Read gitonga Matewu 20 Bible Online

Matewu 20 - gitonga bible

Matewu 20

¹“Kholu Mufumo wa Ndzadzini wu ngu fanana ni mune ndranga a nga vindrugelago gu gimbila a vbweta vathu nya guta lime thembweni gwaye nya miuvha.

²Na pwane navo gu va livba tsapawu mweyo khu litshigu, a di va rumela thembweni gwaye nya miuvha.

³Na dugide gambe ni mihani a di ya mana vambe va nga bani varomo tendrelani nyamba thuma gilo;

⁴a di va embela, khuye: ‘Indrani nenu muya lima thembweni gwangu, nyi na mi hakhisani tengo wu enelago.’ Avo va di hongola.

⁵A di duga nyaluphye khu gikhati nya livbandre nigyo nya livbandre na gimwegyo, a diya vbweta vambe.

⁶Na dugide gambe khu gikhati nya likhumi na gimwegyo, a di mana vambe na va emide, a va embela, khuye: ‘Khu ginani mu khalago avba litshigu rumba nyamba thuma gilo?’

⁷Va di mu hakha, khavo: ‘Ha gu hamuga muthu nya gu mu thumele.’ A di khuye: ‘Indrani nenu thembweni gwangu mu na hakha iso si vbwetegago.’

⁸ Na li hwide, mune lithembwe nya miuvha a di ruma ghadhi, khuye: ‘Rana sithumi u si hakhisa; phela khavo va nga hegisela gu vboha, u hegisela khavo va nga phela.’

⁹Na va vbohide avo va nga belago ni silambo, muthu ni muthu a di hakhiswa tsapawu mweyo.

¹⁰Va di vboha navo vale va nga phelago khavo gu bela, na va gu alakanya gukhavo mwendro va na hakhiswa guvbindra avo va nga belago hwane gwawe, aholu moyo ni moyo wawe a di hakhiswa nuye tsapawu mweyo.

¹¹Na va hakhide, va di phela gu bhongela mune gipeto, khavo:

¹²‘Ava va nya guhegisela va thumide wora mweyo basi; aholu u va hakhiside idzosaye ni ethu hi nga thumago litshigu rumba na hi dahulekelana khu lihani.’

¹³Mune gipeto a di phindrula moyo wawe, khuye: ‘Kha nyi gu kalaveli gilo, wandruye. Gasi khandri hi di pwana gu gu livba tsapawu mweyo?

¹⁴Ina ka, dzega tsapawu yago u hongole. Nyi gode gu ninga nuye oyu nya mahegisela tengo nya gufanane ni owu nyi nga gu ningago.

¹⁵Ina nyi mwalo fanelo nya gugire iso nyi sinago khu silo sangu, gani? Ina khandri wa gu khala lidiwo khu silo sangu, kholu eni nyi gu wadi, gani?’

¹⁶ Kharati, va nya guhegisela va na bani vari va nya guphela; va nya guphela va na bani vari mahegisela. Kholu vangi va ranwago, aholu sihathwa si dugwana.”

¹⁷Jesu na gu gwela gu hongola Jerusalema, a di rana vale nya likhumi na vavili, a va embela, khuye:

¹⁸“Olu nya gu hongola Jerusalema, iyo Mwamana wa Muthu a naya ningedwago ga vaphasi nya vakhongolo ni ga vahevbudzi nya Nayo, avo va na lamulago gukhavo a songwe,

¹⁹va na mu ningela ga mahedheni va mu vala, va mu kwamula ni gu mu khokhothela vbagihambanotunu. Aholu khu litshigu nya wuraru a na wuga khu ga vafudego.”

²⁰A di hidzimela ga Jesu mayi wa sanana sa Zebhedhewu gumogo ni sanana saye, aya khidzima migondroni gwaye, gasi guya mu lomba gilo nya gukari.

²¹Jesu a di mu wudzisa, khuye: “Wa guvbweta ginani?” Uye a di mu hakha, khuye: “Dzumela gukhuwe, mufumoni gwago, sanana sesi sangu sa sivili, si khale gimwegyo khu nyamudye, gimbe khu nyambade gwago.”

²²Jesu a di mu phindrula, khuye: “Nigyo mu lombago kha mu giti. Ina enu mu ngu dzi kodza gu sela gikombe nya gusaniseke nyi vbwetago gu sela, gani?” Va di khavo: “Ina, hi ngu dzi kodza.”

²³Jesu a di khuye: “Ina khu lisine mu na selani gikombe gyangu; aholu gu khala nyamudye gwangu mwendro nyambade gwangu, kha si tidwi kheni; isoso sa gu lumba vale va dongisedwego khu Babe wangu.”

²⁴Na va pwide esi, vambe vale nya likhumi, va di wugela vandruye vale va vavili.

²⁵Jesu a di va rana, a va embela, khuye: “Kha nga mu dzitigo, vafumeli nya mayigo va gu ma fuma khu tshivba; ni dzindruna dzakone dza gu gola gu tidwa nya gupwani khidzo dzi rumago.

²⁶Gu nga giregi kharato vbakari gwanu. Aholu oyu a golago gu khala khongolo vbakari gwanu, a na khale githumi gyanu.

²⁷Oyu a golago gu khala nari nya guhegule vbakari gwanu, a na khale khumbi yanu.

²⁸Kholu Mwamana wa Muthu nuye kha tela guta thumedwa, aholu guta thumela ni gu ningela womi waye gasi gu dzegisa va nya gutala.”

²⁹Na va gu khuga khu Jeriko, Jesu a di landrwa khu gidzemo nya gingi.

³⁰Avbovbo, sikhumu sivili si nga bani si khade bambe nya ndzila, na si pwide nya gupwani khu Jesu a vbindrago, si di khusedza lito, si gulumela, na si gu lomba, khiso: “Pfhumu, Mwamana wa Dhavhidhe, hi pwele wuhindzi!”

³¹Gidzemo gi di va kawuka, gasi gu va degudza, aholu avo va di mu rana khu tshivba, khavo: “Pfhumu, Mwamana wa Dhavhidhe, hi pwele wuhindzi!”

³²Jesu a di ema a va ranisa. Na va vbohide, a di va wudzisa, khuye: “Mwa guvbweta khenu nyi mi rini?”

³³Va di hakha, khavo: “Pfhumu, ha guvbweta gukhethu maho yathu ma tulege!”

³⁴Na pwide gisiro, Jesu a di va kuha maho. Ma di dzegela gu tulega, va gu mu landra.