Read gitonga Matewu 11 Bible Online

Matewu 11 - gitonga bible

Matewu 11

¹Na vbedzide gu ninga sileletelo sesi ga vapizane vaye nya likhumi na vavili, Jesu a di khuga khu vbale, gasi gu gimbila a hevbudza madhoropani gwawe.

²Johane, khu pasoni, a dipwa ndruma nya sigiro sa Kristo. A di rumela vapizane vaye, gasi guya mu wudzisa, khavo:

³“Khuwe wule a vbwetago guta, mwendro hi nga gu lindrela mumbe?”

⁴Jesu a di va hakha, khuye: “Indrani muya tivisa Johane iso mu nga si pwago ni gu si wona:

⁵Sikhumu si ngu wona, sikhurubwa si ngu gimbila, va nya sokono va ngu agiswa, sivbwiri si ngu pwa, vafi va ngu wuga, Mahungu nya Yadi ma ngu hevbudzwa sisiwana.

⁶Kategide saye wule a si khunguvanyiswigo kheni.”

⁷Na va hongode, Jesu a di phela gu embela gidzemo khu mahungu ya Johane, khuye: “Ginani mu ngaya gi wona giwulani? Tshava nya gu hanahaniswe khu phuvbo?

⁸Gasi ginani mu ngaya gi wona? Muthu nya guambale sombo nya gumbure? Avo va ambalago sombo nya gumbure va gu dugela mudzindrangani nya wufumu.

⁹Gasi ginani mu nga ya gi wona, na? Muprofeti? Ina. Khidzo nyi mi embelago, guvbindra ni muprofeti.

¹⁰ Khuye oyu a thudwago khu Milowo, gupwani: ‘Nyi na thangisa mbeli gwago mwango wangu, gasi guya gu dongisela ndzila yago.’

¹¹Khu lisine nyi ngu mi embelani, kheni: Vbakari nya vathu vatshavbo va velegidwego khu nyamayi, mwalo a gu khongolo guvbindra Johane mubhapatisi. Aholu muthu nya mahegisela Mufumoni wa Ndzadzini khongolo gu mu vbindra.

¹²Gukhugela matshiguni ya Johane Mubhapatisi kala muhuno, Mufumo wa Ndzadzini wu ngu dwanedwa khu tshivba ni tshivba. Avo va gu ni tshivba va guya gu khu gu wu wandra.

¹³ Kholu vaprofeti vatshavbo ni Nayo va di hevbudza kala gu vboha Johane.

¹⁴ Mwa guvbwetani gu khodwa, dzitini nya gukhenu uye khuye Eliya a nga bani a gu vbweta guta.

¹⁵Uye a gu ni dzindzeve nya guyingise, a napwe.

¹⁶“Aholu nyi na va fananisa ni mani vathu nya mela yoyu? Va ngu fanana ni sanana sile nya gu, na siromo mitendrelani, si ganedzisana, khiso:

¹⁷‘Hi wombide sitoliyo, kha mwa hana! Hi embide dzindzimo nya wusiwana, kha mwa lila!’

¹⁸Dzude Johane Mubhapatisi, a si hodzigo gilo ni gu sela wadwa, mwari, khenu: ‘A na ni liphuvbo nya guvivbe!’

¹⁹Dzude Mwamana wa Muthu, a hodzago ni gu sela, mwari, khenu: ‘Na ni limidzo, bewudzi, pari nya va khuphisi ni sighohi!’ Aholu guti gwa gu dzi yeyedza khu mithumo yaye.”

²⁰Khavbo avbo, a di phela gu hembulula madhoropa yale a nga girago umo siliwugiso saye nya singi, khu gumba vbindrugedza gwawe, khuye:

²¹“Libango lago, Khorazini! Libango lago, Bhetisayidha! Kholu nari pwani Tiro ni Sidhoni va di wonide siliwugiso nya nga iso mu nga si wonago enu, na va dzi vbindrugedzide gale khu gu ambala dzisaku ni gu phorola nguma.

²² Khu kharato, nyi ngu mi embelani, kheni: Litshigu nya gulamudwe, gu na vbevbugisedwa Tiro ni Sidhoni guvbindra enu.

²³ Ahati uwe, Kafarinawume! U na dzi khusedza kala Ndzadzini, gani? U dzi pembide, u na rinywa phalani nya nilo, kholu, nari gupwani siliwugiso si nga girwago mahoni gwago si di giredwe tigoni ga Sodhoma, nolu litigo lolo na li nga romo.

²⁴ Ambari ulo nyi ngu mi embelani, kheni: Litshigu nya gulamudwe, gu na vbevbugisedwa Sodhoma guvbindra uwe.”

²⁵Gikhati gyogyo, Jesu a di khusa lito, khuye: “Nyi ngu gu rungudza, Baba, Pfhumu nya ndzadzi ni mafu, kholu u sihede va nya guti ni va nya gugengela silo sesi, u si yeyedza ga va nya gusolega.

²⁶Ina, Baba, kholu khidzo si nga gu nengedzisago khidzo.

²⁷Satshavbo nyi ningidwe khu Babe wangu. Mwalo a mu tigo Mwamana vbavbandze ga Babe ekha, gambe mwalo a mu tigo Babe vbavbandze ga Mwanaye ekha ni wule Mwamana a dzinago gu mu tulela.

²⁸Deluni gwangu, enu mwatshavbo mu garadego ni gu lemedwa; eni nyi na mi hefemudza.

²⁹Rwalani pingwi wangu, mu hevbula kheni nyi gu ni monyo nya gurule nuwo nya gu dzi sodzise, gasi mu mane gutangala nya mihefemulo yanu.

³⁰Kholu sileletelo sangu kha si garadzi, ni pingwi wangu wu vbevbugide.”