Read gitonga Malakiya 2 Bible Online

Malakiya 2 - gitonga bible

Malakiya 2

¹Gasi olu, nayo yoyu wa gu lumba enu vaphasi nya mhamba,

²Mwa gumba nyi yingisani khu githawo, ni gumba khathala khu gu rungudza lina langu, nyi na resa givalo avbo gwanu, sikategiso sanu nyi na si vbindrugedza si khala givalo; givalo gegi gi tadzisegide, kholu, enu kha mu khathali khu silo sesi. A ngu ganela PFHUMU Nungungulu nya Tshivba Yatshavbo.

³Nyi na tsayisa situgulwana sanu, nyi gwiringela khovbeni gwanu, swanyi nya sirengo mu nyi luvago khiso, mu na dzudzugwa vbavbandze gumogo ni swanyi nya mibuzo yanu.

⁴ Khu guralo, mu na dzitini nya gukhenu eni nyi mi rumedeni nayo yoyu, khu gu tiyisa gidzumeledzwano gyangu ni Levhi, a ngu ganela PFHUMU Nungungulu nya Tshivba Yatshavbo.

⁵ Gidzumeledzwano gyangu naye, a diri gya womi ni gurula, nyi di mu ninga gu gasi a nyi ninga githawo. Uye a di nyi ninga githawo a bwelo khavbo a ndrendremela khu kotani nya lina langu.

⁶Khanani gwaye gu diromo nayo nya lisine, khu kanani gwaye, gima kha ga nga duga silo nya guvivbe; nyi di gimbila naye khu gurula ni gululama a di ndreyisa nya vangi ndzilani nya guwegele.

⁷Kholu likana la muphasi nya mhamba, li fanede gu sayisa guti, gambe vathu va lirede gupwa nayo khu kanani gwaye, kholu uye ngilozi ya PFHUMU Nungungulu nya Tshivba Yatshavbo.

⁸Aholu enu mu di ndreya ndzilani, mu tshunganisa va nya gutala khu sihevbudzo sanu; mu tshungunula gidzumeledzwano nyi giridego ni Levhi, a ngu ganela PFHUMU Nungungulu nya Tshivba Yatshavbo.

⁹Khu guralo, eni neni nyi mi giride vathu nya gunyenyeze ni givalo mbeli ga vathu vatshavbo, kholu mu ngamba gimbila khu dzindzila dzangu, aholu mu gira gihathela gutshamuselani nya nayo wangu.

¹⁰Ina hatshavbothu hi mwalo babe moyo basi, gani? Ina khandruye Nungungulu wa moyo a hi vangidego, gani? Khu ginani hi venganago khu gyathu, hi nyenyezisa gidzumeledzwano gya vakokwe vathu?

¹¹Va na Judha kha va tumbega gilo. Va giride manyala tigoni ga Israyeli ni Jerusalema; kholu va na Judha va nyenyeziside Wulanga nya guage wa PFHUMU Nungungulu, owu a wu golago, kholu a dzeganide ni vanyamayi va khozelago vambe vanungungulu va vbavbandze.

¹²Muthu watshavbo a girago isoso, PFHUMU Nungungulu a na fuvisa vatshavbo avo va mu phasago ni gu mu emela, gumogo ni wule a ningelago siningwa nya miningelo ga PFHUMU Nungungulu nya Tshivba Yatshavbo.

¹³Gomo gambe gumbe guvivba mu gu girago. Mwa gu tadzani khu marongo giluvelo gya Pfhumu, khu gu lila ni gu keta; kholu PFHUMU Nungungulu kha nga gu dzumela gambe gu hakha miningelo yanu, ambari gu hakha khu matsenya ndruwo ya mandzani gwanu.

¹⁴Gambe mu nga gu wudzisana, khenu: “Khu ginani?” Kholu Pfhumu khade fakazi vbakari gwago ni mwangadzi nya wudzaha wago, oyu uwe u ngamba tumbega gwaye, ambari a nga bani ari uye mubangaladzi wago ni nyamayi u hungidego naye gidzumeledzwano nya dzegano.

¹⁵Ina uye kha mi tshanganisa mu khala mili moyo basi khu nyama ni liphuvbo, gani? Sa gu tshamusedwa ginani gupwa muthu moyo basi, a gu vbweta ginani? Uye a di vbweta livelego la vathu va nya gululama; khu guralo, dzi vegedzeni guvbanyani gwanu, a nga manegi ni wa gumba tumbega ga mwangadzi wa wudzahani gwaye.

¹⁶Kholu PFHUMU Nungungulu wa Israyeli, a ngu ganela khuye a ngu venga hulano, ni wule a sihago manyala khu dzingandzu dzaye, a ngu ganela PFHUMU Nungungulu nya Tshivba Yatshavbo. Khu guralo, dzi woneleni guvbanyani gwanu, gasi mu si huli vagadzi vanu.

¹⁷Enu mu reride PFHUMU Nungungulu khu magana yanu; gambe mu nga gu ganela, khenu: “Hi mu reride khu ginani?” Kholu mu ganelago, khenu: Muthu watshavbo a ghohago a ngu golega mahoni ga PFHUMU Nungungulu, ni gukhenu, a ngu nengedziswa khu vathu vovo; mwendro avbo mu wudzisago, khenu: “Womo hayi Nungungulu nya gulamule?”