Read gitonga Matewu 12 Bible Online

Matewu 12 - gitonga bible

Matewu 12

¹Khu gikhati gile, khu litshigu nya Sabhadho, Jesu a di vbindra khu mahangeni gu nga bani guri ni dzimbewu. Vapizane, khu gu pwa ndzala, va di fanya sivbila va gu hodza.

²Vafarisi, na va wonide esi, va di mu embela, khavo: “Va phelegede vapizane vago gu gira iso si himbedzedwago gu girwa khu litshigu nya Sabhadho!”

³Aholu uye a di va hakha, khuye: “Mu si gu hevbuli iso a nga girago Dhavhidhe, gikhati a nga pwago ndzala, uye ni avo a nga bani ari navo, gani?

⁴Idzo a nga belago khidzo Nyumbani ga Nungungulu, aya hodza sibaba nya miphaso, si nga bani si si faneli gu hodzwa khuye, ni avo a nga bani ari navo, aholu si nga na si gu fanela gu hodzwa basi khu vaphasi nya mhamba, gani?

⁵Mwendro mu si gu hevbuli umo nya Nayo gupwani khu litshigu nya Sabhadho vaphasi nya mhamba va ngu ndraga nayo nya Sabhadho, khu gu thuma Nyumbani ga Nungungulu, va gu khala nyambana gighoho, gani?

⁶Nyi ngu mu embelani nya gukheni avba womo uye a gu khongolo guvbindra Nyumba ya Nungungulu.

⁷ Aholu nari gupwani mu ngu wuti tshamuselo nya mahungu ma gukhayo: Eni nya gu hatha wuhindzi guvbindra mhamba, na mu si ningi nandru avo va gu mwalo nawo.

⁸Kholu mwamana wa Muthu mune nya Sabhadho yinene.”

⁹Na khugide khu vbale a di ya bela nyumbani nya nombelo,

¹⁰umo a nga bani a romo muthu nya guhase libogo. Va di gira giwudziso gegi, gasi gu mana igyo nya gu mu ninge khigyo nandru, khavo: “Ina gu ngu dzumedziswa gu vbanyisa muthu khu litshigu nya Sabhadho, gani?”

¹¹ Aholu uye a di va wudzisa, khuye: “Khu mani, vbakari gwanu, a wonago nvuta yaye na yi thegede namboni khu Sabhadho, a si yigo aya yi nula?

¹²Ina muthu kha phasi guvbindra nvuta, gani? Khu kharato, yomo fanelo nya gugire ogu gu gu gwadi khu Sabhadho.”

¹³Khavbo avbo, a di embela muthu wule, khuye: “Thawuludza gyandza gyago.” A di gi thawuludza, gi hawuluga, gi fanana ni gimbe.

¹⁴Vafarisi, na va dugide khu vbale, va di ya hunga gikungo nya gu mu songe.

¹⁵Jesu, na dzitide, a di khuga khu vbale. Vathu nya vangi va di mu landra. Uye a di vbanyisa vatshavbo,

¹⁶a gu va laya gu va si mu pwadzi.

¹⁷Ma gu tadzisega, kharati, mahungu ya muprofeti Isaya, a nga khuye:

¹⁸“Khigyo egi githumi gyangu, nyi gi hathidego, gigodwa gyangu, igyo gi nengedzisago hefemulo wangu, nyi na gi ninga Liphuvbo langu, gasi gi tivise va nya mayigo khigyo gomo gulamudwa.

¹⁹Kha gi na dwanisa, ambari saye gu gulumela; mwalo a na gu pwago lito laye mudzindzilani.

²⁰Kha gi na vbedzisa gufanya tshava nya gupfharege, ne kha gi na tshima litirisida li nga gu tuvigago, kala gi yisa Nayo waye gupalani.

²¹ Va nya mayigo vatshavbo va na tumba lina laye!”

²²Khavbo avbo, va di mu resela moyo a nga bani ari ni liphuvbo nya guvivbe nari gikhumu, ni wududu. Jesu a di mu hawulugisa, a dzegela gu wona ni gu ganela.

²³Gidzemo gyatshavbo gi di liwuga, khigyo: “Ina khandruye oyu Mwamana wa Dhavhidhe, gani?”

²⁴Aholu Vafarisi, na va pwide esi, va di khavo: “Uye a gu tutumisa maphuvbo nya guvivbe khu tshivba ya Bhelizebhu, khongolo nya maphuvbo nya guvivbe.”

²⁵Na wonide mapimo yawe, Jesu a di va hakha, khuye: “Mufumo watshavbo wu dzi kabanisago khu mitsawa yi wugelana khu gyawe, mufumo wowo kha wu yi danga; lidhoropa latshavbo, mwendro ndranga yi dzi kabanisago khu mitsawa yi wugelana khu gyawe, kha yi dzi kodzi gupindruga.

²⁶Kharati nugo, Sathane a gu wugela Sathane kwawe, a ngu dzi kabanisa abune. Wu na pindruga kharini mufumo waye?

²⁷Nya gu bani nyi tutumisa maphuvbo nya guvivbe khu tshivba ya Bhelizebhu, ahati sanana sanu sa gu ma tutumisa khu tshivba ya mani? Khu kharato, avo va na bani vari valamuli vanu.

²⁸Aholu nya gu bani nyi tutumisa maphuvbo nya guvivbe khu tshivba nya Liphuvbo la Nungungulu, giyeyedzo nya gupwani Mufumo wa Nungungulu wu mi vbohedeni.

²⁹Nga nyi embelani: Gu kodzega kharini gu muthu aya bela ndrangani nya ndrena a gu yi phanga silo saye satshavbo, nyamba phela khu gu yi hunga? Hwane nya gu bani a yi hungide, khavbo a dzi kodzago gu yi phanga ndranga yaye yatshavbo.

³⁰Uye a si emigo ni eni a ngu nyi wugela; uye a si hengeligo ni eni a ngu phalalegisa.

³¹Khu kharato, nyi ngu mi embelani, kheni: Muthu watshavbo a ngu dzi kodza gu tsetseledwa sighoho ni guvivba gwatshavbo a gu ganelago. Aholu uye a hembululago Liphuvbo nya Guage gima kha na tsetseledwa.

³² Uye a valago Mwamana wa Muthu a na tsetseledwa; gasi uye a valago Liphuvbo nya Guage kha na tsetseledwa, ga gikhati gegi ambari ni ga igyo gi nga gutago.

³³ “Kha nga mu dzitigo, simbo nya wadi wa gu velega mihandro nya yadi; gasi uye nyambasi wadi wa gu velega mihandro nyamba yadi. Khu kharato, simbo wa gu tidwa khu mihandro yaye.

³⁴Enu livelego nya dzinyoga, mu na dzi kodza kharini gu ganela silo nya sadi, olu mu vivbedwego khu myonyo? Kholu likana la gu dusa iso si tadego monyoni.

³⁵Muthu nya wadi a gu dusa silo nya sadi sa thombani gwaye nya yadi; gasi uye a vivbidego, a gu dusa silo nya guvivbe sa thombani gwaye nya guvivbe.

³⁶Kholu eni nyi ngu mi embelani, kheni: Magana yatshavbo nyamba yela vathu va ma ganelago va na ma livba litshigu nya gulamudwe.

³⁷Kholu muthu watshavbo a na lamudwa khu magana yaye; nandru nuwo a na wu mana khu magana yaye.”

³⁸Khavbo avbo, va di duga Vafarisi ni vahevbudzi nya Nayo va nga mu lombago, khavo: “Muhevbudzi, ha gu vbweta gukhethu u hi girele giwoniso gimwegyo, gasi hi gi wone.”

³⁹Uye a di va hakha, khuye: “Mela nya vathu nya guvivbedwe khu monyo ni wuphuphulu mwa guvbweta giwoniso; gimwalo gimbe giwoniso mu na gu ningwago, vbavbandze nya giwoniso gya muprofeti Jona.

⁴⁰ Kha nga Jona a nga khalago girumbuni nya nyatudwi matshigu mararu wutshigu ni mihani, kharato nuye Mwamana wa Muthu a na khala vbavbatshi nya mafu matshigu mararu wutshigu ni mihani.

⁴¹ Khu litshigu nya gulamudwe Vaninivha va nata ema gumogo ni mela yoyu, va wu wugela, va wu ninga nandru, kholu avo va dzi vbindrugedzide gikhati va nga tshumayedwago khu Jona. Avba womo uye a gu khongolo guvbindra Jona!

⁴² Pfhumugadzi ya Marandzi yi na wugela mela yoyu, yi wu ninga nandru. Kholu yi dzude khu mahegiso nya litigo, gasi guta pwa guti ga Solomoni. Avba womo uye a gu khongolo guvbindra Solomoni!

⁴³“Liphuvbo nya guvivbe la gu duga khu ga muthu la gu legalega ni giwula, li gimbila li guvbweta wulanga nya guhefemule, li wu hamuga.

⁴⁴Khavbo avbo, la gu ganela, khilo: ‘Nyi na bwelela nyumbani gwangu, mule nyi nga dugago khumo.’ Na li wide lita yi mana na yiri liphanga, na yi vbiyedwe gwadi, ni gu dongisedwa satshavbo,

⁴⁵la gu dzega mambe livbandre na mavili maphuvbo nya guvivbe guvbindra ilo, mata bela nyumbani momo ma khala yatshavbo. Khavbo avbo, mavbanyelo nya muthu yoyo ma gu nyenyeza guvbindra idzo a nga bani a romo khidzo guhegulani. Khiso esi si na dugelelago mela yoyu nya guvivbedwe khu monyo.”

⁴⁶Na nga guganela vbakari nya gidzemo, a di vboha mayi Waye ni vandriyaye, va ngata khalago khu vbavbandze, na va vbweta gu ganela naye.

⁴⁷Moyo wawe a di mu embela, khuye: “Mayi wago ni vandriyago vomo vbavbandze; va guvbweta gu ganela nago.”

⁴⁸Aholu Jesu a di phindrula uye a nga mu tivisago, khuye: “Khu mani mayime wangu ni vandriyangu?”

⁴⁹A di khusa libogo a nonedza vapizane vaye, khuye: “Mayi wangu ni vandriyangu kha mu va woni ava.

⁵⁰Kholu, watshavbo uye a girago guhaladza ga Babe wangu a guromo Ndzadzini, khuye a gu ndriyangu ni mayi wangu.”