Read gitonga Zakariya 8 Bible Online

Zakariya 8 - gitonga bible

Zakariya 8

¹Hwane nya ugo, PFHUMU Nungungulu nya Tshivba Yatshavbo, a nyi embede magana yaya, khuye:

²PFHUMU Nungungulu nya Tshivba Yatshavbo a ngu ganela kharati, khuye: “Khu kotani gwago uwe Siyoni, nyi ngupwa likhulo nya likhongolo ngudzu li khondrago monyoni gwangu, li nyi wusela wufu ni khorodza nya yikhongolo ngudzu.”

³PFHUMU Nungungulu a ngu ganela kharati, khuye: “Nyi na bwelela Siyoni, nyi ya vbanya vbakari nya lidhoropa la Jerusalema; Jerusalema gu na ranwa lidhoropa nya lisine, ni gigomo gya PFHUMU Nungungulu nya Tshivba Yatshavbo gi na ranwa gupwani Gigomo nya Guage.”

⁴PFHUMU Nungungulu nya Tshivba Yatshavbo a ngu ganela kharati, khuye: “Gu nga na gu manega mitendrelani ya Jerusalema sikhosane nya vama ni vanyamayi, moyo ni moyo na pharide mandzani gwaye, ndronga nya tshetengelo, khu kota nya guandre nya matshigu yawe nya guvbanye;

⁵Dzindzilani nya lidhoropa gu na tala khu sanana nya sikhwathana ni sagadzyana, si hagana umo.”

⁶PFHUMU Nungungulu nya Tshivba Yatshavbo, a ngu ganela kharati, khuye: “Silo sesi a gu bani nari sa gusamadzisa guwonani ga mitshaledwa nya vathu vava khu matshigu yoyo, si na khala gambe gisamadziso mahoni gwangu, gani?” A ngu ganela PFHUMU Nungungulu nya Tshivba Yatshavbo.

⁷PFHUMU Nungungulu nya Tshivba Yatshavbo a ngu ganela kharati, khuye: “Wonani gukhenu nyi na vbulugisa vathu vangu nyi va dusa ga mayigo ya Khugadambo ni ga mayigo ya Muhwadambo;

⁸nyi na va resa, va ta khala vbakari ga Jerusalema; va na bani vari vathu vangu, Eni neni nyi na bani nyiri Nungungulu wawe khu lisine ni gululama.”

⁹PFHUMU Nungungulu nya Tshivba Yatshavbo a ngu ganela kharati, khuye: “Enu mwatshavbo mu pwidego khu matshigu yaya magana ma dugelago khu maganani ga vaprofeti, va nga bani va romo litshiguni gu tsitsidwego siseketelo, gasi guvbaha Nyumba ya PFHUMU Nungungulu nya Tshivba Yatshavbo, tiyisani magana yanu.

¹⁰Kholu na gu si gu vbohi matshigu yaya, mwalo ni moyo a nga bani a gu hakha nivbo nya thumo waye a nga bani a wu thuma, ambari ni thumo nya sirengo wu di si phasi gilo; gambe gu diri mwalo gurula ni gutangala ga vale va nga bani va dzi ningedzela mithumoni gwawe khu kotani ga nala; nyi di kutsedzela gu, moyo ni moyo a wugela muthu kwawe.

¹¹Aholu, olu kha nyi na nga phara gambe vathu vava kha nga matshiguni ya gale, a ngu ganela PFHUMU Nungungulu nya Tshivba Yatshavbo.

¹²Kholu mbewu yi na andra, lithembwe nya miuvha li na ninga mihandro yaye, mafu ma na ninga dzimbewu, ni ndzadzi yi na tshisa thondrwane yaye; nyi na gira gu mitshaledwa nya vathu vava va hakhe satshavbo sesi kha nga thomba.

¹³Kha nga mu nga bani muri givalo vbakari nya mayigo, enu linyumba la Judha ni Israyeli, kharato gambe olu nyi na mi vbanyisa gasi mu khale gikategiso; mu nga thavi, tiyani longo.”

¹⁴Kholu PFHUMU Nungungulu nya Tshivba Yatshavbo a ngu ganela kharati, khuye: Kha nga olu Eni nyi nga bani nyi pimiside gu mi girelani guvivba, gikhati vababe vanu va nga nyi wusela likhulo langu, nyamba bwelela hwane nyi dzi laya, a ngu ganela PFHUMU Nungungulu nya Tshivba Yatshavbo;

¹⁵kharato gambe olu, ga matshigu yaya, nyi na tumbisa gu girela wuwadi Jerusalema ni nyumba ya Judha; mu nga thavi.

¹⁶ Upwani silo mu yelago gu si landrisa, khesi: Ganelani lisine, muthu ni muthu ga muthu kwawe; girani gululama gu gu ni lisine gu resago gurula dzinyangwani gwanu;

¹⁷ni moyo wanu a nga pimisi guvivba monyoni gwaye, mu wugelana khu gyanu, ambari gusambanya malipha; kholu Eni nyi ngu si nyenya satshavbo soso; a ngu ganela PFHUMU Nungungulu.

¹⁸PFHUMU Nungungulu nya Tshivba Yatshavbo, a di nyi embela, khuye:

¹⁹PFHUMU Nungungulu nya Tshivba Yatshavbo a ngu ganela kharati, khuye: “Guhala nya ngima nya wu na mwendro nya livbandre, nya livbandre na mivili ni owu nya likhumi, gu na vbindrugedza gu khala matshigu nya gutale khu gunengela, buzo nya gutsake ga vathu va Judha. Khu guralo golani lisine ni gurula.”

²⁰PFHUMU Nungungulu nya Tshivba Yatshavbo, a ngu ganela kharati, khuye: “Ma nata nyaluphye mahundzu ma vbanyago madhoropani nya gutale,

²¹vathu va vbanyago ga lidhoropa nya gukari va na endra va hongola ga limbe lidhoropa, na va gukhavo: Hongoleni khu guvbiredza hi ya lombelela ga PFHUMU Nungungulu nya Tshivba Yatshavbo, eni neni nyi na hongola nago hi ya vbweta PFHUMU Nungungulu nya Tshivba Yatshavbo.

²²Mahundzu nya gutale ni mayigo nya tshivba ma nata ma ta vbweta PFHUMU Nungungulu nya Tshivba Yatshavbo dhoropani ga Jerusalema, gasi guta lomba gikategiso ga PFHUMU Nungungulu.”

²³PFHUMU Nungungulu nya Tshivba Yatshavbo a ngu ganela kharati, khuye: “Ga matshigu yoyo, likhumi vama nya gute khu mafumbu yatshavbo nya malimi ma ganedwago khu vathu nya mayigo, va na phara tshoka nya mwendra wa moyo nya Mujudha nya gukari, va mu embela, khavo: Ethu ha guvbweta gu hongola gumogo nanu, kholu hi pwide gupwani Nungungulu womo gwanu.”