Read gitonga Matewu 10 Bible Online

Matewu 10 - gitonga bible

Matewu 10

¹Jesu a di rana vapizane, nya likhumi na vavili a gu va ninga tshivba nya gututumise maphuvbo nya guvivbe ni gu hawulugisa madwali ni mafumbu yatshavbo nya dzingumbe.

²Malina yawe khaya: Nya guphele khu Simoni, a ranwago pwani khu Pedro, ni ndriyaye Andreya; Jakobe ni ndriyaye Johane, sanana sa Zebhedhewu;

³Filipi ni Bharitolomewu; Tomasi ni Matewu, mukhuphisi; Jakobe, gyanana gya Alifewu, ni Tadhewu;

⁴Simoni Mukhanani, ni Judha Sikarioti, a gu uye a nga mu ningelago.

⁵Jesu a di rumela ava nya likhumi na vavili, a va leletela, khuye: “Mu nga gimbilelini umo nya mahedheni, gambe mu nga belini dhoropani nya Vasamariya.

⁶Phelani khu gu yela dzinvuta dzi dzimedego dza nyumbani ga Israyeli.

⁷Gimbilani na mu gu huwelela, khenu: ‘Wufumu wa Ndzadzini womo vbafuvbi.’

⁸Hawulugisani vadwali, wusani va nya gufa; agisani va nya sokono ni gu tutumisa maphuvbo nya guvivbe. Mu ningidwe mahala; ningelani nenu mahala.

⁹Mu nga pharini dzitsapawu nya ndralama, mwendro nya parata, mwendro nya sugu dziborisani gwanu;

¹⁰mu nga pharini mirava nya dzimbuva, mwendro dzingandzu dzimbili, silato ni ndronga; kholu githumi gi na ni fanelo nya gu hodziswe.

¹¹Ni levbi lidhoropa mwendro talala mu na gu belago, vbwetani guti mwendro womo muthu nya gutumbege a gu ni fanelo. Khalani ndrangani gwaye kala mu gu vbindra.

¹²Ndrangani mu na gu belago, va loseni.

¹³Ndranga yoyo ya gu bani yiri ni fanelo, gurula gwanu gu na khale avbo; aholu ya gu bani yiri mwalo fanelo, gu na bwelele gwanu.

¹⁴Gasi avbo va na gumba mi hakha, mwendro gumba hakhwa mahungu yanu, mwa gu duga khu ndrangani momo, mwendro dhoropani momo, phuphuthani kudzudzwane wa migondroni gwanu.

¹⁵Khu lisine nyi ngu mi embelani, kheni litshigu nya gulamudwe, lidhoropa lolo li na dayiswa guvbindra Sodhoma ni Ghomora.

¹⁶“Wonani, nya gu mu rumelani kha nga dzinvuta vbakari nya masolwa; khu kharato, gengelani kha nga dzinyoga; mu rula kha nga matuva.

¹⁷Gwadigwadi ni vathu! Va na mi yisani miphathani nya gulamudwe, va mi kwamula mudzinyumbani gwawe nya nombelo;

¹⁸mu na yiswa mbeli ga vafumeli ni dzipfhumwana khu kotani yangu, mufela guya fakaza mahoni gwawe ni mahoni nya mahedheni.

¹⁹Aholu, mwa gu ningedwani, mu nga dzi garadzi khiso mu na guya ganelago ni maganelelo yakone; kholu gikhati gyogyo mu na embedwa igyo mu na ganelago.

²⁰Kholu khandrenu mu na ganelago, aholu Liphuvbo la Babe wanu khilo li na mi ganelelago.

²¹ Ndruye a na songa ndriyaye; babe a songisa mwanaye; sanana si na wugela vavelegi si va songa.

²² Gasi enu mu na zondrwa khu vatshavbo khu kotani nya lina langu. Aholu uye a na tsaramago kala mahegiso a na vbanyiswa.

²³Mwa gu tutumiswa dhoropani momo nya gukari, thavelani ga limbe. Kholu khu lisine nyi ngu mi embelani, kheni: Kha mu na vbedza gu dzuwulugela madhoropa ya Israyeli na si gu vbohi Mwamana wa Muthu.

²⁴ “Mupizane kha vbindri muhevbudzi waye, ni githumi kha gi vbindri mune waye.

²⁵ Gu enede ga mupizane a gu dzi kodza gu fanana ni muhevbudzi waye, ni githumi gu godza mune waye. Ambari nya gukhuwe khu mune ndranga va nga mu vala khavo khuye Bhelizebhu, va na khavo ginani khu ngamo yaye?

²⁶ “Khu kharato, mu nga thavi gilo, kholu gi mwalo gi nga fenengedzwago gi na gumba funungudwa; kha nga gambe, mwalo sihalo wu na gumba tidwa.

²⁷Iso nyi mi embelago mugidemani, si tiviseni safani nya mihani; niso muyago khu gu lembedwa, si pwadzeni khu vbatshani nya dzinyumba.

²⁸Mu nga thavi avo va songago givili, na va si kodzi gu songa hefemulo. Thavani, uye a dzi kodzago gu rinya givili ni hefemulo phalani nya nilo.

²⁹Ina kha si ngu rengiswa sinyoni sivili khu kinyeta mweyo basi, gani? Ambari ulo gimwalo ni gimwegyo gi thegago vbavbatshi nyamba dzumedziswa khu Babe wanu!

³⁰Ambari ni ndzudzu wa hungoni gwanu wu valedwe watshavbo!

³¹Khu kharato, mu nga thavi gilo kholu mu ngu phasa ngudzu guvbindra sinyoni nya singi.

³²“Khu kharato, watshavbo uye a nyi dzumelago vbakari nya vathu, nyi na mu dzumela neni mahoni ga Babe wangu a guromo Ndzadzini.

³³ Gasi uye a nyi dangago vbakari nya vathu, nyi na mu danga neni mahoni ga Babe wangu a guromo Ndzadzini.

³⁴“Mu nga pimisi nya gukhenu nyi di resa gurula mafuni; kha nya resa gurula, aholu nyimbi.

³⁵Kholu nyi dzude nyita hambanisa mwamana ni babe waye, nyamahegyane ni mayi waye, ngadzamwane ni mayinasale waye.

³⁶ Khu kharato, valala nya muthu va na dugela muvalongoni gwaye.

³⁷“Uye a golago babe mwendro mayi guvbindra idzo a nyi golago khidzo, kha nyi faneli. Ni uye a golago mwanaye nya gikhwathana mwendro nya gyagadzyana guvbindra idzo a nyi golago khidzo, kha nyi faneli.

³⁸Uye a si rwaligo gihambano gyaye a nyi landra, kha nyi faneli.

³⁹ Uye a zamago gu vegedza womi waye, a na dzimeledwa khuwo, ni wule a na gu dzimedzago womi waye khu kotani yangu, a na wu mana.

⁴⁰ “Uye a mi hakhago, kheni a nyi hakhago; gasi uye a nyi hakhago a ngu hakha Wule a nga nyi rumelago.

⁴¹Uye a hakhago muprofeti kha nga muprofeti, a na hakha tshatshazelo nya nga ya muprofeti; uye a hakhago muthu nya ndruda khu gukhuye muthu nya ndruda, a na hakha tshatshazelo nya nga ya muthu nya ndruda.

⁴²Uye a ningago khokho nya mati nya gudzidzile ga moyo nya vapizane vangu nya gusolege, khu gu muti nya gukhuye mupizane wangu, khu lisine nyi ngu mi embelani, kha na dzimeledwa khu tshatshazelo.”