Read gitonga Matewu 16 Bible Online

Matewu 16 - gitonga bible

Matewu 16

¹Khavbo avbo, Vafarisi ni Vasadhusi va di mu yela, gasi gu mu linga, va di mu lomba gu a va girele giwoniso gya Ndzadzini.

²Uye a di va hakha, khuye: “Gupfolani nya lidambo, mu ngu, khenu: ‘Wutshigu wa muhuno wu na bani wuri wadi, kholu damboni gufuvide.’

³Na gu ngari dzimindru dzikhongolo, mu ngu, khenu: ‘Muhuno gu na bani guri ni phuvbo, kholu idzo gu fuvidego khidzo damboni gwa gu patedzela ni gusivbala.’ Vapfhadzinu, mu ngu kodza gu tshamusela makhalelo ya damboni, aholu kha mu kodzi gu tshamusela siyeyedzo nya dzinango!

⁴ Mela yoyu nya vathu nya guvivbedwe khu monyo, va si khodwigo, wa gu lomba giyeyedzo! Aholu kha va na ningwa gimbe giyeyedzo vbavbandze nya giyeyedzo gya Jona.” Khavbo avbo, a di va ditsha a khuga a gu hongola.

⁵Vapizane, gikhati va nga tshatugago, va di divala gu dzega sibaba.

⁶Jesu a di va embela, khuye: “Gwadigwadi dzi woneleni ni mela nya Vafarisi nuwo nya Vasadhusi.”

⁷Va di gu wudzisana khu gyawe, khavo: “Mwendro khulo hi nga diga sibaba.”

⁸Aholu Jesu, a nga bani a wona mapimo yawe, a di va embela, khuye: “Vathu nya gukhodwe vbadugwana, khu ginani mu emago dzikhana khu gukhenu kha mwa dzega sibaba?

⁹Mu si gu si pimi iso nyi si thulago? Ina kha mu dundrugi sibaba sile nya livbandre si nga enedzago livbandre magumi mazana vathu, ni tengo nya situndru mu nga tadzago khu sipandre si nga tshalago, gani?

¹⁰Kha mu nga gu dundruga gambe sibaba sile nya livbandre na sivili si nga enedzago magumana mazana vathu, ni tengo nya situndru mu nga tadzago khu sipandre si nga tshalago, gani?”

¹¹Khu ginani mu ngamba tugula nya gukhenu khandri nyi di thula gibaba gikhati nyi nga mi embelani, kheni: Gwadigwadi ni mela nya Vafarisi nuwo nya Vasadhusi.

¹²Khavbo avbo, va di dziti nya gukhavo khandri a di vbweta gukhuye va dzi wonele ga mela nya sibaba; aholu va dzi wonele ga sihevbudzo sa Vafarisi ni Vasadhusi.

¹³Na vbohide tigoni ga Sezareya gwa Filipi, Jesu a di wudzisa vapizane vaye, khuye: “Vathu vari khavo khuye mani Mwamana wa Muthu?”

¹⁴ Va di hakha, khavo: “Vomo va gukhavo khu Johane Mubhapatisi; vambe vari khavo khu Eliya; vambe khavo khu Jeremiya mwendro moyo nya vaprofeti.”

¹⁵Jesu a di wudzisa: “Ahati enu, mwari khenu kheni mani?”

¹⁶ Simoni Pedro a di khusa lito a gu phindrula, khuye: “Uwe khuwe Kristo, Mwamana wa Nungungulu a vbanyago.”

¹⁷Jesu a di mu hakha, khuye, “U kategide, Simoni, mwamana wa Jona, kholu isoso khandri u di tiviswa khu muthu; aholu, u di tiviswa khu Babe wangu a guromo Ndzadzini.

¹⁸Eni neni nyi ngu gu embela, kheni: Uwe khuwe Pedro; vbatshani nya giwindri gegi nyi na vbaha libandla langu. Ni tshivba nya mufumo nya lufu kha yi na li gira gilo.

¹⁹ Nyi na gu ninga dzipfhungulo nya Mufumo wa Ndzadzini; igyo u na gi hungago mafuni gi na hungwa niyo Ndzadzini; igyo u na gi tshulago mafuni gi na tshudwa niyo Ndzadzini.”

²⁰Khavbo avbo, a di laya vapizane vaye gu va si embeli muthu khavo uye khuye Kristo.

²¹Gukhugela litshigu lile, Jesu a di phela gu yeyedza vapizane vaye khuye na ni fanelo nya guhongole Jerusalema aya saniswa ngudzu khu madhota, ni vakhongolo nya vaphasi ni vahevbudzi nya Nayo, a songwa; aholu a na wuga khu litshigu nya wuraru!

²²Pedro a di mu rana khu phuvbo, aya mu kawuka, khuye: “Isoso si nga giregi gwago, Pfhumu! Silo nya nga isoso gima kha si na gu dugelela!”

²³Gasi uye, a di thendregedza, a embela Pedro, khuye: “Leya, Sathane! U womo kha nga mutshunganisi wangu, kholu mapimo yago kha mati khu ga Nungungulu; aholu, khu ga vathu!”

²⁴ Jesu a di embela vapizane vaye, khuye: “Uye a vbwetago gu nyi landrela, a na dzi nyenye wurumba waye, a vbagare gihambano gyaye a nyi landrela.

²⁵ Uye a vbwetago gu vbanyisa womi waye, a na wu luza; gasi uye a luzago womi waye khu kotani yangu, a na wu mana.

²⁶Giphaso muni a gi manago muthu a fumelago litigo rumba, a guhegisa khu gu dzimeledwa khu hefemulo waye? Mwendro saye, ginani muthu a dzi kodzago gu ningela gasi gu dzegisa khigyo hefemulo waye?

²⁷ Kholu Mwamana wa Muthu a nata ni dzingilozi dza Nungungulu, na tade khu gidhumo gya Babe waye, ata ninga moyo ni moyo, tshatshazelo waye gukhedza khu mithumo yaye.

²⁸Khu lisine nyi ngu mi embelani nya gukheni: Vomo hi gu navo avba va na gumba linga lufu, kala va gu wona Mwamana wa Muthu na guta ni mufumo waye.”