Read gitonga Matewu 21 Bible Online

Matewu 21 - gitonga bible

Matewu 21

¹Na va guvbweta gu vboha Jerusalema, na varomo Bhetifage, mugigomoni nya Miolivha, Jesu a di ruma vapizane vavili, khuye:

²“Indrani talalani mule mu gu wonago khavba, mu na ya mana buru na yi hungidwe ni giburwana gyaye. Dzi tshuleni dza dzimbili muta nadzo.

³Uye a mu angulago, mu embeleni, khenu: Khu Pfhumu a dzi vbwetago; a na dzi resa nyamba hwela.”

⁴Esi si giregide gasi gu tadzisega mahungu ya muprofeti, a nga khuye:

⁵ “Embelani nyamahegyane wa Siyoni. Khenu khedza Mufumeli wago, a gu telago khu gurula, na khilede giburwana, gyanana nya buru.”

⁶Vapizane va di ya gira kha nga idzo Jesu a nga va rumago khidzo.

⁷Va di wuya ni buru ni giburwana; va dzi ladzela myendra yawe, gasi Jesu a khala khavbo.

⁸Vathu nya vangi va di ladza myendra ndzilani; vambe va di pila matamo nya misimbo va ma ladza.

⁹Avo va nga bani va thangide mbeli navo va nga bani va guta khu hwane, vatshavbo va di mu kulungela, khavo: “Hosana ga Mwamana wa Dhavhidhe! A na rungudzwe uye a tago linani la Pfhumu! Hosana vbatshani Ndzadzini!”

¹⁰Gikhati Jesu a nga belago Jerusalema, lidhoropa latshavbo li di gira nyenganyenga. Vathu va di wudzisa, khavo: “Khu mani Oyu?”

¹¹Gidzemo gi di hakha, khigyo: “Khu Jesu, muprofeti wa Nazareta gwa Galileya.”

¹²Jesu a di bela Nyumbani ga Nungungulu a tutumisa vatshavbo va nga bani varomo mule va rengisa, navo va nga bani va renga, a gu reda vbavbatshi dzimeza dza va nya dzituruku nidzo nya varengisi nya matuva, a gu va embela, khuye:

¹³“Gu lovidwe, pwani: ‘Nyumba yangu yi na ranwa, pwani nyumba nya nombelo.’ Gasi enu mu yi vbindrugedzide mu yi gira liphala nya dzimbafa.”

¹⁴Ndrani mule nya Nyumba ya Nungungulu a di tedwa khu sikhumu ni sikhurubwa, a gu si vbanyisa.

¹⁵Na va wonide siliwugiso a nga bani a gira, ni sanana si nga bani si gulumela Nyumbani ga Nungungulu, khiso: “Hosana ga Mwamana wa Dhavhidhe!” Vaphasi nya vakhongolo ni vahevbudzi nya Nayo va di garadzega, va mu embela, khavo:

¹⁶ “U ngu si pwa iso va ganelago, gani?” Jesu a di va hakha, khuye: “Nyi ngu si pwa.” A di va wudzisa, khuye: “Ina mu si hevbuli milowo yi gu, khiyo: Gidhumo gyaye gi na duga, khu kanani nya sanana nya sidugwana niso sa beleni, gani?”

¹⁷A di va diga, a duga khu dhoropani a hongola Bhetaniya aya lala.

¹⁸Ni dzimindru, na va gu bwelela dhoropani, a di pwa ndzala.

¹⁹Na wonide nguyu vbafuvbi ni ndzila, a di hidzimela aholu khaya mana gilo, a di ya mana mahagane basi. Khavbo avbo, a di khuye: “Gima khu na nga velega gambe mihandro kala gupindruga!” Wu di dzegela gu banga.

²⁰Vapizane, na va wonide esi, va di liwuga, khavo: “Nguyu yoyu wu di bangisa kharini nugunugu olu?”

²¹ Jesu a di hakha, khuye: “Khu lisine nyi ngu mi embelani, kheni: Mwa gu khodwani, nyamba kanakana, kha mu na gira basi esi nyi nga girago nguyu yoyu, aholu mwa gu ruma gigomo gegi, khenu: ‘Siguga khavbovbo, indra uya dzi dumwega phwani’, gu na girega kamwe.

²²Kholu satshavbo mu si lombago khu gukhodwa gwanu, umo nya nombelo, mu na ningwani.”

²³Avbo Jesu a nga vboha Nyumbani ga Nungungulu, nari vbakari nya guhevbudze a dita randredwa khu vakhongolo nya vaphasi nya mhamba ni madhota vaya, khavo: “Wa gu yi mana hayi tshivba nya gugire esi? Khu mani a nga gu ninga tshivba yoyo?”

²⁴Jesu a di va hakha, khuye: “Eni neni nyi na ni giwudziso gwanu. Mwa gu nyi phindrulani, nyi na mi embela umo nyi yi manago tshivba yeyi.

²⁵Nga nyi embelani: Ina gubhapatisa ga Johane gwa guta khu evbi? Khu ga Nungungulu mwendro khu gwa vathu?” Aholu va di phela gu temarisana khu gyawe, khavo: “Ha gukhethu khu ga Nungungulu, a na, khuye: ‘Khu ginani mu ngamba khodwa gwaye?’

²⁶Gasi ha gukhethu: Khu gwa vathu, hi na wugedwa khu vathu, kholu vatshavbo va ngu muti Johane kha nga muprofeti nya gutale.”

²⁷Khavbo avbo, va di mu hakha, khavo: “Ahati.” Uye nuye a di va hakha, khuye: “Eni neni kha nyi mi embelini umo nyi yi manago tshivba nya gugire esi!”

²⁸“Nga wonani: Babe moyo a diri ni sanana sivili. A di ruma igyo nya guphele, khuye: ‘Mwanangu, indra gundze muhuno uya limela miuvha.’

²⁹Aholu igyo gi di hakha, khigyo: ‘Nyi wowe.’ Hwane nya gikhati gi di dzi laya, gi hongola.

³⁰Na yede oyu nya wuvili aya mu ruma nuye, a di hakha, khuye: ‘Ina, nyi na hongola.’ Aholu kha nga hongola.

³¹Khu wevbini nya ava va vavili a nga girago guhaladza ga babe wule?” Va di hakha, khavo: “Khuye nya guphele.” Jesu a di va embela, khuye: “Khu lisine nyi ngu mi embelani, kheni: Vakhuphisi ni maphuphulu va na mi thangela Mufumoni wa Ndzadzini.

³² Kholu Johane dzude vbakari gwanu ata mi hevbudza ndzila nya gululame; kha mwa khodwa gwaye. Aholu vakhuphisi ni maphuphulu va khodwe gwaye. Na mu wonide esi, kha mwa dzi sodzisani, mu khodwa gwaye.”

³³ “Yingisani gimbe gipimaniso: Babe moyo nya ndranga a di lima lithembwe, a yala miuvha, a gu bhiya, a gira gitshindro nya dziuvha ni gikoli nya gughadhe khavbo. Na vbedzide, a di li tshiyedza valimi a gu endra a hongola hwindzo.

³⁴Na yi vbohide nango, a di rumela sithumi saye ga valimi vale, gasi guya hakha mihandro yi mu lumbago.

³⁵Aholu valimi va di wugela sithumi sile: Va gu veta gimwegyo, va songa gimbe, va pfara gimbe khu siwindri:

³⁶A di engedza gambe gu va rumela simbe sithumi nya singi guvbindra iso nya guphele; va di ya si gira idzosaye.

³⁷Guhegisani a di va rumela mwanaye, na gu pimisa, kharati: ‘Va na ya ninga githawo mwamana wangu.’

³⁸Aholu valimi, na va wone mwamana waye, va di embeledzelana, khavo: ‘Khuye oyu a na gu tshalago ni thomba. Hongoleni hi mu songe, gasi hi na tshala nayo ethu.’

³⁹Va di mu pfinya, va hongola naye vbavbandze nya lithembwe vaya mu songa.

⁴⁰Ina litshigu a na tago mune lithembwe, ginani a nata girago ga valimi vale?”

⁴¹Va di hakha, khavo: “A nata va songa vatshavbo, nyamba kanakana, a dzega lithembwe a tshiyedza vambe valimi avo va na mu ningago mihandro khu gikhati gi vbwetegago.”

⁴² Jesu a di va wudzisa, khuye: “Ina mu si hevbulini milowo, yi gu, khiyo: ‘Giwindri gi nga nyenywago khu vavbahi khigyo gi khadego hungo nya gutshanganise, Silo sesi si giridwe khu Pfhumu; siliwugiso mahoni gwathu.’

⁴³“Khu kharato, nyi ngu mi embelani, kheni: Mu na dzegedwani Mufumo wa Nungungulu wu ningedwa ga lihundzu li na gu thelago mihandro.

⁴⁴[“Uye a na thegelago vbatshani nya giwindri gegi, a na pferuga a gu khala sipandryana, uye a na thegedwago khigyo, gi na mu kuya a gu khala kudzudzwane.”]

⁴⁵Na va pwide sipimaniso saye, vakhongolo nya vaphasi nya mhamba ni vafarisi va di tugula gukhavo a gu thula avo.

⁴⁶Va di vbweta lipindru nya gu mu mole, va li hamuga, kholu va di gu thava gidzemo gi nga bani gi muti kha nga muprofeti.