Read gitonga Zakariya 4 Bible Online

Zakariya 4 - gitonga bible

Zakariya 4

¹Ngilozi yi nga bani yi ganela ni eni, yi dita gambe yi ta nyi wusa gukhwatshi khu muthu a wuswago ligovbeni gwaye.

²Yi di nyi wudzisa, khiyo: “Ginani u gi wonago?” Eni nyi di hakha, kheni: “Nya gu wona gidzigaredzo nya dzikandriya nya ndralama, khu vbatshani gakone gi na ni gyombo nya guthele umo mafura. Gidzigaredzo gi na ni livbandre na dzimbili dzikandriya ni livbandre na mavili matirisida nya dzikandriya.

³ Vbafuvbi gwaye yomo misimbo mivili nya miolivha, moyo khu nyamudye, mumbe khu nyambade nya gyombo nya guthele mafura.”

⁴Khavbo avbo, eni nyi di wudzisa ngilozi yi nga bani yi ganela ni eni, kheni: “Mune wangu gasi sa gu tshamusela ginani silo sesi?”

⁵Khavbo avbo, ngilozi yi nga bani yi ganela ni eni yi di nyi phindrula, khiyo: “Khu wuti tshamuselo nya silo sesi, gani?” Eni nyi di hakha, kheni: “Kha nyi wuti mune wangu.”

⁶ Uye a di nyi hakha a nyi embela, khuye: “Aya khu magana ya PFHUMU Nungungulu a ganelago khu kotani ya Zorobhabheli, khuye: Khandri khu tshivba, mwendro khu dzihanyi, aholu, khu Liphuvbo langu; a ngu ganela PFHUMU Nungungulu nya Tshivba Yatshavbo.

⁷Uwe gigomo nya gulaphe, u ginani uwe mbeli ga Zorobhabheli? U na wonega kha nga lipani basi; kholu uye a na handzega giwindri nya guhegule na gu huwelela, khuye: Wuyani! Wuyani! Nungungulu a na kategise!

⁸Khavbo avbo, lito la PFHUMU Nungungulu li dita gambe gwangu li ta, khilo:

⁹“Mandza ya Zorobhabheli ma tsitside khokhweni nya nyumba yeyi, mandza yaye gambe ma na vbedzisa gu yi vbaha. Gasi mu kodza gu dziti nya gukhenu PFHUMU Nungungulu nya Tshivba Yatshavbo a nyi rumede gwanu.

¹⁰ Khu mani a kanyisago litshigu nya silo nya sidugwana? Vatshavbo va na kulungela gikhati va na wonago giwindri giri mandzani ga Zorobhabheli.”

¹¹ Khu gulandrela, nyi di wudzisa ga ngilozi, kheni: Ya gu tshamusela ginani miolivha yeyi ya mivili yi guromo khu nyamudye wumbe khu nyambade nya gidzigaredzo nya dzikandriya?

¹²Nyi engedza gambe gu wudzisa, kheni: Ma gu tshamusela ginani matamo yaya ya mavili nya miolivha ma guromo vbafuvbi ni mipopi mivili nya ndralama yi rutago yabune ndralama?

¹³Iyo yi di nyi hakha, khiyo: “Kha wu giti ginani egi?” Eni nyi di hakha kheni kha nyi giti mune wangu.

¹⁴Khavbo avbo, iyo yi di nyi embela, khiyo: “Ava khu vama va vavili va todzidwego mafura gasi gu thumela Pfhumu nya litigo latshavbo.”