Read gitonga Zakariya 3 Bible Online

Zakariya 3 - gitonga bible

Zakariya 3

¹ Khu hwane nya ugo, Uye a di nyi yeyedza Josuwa, muphasi nya khongolo nya mhamba, na emide mbeli ga ngilozi ya PFHUMU Nungungulu, Sathane na emide khu nyamudye, gasi gu mu thuledza.

² Ngilozi ya PFHUMU Nungungulu yi di embela Sathane, khiyo: “PFHUMU Nungungulu a na gu thele dzitshoni, uwe Sathane! PFHUMU Nungungulu a hathidego Jerusalema, a na gu tsayise uwe Sathane. Ina mwama yoyu khandri a gu fanana ni lihale li dusidwego niloni, gani?”

³Josuwa a di ambade dzingandzu nya dzindzilo gikhati a nga bani a emide mbeli ga ngilozi ya PFHUMU Nungungulu.

⁴Ngilozi yi di embela avo va nga bani va emide mbeli gwaye, khiyo: “Mu tshuleni dzingandzu dzaye nya gunyenyeze.” Khu hwane a embela Josuwa, khuye: “Wona, nyi gu duside sighoho sago, nyi gu ambagisa dzingandzu nya wuzundzo.”

⁵A di ganela gambe, khuye: “Mu ambagiseni gihugu nya guage hungoni.” Va di mu ambagisa gihugu nya guage gumogo ni dzingandzu; ngilozi ya PFHUMU Nungungulu na yi gu si wona.

⁶Khavbo avbo, ngilozi ya PFHUMU Nungungulu yi di embela Josuwa, khiyo:

⁷“PFHUMU Nungungulu nya Tshivba Yatshavbo, a ngu ganela kharati, khuye: Wa gu landrisa dzindzila dzangu, u yingisa sileletelo sangu, u na fumela nyumba yangu, gambe u na sayisa makupakupani gwangu. Nyi na gu ninga wulanga vbakari ga avo va guromo mbeli gwangu.

⁸ Olu, upwa gwadi, uwe Josuwa, muphasi nya khongolo nya mhamba, uwe gumogo ni vangana vago va khalago mbeli gwago, kholu enu mu giwoniso nya guvbanyiswe gu natago; Eni nyi na resa githumi gyangu nya gupwani Lithungedwa.

⁹Kholu wonani gukhenu giwindri nyi gi vegidego mbeli ga Josuwa; vbatshani nya giwindri gegi gya gimwegyo basi, momo livbandre na mavili maho; wona nya gukhuwe nyi na betha avbo milowo, gambe nyi na dusa gighoho nya litigo leli khu litshigu limwedo; a ngu ganela PFHUMU Nungungulu nya Tshivba Yatshavbo.

¹⁰ Ga litshigu lolo, a ngu ganela PFHUMU Nungungulu nya Tshivba Yatshavbo, moyo ni moyo nya enu a na rana muakelane waye gasi guta khala mutsani nya uvha waye ni mutsani nya nguhu waye.”