisa mayigo yatshavbo ma ta hengela gu dwanisa Jerusalema; lidhoropa li na wandrwa, dzinyumba dzi na pfhungumuledwa, vanyamayi va na pfinywa, gipandre nya vathu va dhoropani va na vbagedwa va yiswa wugumbini, aholu avo va na tshalago kha va na tutumiswa dhoropani.

³Khavbo avbo, PFHUMU Nungungulu a na duga aya wugela mayigo yoyo, a ma dwanisa, kha nga idzo a dwanidego khidzo litshiguni nya nyimbi.

⁴Khu litshigu lolo, a na ema khu migondro yaye mugigomoni nya Miolivha gi guromo mbeli nya lidhoropa la Jerusalema, khu phuvbo ga Khugadambo. Gigomo nya Miolivha gi khedzanidego ni Jerusalema khu Khugadambo kala Muhwadambo, gu na manega kova nya wukhongolo ngudzu. Gimbe gipandre nya gigomo gi na thegela Wuronga, gimbe gi thegela Marandzi.

⁵Enu mu na tutuma mu thava khu releloni vbakari nya sigomo sangu, kholu kova wu na relela kala Azeli, mu na thavani kharati kha nga idzo mu tutumidego khidzo gikhati nya girevareva gi manegidego matshiguni ya Uziya, mufumeli wa Judha; khavbo avbo, a na vboha PFHUMU Nungungulu wangu na randredwe khu sihathwa satshavbo.

⁶Litshigu lolo, gu na bani guri mwalo guwonegela ni gidema ni pfhuphelo.

⁷Aholu gu na khala nari litshigu li tidwago khu PFHUMU Nungungulu basi; kha li na khala liri mihani mwendro wutshigu; kholu vbasilambotunu gu na manega guwonegela.

⁸ Litshigu lolo, gukhugela Jerusalema gu na goga mati nya guvbanye, gipandre nya mati yoyo gi na goga gi ndrindrela phwani ga Khugadambo, gimbe gipandre gi ndrindrela phwani ga Muhwadambo; isoso si na girega khu nango nya maronga ni nango nya girame.

⁹PFHUMU Nungungulu a na bani ari uye Pfhumu nya litigo latshavbo; litshigu lolo, PFHUMU Nungungulu a na bani ari moyo basi, ni lina laye li na bani liri ilo longa basi.

¹⁰Litigo latshavbo li na vbindrugedza li khala nga lipani, gukhugela Gebha kala Rimoni, khu phuvbo ga Marandzi ga Jerusalema; Jerusalema gu na khusedzwa bwelo khavbo gu khala wulangani gwaye, gukhugela nyangwani ga Bhejami kala nyangwani nya lidimba nya guhegule, kala Nyangwa ya Khonatunu, ni gukhugela Langwe ya Hananeli kala mabangani ga mufumeli.

¹¹ Va na vbanya umo, kha gu na nga manega gambe givalo; gambe, vathu va Jerusalema, va na vbanya khu gurula nyamba thava gilo.

¹²Owu khuwo tungu a nga wu thumisago PFHUMU Nungungulu gasi gu bayisa khuwo mayigo yatshavbo ma nga wugelago Jerusalema; nyama yawe yi na hina na va nga gu vbanya; maho yawe ma na hina musikodoni gwawe, ni malimi yawe ma na hina maganani gwawe.

¹³Litshigu lolo, vbakari gwawe gu na manega pfilupfilu nya yikhongolo ngudzu nya gugirwe khu PFHUMU Nungungulu; muthu ni muthu a na mola libogo la mungana waye, va na wugelana khu gyawe.

¹⁴Judha a na phasedzela Jerusalema gu dwana, va na wungedzela dzithomba nya mayigo yatshavbo nya vaakelane: Ndralama, parata ni guambala nya gutale ngudzu.

¹⁵Owu wu na bani wuri tungu wu na bayisago dzikavalu, dzimula, dzingameriya, dziburu ni sirengo satshavbo si na bani si romo wughoveloni gwawe, wu na fanana nuwo nya guhegule.

¹⁶ Mitshaledwa nya mayigo yatshavbo ma nga dwanago ni Jerusalema, khu mwaga ni mwaga yi na gwela yi ta khozela Mufumeli, PFHUMU Nungungulu nya Tshivba Yatshavbo, ni guya gira Buzo nya Mitshatsha.

¹⁷Ni levbi lihundzo la mafuni li na gumba gwela Jerusalema gasi guya khozela PFHUMU Nungungulu nya Tshivba Yatshavbo, kha li na wedwa khu ndzadzi.

¹⁸Ambari ni mafumbo nya Vagipiti ma gumba gwela ma ta mu khozela, kha va na wedwa navo; va na thegedwa khu tungu PFHUMU Nungungulu nya Tshivba Yatshavbo, a na gu bayisago khuwo mayigo yale ma na gumba gwela gasi guya gira Buzo nya Mitshatsha.

¹⁹Khuwo owu tsayiso nya Vagipiti ni tsayiso nya mayigo yatshavbo ma na gumba gwela gasi guta gira Buzo nya Mitshatsha.

²⁰Litshigu lolo, gu na bethwa umo nya vanyangendre nya dzikavalu gupwani: “Gilo gi agisedwego PFHUMU Nungungulu; dzikhali dzi guromo nya guphule khidzo Nyumbani ga PFHUMU Nungungulu, dzi na agiswa gu fanana ni sifugo si thumiswago vbagiluvelotunu.

²¹Dzikhali dzatshavbo dza dhoropani ga Jerusalema ni tigoni ga Judha dzi na khala sombo si agisedwego PFHUMU Nungungulu nya Tshivba Yatshavbo; vatshavbo vale va na hongolago vaya ningela dzimhamba nya miphaso, va na dzi thumisa guphulela umo guhodza nya miphaso. Khu litshigu lolo, kha gu na manega gambe varengisi va gira wugwewo Nyumbani ga PFHUMU Nungungulu nya Tshivba Yatshavbo.