Read gitonga Matewu 2 Bible Online

Matewu 2 - gitonga bible

Matewu 2

¹Na velegidwe Jesu tigoni ga Bhetlehema ga Judheya matshiguni ya mufumeli Herodhi, va di vboha Jerusalema vagengeli va nga bani va guta khu Khugadambo.

²Va di ya wudzisa, khavo: “Mufumeli wa Vajudha a ngarigu gu velegwa, a gu manegela hayi? Hi wonide nyeledzi yaye khu Khugadambo, hi dzude gasi guta mu khozela.”

³Mufumeli Herodhi, na pwide mahungu yaya, a di thuruga, gumogo ni vathu va Jerusalema gwatshavbo.

⁴Na tombaniside vakhongolo vatshavbo nya vaphasi nya mhamba ni vahevbudzi nya Nayo, a di va wudzisa, khuye: “Khu hayini a na gu velegedwago avbo Kristo?”

⁵Va di khavo: “Khu Bhetlehema ga Judheya, kholu khidzo gu nga lowago khidzo khu muprofeti, a nga khuye:

⁶Uwe Bhetlehema, litigo la Judha, khu vbindrwi khu mayigo nya makhongolo ya Judha, kholu muthangeli a na gu thangelago vathu vangu va na Israyeli, a na duga khavbo gwago!”

⁷Khavbo avbo, Herodhi a di ranisa khu gisihaledza vathu vale va nya gugengela, a va wudzisela gwadi gikhati muni gi vbindridego hwane nya gu na va tumbulugedwe khu nyeledzi yile.

⁸A di va rumela Bhetlehema, a va embela, khuye: “Indrani muya vbweta guti gwadi gyanana gyogyo. Mwa gu gi mana, deluni muta nyi embela, gasi eni neni nyi ya gi khozela.”

⁹Na va vbedzide gu yingisa magana ya mufumeli Herodhi, va di phara ndzila yawe. Khavbo avbo, nyeledzi yile va nga yi wona khu Khugadambo yi di wonega mbeli gwawe nyaluphye. Na yi vbohide avbo gi nga bani gi romo gyanana, yi di ema.

¹⁰Na va wone nyeledzi yile, va di tala khu gunengela.

¹¹Va di bela nyumbani, vaya wona gyanana ni mayi waye Mariya; va di khidzima va gi khozela; va di tula sikhwama sawe, va gi luva khu ndralama, khu libani ni mafura.

¹²Na va layidwe khu ndroro gupwa va nga bweleli ga Herodhi, va di bwelela tigoni gwawe khu yimbe ndzila.

¹³Na va hongode, ngilozi ya Pfhumu yi di tumbulugela Josefe khu ndroroni, yi mu embela, khiyo: “Khuga u dzega gyanana ni mayi waye, u thavela Egipito. Indra khala iyoyo kala nyi gu tivise, kholu Herodhi a ngu vbweta gyanana, gasi gu gi songa.”

¹⁴Josefe a di wuga, ni wutshigu wowo, a dzega gyanana ni mayi waye a hongola Egipito,

¹⁵Aya khala iyo kala gufa ga Herodhi. Gu di tadzisega kharati iso si nga ganedwago khu Pfhumu khu ga muprofeti, khuye: “Khu Egipito nyi ranide Mwamana wangu.”

¹⁶Khavbo avbo, Herodhi, na wonide khuye pembidwe khu vagengeli vale, a di goroga ngudzu, a ruma gusongetedwa sanana satshavbo nya sikhwathana sa Bhetlehema ni mayigwana yaye yatshavbo, iso si nga bani si si gu vbindrisi myaga mivili, gu landrisa matshigu a nga embedwago khu vagengeli, gikhati a nga va wudzisago.

¹⁷Gu di tadzisega, kharati, iso si nga ganedwago khu muprofeti Jeremiya, khuye:

¹⁸ “Li di pwala lito tigoni ga Rama, lito nya dzihuwa ni ilo nya gililo: Khu Rakeli a lilago sanana saye; kha vbweti gu khongotedwa, kholu sanana saye si mwalo gambe, si di bhi!”

¹⁹Khavbo avbo, na fude Herodhi, ngilozi ya Pfhumu yi di tumbulugela Josefe khu ndroroni, tigoni ga Egipito, khiyo:

²⁰“Khuga u dzega gyanana ni mayi waye, u gu hongola tigoni ga Israyeli, kholu va fude avo va nga bani va vbweta gu songa gyanana.”

²¹Josefe a di khuga a dzega gyanana ni mayi waye a wuya tigoni ga Israyeli.

²²Aholu, na pwide nya gupwani khu Arkelawo a nga tshikedzago wulanga wa babe waye kha nga mufumeli wa Judheya, a di khala hwanga gu hongola Judheya. Na layidwe khu Nungungulu khu ndroro, a di hongola tigoni ga Galileya.

²³Iyo a ngaya khalago dhoropani ga Nazareta. Gu di tadzisega, kharati, iso si nga ganedwago khu vaprofeti, khavo: “A na ranwa Munazarenu.”