Read gitonga Zakariya 5 Bible Online

Zakariya 5 - gitonga bible

Zakariya 5

¹Nyi di khusa gambe maho, nyi di wona libhuku na li gu vbuvba.

²Ngilozi yi nga bani yi ganela ni eni, yi di nyi wudzisa, khiyo: “Ginani u gi wonago?” Eni nyi di yi hakha, kheni: Nya gu wona libhuku li vbuvbago; li gu ni magumavili mikono gulapha gwaye, ni likhumi mikono guanama.

³Khavbo avbo, yi di nyi embela, khiyo: “Egi khu givalo gi na dugago tigoni gwatshavbo; kholu ni wevbini muthu a gu mbafa a na tutumiswa tigoni khu tshivba nya givalo gyogyo, kharato gambe muthu watshavbo a sambanyago malipha khu lina langu, a na rinywa khigyo vbavbandze.”

⁴PFHUMU Nungungulu nya Tshivba Yatshavbo, a di ganela, khuye: “Eni nyi na gi tshula givalo gegi gasi gi fela gu bela nyumbani nya mbafa ni nyumbani ga wule a sambanyago malipha khu lina langu; gambe gi na simama gu khala wutshigu watshavbo nyumbani gwaye kala gi pfhungumula misimbo ni siwindri saye.”

⁵Gu di duga ngilozi yi nga bani yi gu ganela ni eni yi nyi embela, khiyo: “Olu, khusa maho yago u wona ginani igyogyo gi dugelelago.”

⁶Eni nyi di wudzisa, kheni: “Gasi ginani egi?” Iyo yi di nyi hakha, khiyo: “Owu pimo nya liphanga wu dugago.” Aholu yi di engedza gambe, khiyo: Umo nya pimo wowo, womo wuvivbi, wu fananago ni vathu vatshavbo va tigoni.

⁷Khavbo avbo, gu di funungudwa gifenengedzo nya thovhu; nyi di wona nyamayi na khade ndrani nya pimo nya liphanga.

⁸Iyo yi di, khiyo: “Ogu khu guvivba.” Yi di reda nyamayi a bela gambe umo nya pimo, yi sega gambe khu gifenengedzo nya thovhu.

⁹Nyi di khusa maho nyaluphye, nyi di wona vanyamayi vavili na va gu vbuvba; phuvbo yi di tadza mambapi yawe, kholu va diri ni mambapi nya nga nya kalahoni; va di khusa pimo va gwela navo ndrengelengeni.

¹⁰Nyi di wudzisa ngilozi yi nga bani yi ganela ni eni, kheni: “Gasi pimo va gu hongola nawo hayi?”

¹¹Iyo yi di nyi hakha, khiyo: “Avo va guya wu vbahela nyumba tigoni ga Sinari, na va vbedzide gu vbaha nyumba, va na lulamisela umo wulanga waye, va wu handzega avbo.”