Read gitonga Matewu 15 Bible Online

Matewu 15 - gitonga bible

Matewu 15

¹Khavbo avbo, vafarisi nya gukari ni vahevbudzi nya Nayo va nga bani va dzude khu Jerusalema, va dita ga Jesu vata mu wudzisa, khavo:

²“Khu ginani vapizane vago va si landrisigo tumbunugo wa gale, olu va hodzago nyamba hamba mandza?”

³Gasi Jesu a di va wudzisa, khuye: “Ahati enu, khu ginani mu si landrisigo nayo wa Nungungulu khu kotani nya tumbunugo wanu?

⁴Kholu, Nungungulu layide, khuye: ‘Rungudza babe ni mayi’, ni gukhuye: ‘Uye a hembululago babe waye, mwendro mayi waye, fanede gu songwa.’

⁵Gasi enu mwari, khenu: ‘Ni wevbini uye a embelago babe waye, mwendro mayi waye, khuye: Iso nyi nga bani nyi fanede gu gu phasa khiso si phasedwe ga Nungungulu’,

⁶muthu yoyo tshulegide mahoni gwanu. Mwalo gambe giguruvedzo nya guphase babe mwendro mayi waye. Mu tshipisa, kharati, nayo wa Nungungulu khu kotani nya tumbunugo wanu.

⁷Vapfhadzi! Khidzo kharati a nga profetago khidzo Isaya na gu thula enu, khuye:

⁸Vathu vava va gu nyi rungudza khu likana, aholu myonyo yawe yomo hwindzo ni eni.

⁹ Milombelo va nyi girelago khya malipha, kholu milayo va hevbudzago khya vathu.”

¹⁰Khavbo avbo, a di rana gidzemo, gasi gi hidzimele gwaye. A di gi embela, khuye: “Nyi yingiseni, gasi mu si pime gwadi.

¹¹Khandri gile gi belago khu kanani gi nyenyezisago muthu, aholu igyo gi dugago khu kanani gwaye khigyo gi mu nyenyezisago.”

¹²Vapizane vaye va di mu yela vaya mu embela, khavo: “Ina u ngu dziti nya gukhuwe Vafarisi va gorogide khu maganelelo yale u nga ganelago khayo, gani?”

¹³Uye a di va hakha, khuye: “Simbo watshavbo wu ngamba yadwa khu Babe wangu a guromo Ndzadzini wu na sigudwa.

¹⁴Va digeni; sikhumu si vbwetago gu phara kunga sikhumu sikwawe! Kholu gikhumu gya guvbweta gu phara kunga gikhumu gikwawe, sa sivili si ngu ya thegela phalani.”

¹⁵Pedro a di khusa lito, khuye: “Hi tshamusele gipimaniso gegi.”

¹⁶Jesu a di mu hakha, khuye: “Gasi enu nenu mungari ni mihungo nya gulemele?

¹⁷Ina kha mu dziti nya gukhenu gyatshavbo igyo gi belago khu kanani gya gu hongola kala gisusuni, gi hegisa khu gu duga vbavbandze khu ndzila yaye, gani?

¹⁸Gasi gyatshavbo igyo gi dugago khu kanani gya guta khu monyoni; egi khigyo gi nyenyezisago muthu.

¹⁹Khu monyoni ma ngu duga mahingigedzo nya guvivbe, wughevenga, wubhayi, wuphuphulu, wuvafa, gusingedza ni magana yatshavbo nya guhembulule Nungungulu.

²⁰Esi khiso si nyenyezisago muthu. Gasi gu hodza nyamba hamba mandza, isoso kha si nyenyezisi muthu.”

²¹Jesu a di khuga khu vbale a gu hongola phuvbo ga Tiro ni Sidhoni.

²²Khavbo avbo, nyamayi moyo nya mukhanani, a nga bani a guta khu phuvbo ga iyoyo, a di phela gu gulumela, khuye: “Pfhumu, Mwamana wa Dhavhidhe, nyi pwele wusiwana. Nyamahegyane wangu a ngu saniswa ngudzu khu liphuvbo nya guvivbe.”

²³Aholu uye kha mu hakha gilo. Vapizane va di ya ga Jesu, vaya mu lomba, na va mu khongotela, khavo: “Mu embele, a hongole, kholu a ngu hi gulumela.”

²⁴Uye a di va hakha, khuye: “Eni nyi di rumedwa guta vbanyisa basi dzinvuta dzi dzimedego dza Israyeli.”

²⁵Aholu nyamayi wule a dita khidzima migondroni gwaye, khuye: “Nyi phase, Pfhumu.”

²⁶Uye a di mu hakha, khuye: “Khandri gwadi gu dzega guhodza nya sanana u ninga simbwana.”

²⁷Nyamayi a di khuye: “Khidzo u ganelago, Pfhumu. Aholu dziti nya gukhuwe simbwana si ngu roledzela dzitshetana dzi thegelago khu vbamezatunu ga vamune ndranga.”

²⁸Khu kharato, Jesu a di mu hakha, khuye: “Nyamayi, gukhodwa gwago gukhongolo! Gu na girege kha nga guhaladza gwago.” Gukhugela gikhati gile nyamahegyane waye a di hawuluga.

²⁹Na khugide khu vbale, Jesu a di hongola vbafuvbi ni phwani gwa Galileya, a gwela gigomoni aya khala iyo.

³⁰A di tedwa khu vathu nya vangi ngudzu, va mu resela sikhurubwa, silima, sikhumu, sidudu ni vambe vadwali, va ta va vega migondroni gwaye. Uye a di va hawulugisa vatshavbo.

³¹Vathu vale va di liwuga khu gu wona sidudu na si gu ganela, silima na si gu gimbila gwadi na si lulamide, sikhurubwa na si gimbila, sikhumu na si gu wona. Va di dhumisa Nungungulu wa Israyeli.

³²Jesu, na ranide vapizane vaye, a di va embela, khuye: “Nyi ngu pwa gisiro khu vathu vava, kholu va na ni matshigu mararu na nyiri navo, nyamba hodza gilo. Kha nyi vbweti gu va diga va hongola nyamba hodza gilo, va nga rereka ndzilani.”

³³Vapizane va di mu phindrula, khavo: “Hi na va ninga ginani va hodza giwulani momu nyambana ndranga, olu a gu vathu va tadego kharati?”

³⁴Jesu a di va wudzisa, khuye: “Sibaba singani mu gu naso?” Va di hakha, khavo: “Livbandre na sivili, ni sindzandzyanyana sidugwana.”

³⁵A di ruma vathu vatshavbo va khala vbavbatshi,

³⁶a dzega sibaba sile nya livbandre na sivili ni sindzandzyana sakone, a bonga, a si pilela, a si ningela ga vapizane, vapizane va si kabanisela vathu.

³⁷Vatshavbo va di hodza, va khura, va bwelo khavbo va rolela iso si nga tshalago, va gu tadza livbandre na sivili situndru khu sipandre si nga tshalago.

³⁸Avo va nga hodzago va diri tengo nya magumana mazana (4.000) vathu, nyamba sayela vanyamayi ni sanana.

³⁹Na vbanganide gidzemo, Jesu a di bela ngalavani a gu hongola tigoni ga Magadhani.