Read gitonga Zakariya 2 Bible Online

Zakariya 2 - gitonga bible

Zakariya 2

¹Nyi di engedza gu khusa maho yangu, nyi wona mwama moyo na pharide ngodzi nya gupime khiyo.

²Eni nyi di mu wudzisa, kheni: “Wa gu hongola hayi?” Uye a di nyi hakha, khuye: “Nya guya pima Jerusalema, gasi guti gulapha ni guanama gwaye.”

³Khavbo avbo, ngilozi yi nga bani yi gu ganela ni eni yi di khuga, yi khingwa khu yimbe ngilozi;

⁴yi ya yi embela, khiyo: “Tutuma u ya embela lidzaha lile, khuwe: Jerusalema gu na khala kha nga mitalala nyambana mabhiyo khu kotani nya talo nya vathu vaye ni sifuyo saye nya singi.

⁵Aholu Eni, a ngu ganela PFHUMU Nungungulu, nyi na khala kha nga libhiyo nya nilo li va dzundrulugedego, eni mune kamwe nyi na khala wudhumo waye, vbakari gwaye.”

⁶PFHUMU Nungungulu wari, khuye: Dzi woneleni! Dzi woneleni! Olu thavani khu tigoni ga Wuronga, kholu eni nyi mi phalalegiside ga dzikhona dza dzina nya litigo, a ngu ganela PFHUMU Nungungulu.

⁷Yingisa, uwe Siyoni! Thavani enu mu vbanyago Bhabhiloni.

⁸Kholu PFHUMU Nungungulu nya Tshivba Yatshavbo, a ngu ganela kharati, khuye: Hwane nya gu na nyi rumede ga mayigo ma mu phangidego; kholu wule a mu kuhago a gu kuha ndzololwane nya liso laye.

⁹Wonani, eni nyi na khusa gyandza gyangu nyi va bayisa va fela gu khoziswa khu dzikhumbi dzawe. Khavbo enu mu na dzitigo gukhenu khu PFHUMU Nungungulu nya Tshivba Yatshavbo a nyi rumedego.

¹⁰Embelela khu gunengela uwe nyamahegyane wa Siyoni, kholu eni nyi nguta nyita vbaha vbakari gwago; a ngu ganela PFHUMU Nungungulu.

¹¹Khu litshigu lolo, mayigo nya gutale ma na ta dzi tshanganisa ga PFHUMU Nungungulu, va na khala vathu vangu; nyi na vbanya vbakari gwago, khavbo u na dzitigo gukhuwe PFHUMU Nungungulu nya Tshivba Yatshavbo, a nyi rumede gwago.

¹²PFHUMU Nungungulu a na fumela Judha kha nga thomba yaye tigoni nya gukatege, gambe a na dzi hathela nyaluphye lidhoropa la Jerusalema.

¹³Vathu vatshavbo va na degule mbeli ga PFHUMU Nungungulu, kholu uye khugide a dzi wonegisa khu Wulangani gwaye nya Guage.