Read gitonga Matewu 19 Bible Online

Matewu 19 - gitonga bible

Matewu 19

¹Na vbedzide gu ganela esi, Jesu a di khuga khu Galileya a hongola Judheya, Khisikheyi nya tsongo wa Joridhani.

²A di landrwa khu sidzemo nya singi; uye vbale a di hawulugisa vatshavbo.

³Va dita avbo gwaye Vafarisi va ngata mu wudzisa, gasi gu mu linga, khavo: “Ina gu ngu kodzega gu mwama a hula mwangadzi waye khu gigaradzo nya gukari, gani?”

⁴ Jesu a di va hakha, khuye: “Ina mu si gu hevbulini nya gupwani: Gukhugela guhegulani, Nungungulu a di vanga mwama ni nyamayi, gani?

⁵ Bwelo khavbo a ganela, khuye: Khu kharato, mwama a na diga babe ni mayi aya patana ni mwangadzi waye, va gu khala va vavili nyama mweyo, gani?

⁶Khu kharato, khandri vavili gambe, aholu nyama mweyo basi. Nari kharato, muthu kha dzi kodzi gu tshula egi gi hungidwego khu Nungungulu.”

⁷ Va di wudzisa, khavo: “Khu ginani Mosi a nga rumago gukhuye nyamayi a ningwe lidangalila nya musi gasi gu mu hula?”

⁸Jesu a di phindrula, khuye: “Mosi, a di mi dzumedzisani gu hula vagadzi vanu, khu kotani nya guvivbe nya myonyo yanu; aholu guhegulani khandri kharato.

⁹ Eni nyi ngu mi embelani, kheni: Uye a hulago mwangadzi waye, vbavbandze nya dzegano nya guloledziswe, a gu dzega wa walo, a ngu bhaya, uye a dzegwago khuye a nuye a ngu bhaya.”

¹⁰Vapizane va di mu embela, khavo: “A gu bani ari isoso siguruvedzo nya mwama ni mwangadzi waye, gwadi khu gumba dzega!”

¹¹Jesu a di va hakha, khuye: “Khandri vatshavbo va ma hakhago gwadi mahungu yaya; ma gu hakhwa basi khu vale va gu ni giningwa gyogyo.

¹²Vomo va nga velegwa na va thenidwe, navo va nga ya khu gu thenwa khu vathu vakwawe, navo va nga dzi thenago vabune khu gufela Mufumo wa Ndzadzini. Uye a dzi kodzago gu ma pwisisa, a na ma pwisise!”

¹³Khavbo avbo, va di mu yisela sanana, gasi a si handzege mandza ni gu si lombelela. Aholu vapizane va di si himbedzela.

¹⁴Jesu a di va embela, khuye: “Digani sanana soso, mu nga si himbedzeli guta eno gwangu, kholu khwawe Mufumo wa Ndzadzini.”

¹⁵Na si handzegide mandza, a di phara ndzila yaye a gu hongola.

¹⁶A di yedwa khu lidzaha limwedo li nga ya mu wudzisa, khilo: “Muhevbudzi nya wadi, ginani nya gyadi nyi fanedego gu gira gasi gu mana guvbanya nya gupindruge?”

¹⁷Jesu a di mu hakha, khuye: “Khu ginani u nyi ranago gukhuwe nyi wadi? Moyo basi a gu wadi khu Nungungulu. Aholu wa guvbweta gu mana guvbanya nya gupindruge, landrisa milayo.”

¹⁸ Lidzaha li di mu wudzisa, khilo: “Yevbini?” Jesu a di li hakha, khuye: “U nga songi muthu, u nga bhayi; u nga bi; u nga khali fakazi nya malipha;

¹⁹ rungudza babe ni mayi; gola muthu kwanu kha nga idzo u dzi golago khidzo.”

²⁰Lidzaha li di mu embela, khilo: “Nyi ngu landrisa satshavbo soso gukhugela wananani gwangu; ginani gi nga tshadego?”

²¹Jesu a di mu embela, khuye: “Wa guvbweta gu khala muthu a vbeledego, indra u ya rengisa satshavbo u gu naso, u ninga sisiwana, gasi u mane thomba ya Ndzadzini. Hwane nya isoso, delu uta nyi landrela.”

²²Na li pwide mahungu yaya, lidzaha lile li di hongola na li gutshaniseka monyoni, kholu li diri ni dzithomba nya dzingi.

²³Khavbo avbo, Jesu a di embela vapizane vaye, khuye: “Khu lisine nyi ngu mi embelani, gukheni: Gu na garadza ngudzu ga muthu nya gitetema gu bela Mufumoni wa Ndzadzini.

²⁴Nyi ngu engedza gambe, kheni: Gu vbevbugide guvbindra ngameriya khu vbahogotunu nya tshingano guvbindra gu dzega gitetema gi bela Mufumo wa Ndzadzini.”

²⁵Na va pwide esi, vapizane va di liwuga, khavo: “Kharati, khu mani a na gu vbulugago?”

²⁶Jesu a di khedzisa gwadi vatshavbo, a va embela, khuye: “Ga vathu kha si kodzegi, aholu ga Nungungulu satshavbo si ngu kodzega.”

²⁷Pedro a di khusa lito a mu embela, khuye: “Ethu hi digide silo sathu satshavbo hi gu landra. Libhaso muni hi na gu li manago?”

²⁸Jesu a di va hakha, khuye: “Khu lisine nyi ngu mi embelani: Mufumoni wa Nungungulu, gikhati Mwamana wa Muthu a na khalago vbagikhalotunu gwaye nya gutale khu gidhumo, enu mu na nyi landrela, mu na khalani vbasikhalotunu, gasi gu lamulani mahundzu yatshavbo nya likhumi na mavili ya Israyeli.

²⁹Gasi watshavbo wule a nga digago ndranga, vandruye, nya vama ni vanyamayi, babe, mayi, mwangadzi, sanana ni sipeto khu kotani nya lina langu, a na si mana na si engedzedwe lizana dzinyondro, bwelo khavbo a mana guvbanya nya gupindruge.

³⁰ Nya vangi va nya guphela va na bani vari mahegisela; gasi nya vangi va gu mahegisela va na bani vari va gu phela.