Read gitonga Matewu 25 Bible Online

Matewu 25 - gitonga bible

Matewu 25

¹“Mufumo wa Ndzadzini wu ngu fanana ni likhumi sagadzyana si nga dzegago dzikandriya dzawe si gu hongola guya khinga mwane.

²Vbakari gwawe livbandre si diri sipumbu, livbandre si di gengede.

³Esi nya sipumbu si di dzega dzikandriya, si si phari ndrengo nya mafura;

⁴gasi esi nya gugengele si di dzega dzikandriya ni sigasi nya mafura.

⁵Kha nga ulo mwane a nga hwelago gu vboha, sagadzyana si di phela gu wotela, si gu lala.

⁶Ni vbakari nya wutshigu si di wuswa khu lito li nga gulumelago, khilo: ‘A ngu vboha mwane, mu khingeni!’

⁷Khavbo avbo, sagadzyana sile si di khendzuga satshavbo, si dongisela dzikandriya dzawe.

⁸Esi nya sipumbu si di embela iso nya gugengele, khiso: ‘Nga hi vbungulelani mafura, kholu dzikandriya dzathu dzi ngu tshimega.’

⁹Aholu esi nya gugengele si di hakha, khiso: ‘Ahihi, ma nga hi kenelela nethu. Gwadi khu gu tutumani muya renga.’

¹⁰Na va hongode vaya renga mafura, a di tshala vboha mwane. Vale va nga bani va dongide va di bela naye nyumbani nya buzo nya dzegano, li gu segwa lidimba.

¹¹Khadukhadu si di vboha sagadzyana sile nya sipumbu si ta lomba, khiso: ‘Pfhumu hi tulele lidimba.’

¹² Aholu mwane a di si hakha, khuye: ‘Khu lisine, kha nyi mi tini.’

¹³Khu kharato, khalani na mu dongide, kholu kha mu liti litshigu ni gikhati a natago khigyo Mwamana wa Muthu.

¹⁴“Kholu esi sa gufanane gambe ni mwama moyo a nga dongago lipfhumba, na guvbweta gu khuga aya hwindzo, a di rana sithumi saye a si tshiyedza thomba yaye.

¹⁵Gimbe a di gi ninga livbandre dzitsapawu dzi ranwago taleta; gimbe, dzimbili; gimbe, mweyo basi; muthu ni muthu a di ningwa maningano ni tshivba yaye. Khavbo avbo, a di phara dzindzila a gu hongola.

¹⁶Wule a nga tshiyedzwago livbandre dzitaleta a di dzi bhindzulisa dzi velega dzimbe livbandre.

¹⁷Wule a nga tshiyedzwago dzitaleta dzimbili a di dzi velegisa nuye dzimbe dzimbili.

¹⁸Gasi wule a nga tshiyedwago mweyo basi, a di ya kemba liphala a siha tsapawu ya mune waye.

¹⁹“Na ma vbindride matshigu nya gulaphe, yi di wuya pfhumu ya sithumi sile yita vbweta guti ginani va nga tshala va gira khu dzitsapawu dzile.

²⁰Wule a nga bani a hakhide livbandre dzitaleta a di ya ningela dzimbe livbandre, khuye: ‘Pfhumu, u nyi ningide livbandre dzitaleta, khu dzi woni dzimbe livbandre nyi nga tshala nyi velegisa, edzi.’

²¹Pfhumu yi di, khiyo: ‘U tshambiside, githumi nya gyadi, nya gutumbege; kha nga olu u nga thembegago siloni nya sidugwana, nyi na gu pharisa nya singi. Bela buzoni gwa pfhumu yago.’

²²A di ya nuye wule a nga hakhago dzitaleta dzimbili aya, khuye: ‘Pfhumu, u nyi ningide dzitaleta dzimbili, khu dzi woni dzimbe dzimbili nyi nga tshala nyi velegisa, edzi.’

²³Pfhumu yi di, khiyo: ‘U tshambiside, githumi nya gyadi, nya guthembege; kha nga olu u thembegidego siloni nya sidugwana, nyi na gu pharisa nya singi. Bela buzoni gwa pfhumu yago.’

²⁴Guhegisani, a di ya wule a nga ningwa taleta mweyo basi, aya, khuye: ‘Pfhumu, gale na nyi gu guti kha nga mwama nya wurena, u golago guvbwera umo u ngamba yala, ni gu wolela umo u ngamba anega.

²⁵Khu kharato, nyi di kelela taleta yago, nyi yi siha, khu hwanga. Khu yi woni eyi, dzega taleta yago.’

²⁶Pfhumu yi di mu phindrula, khiyo: ‘Githumi nya guvivbe monyo, u patago ni wugara gumogo! Gwadigo u di gu dziti nya gukhuwe nyi ngu gola gu vbwera umo nyi ngamba yala, ni gu wolela iso nyi ngamba anega.

²⁷Ina ka, u na dzegide dzitsapawu dzangu u dzi yisa bhakwa; gu wuyani gwangu na nyi dzude nyita dzi mana na dzi velegede.’ Khavbo avbo, Pfhumu yi di ruma, khiyo:

²⁸‘Mu dzegeleni taleta yoyo mu ninga wule a gu ni likhumi.

²⁹ Kholu uye a gu naso a na ningwa nya singi; gasi wule a gu mwalo gilo a na dzegedwa ni sile a gu naso.

³⁰ Gasi githumi gyogyo gi si phasigo gilo, gi rinyeni vbavbandze, mugidemani; avbovbo gi naya lila ni gu ketsa magwaha.’

³¹ “Gikhati Mwamana wa Muthu a na gu tago na tade khu gidhumo gyaye, nari ni satshavbo sihathwa ni dzingilozi dzatshavbo, gumogo naye a nata khala vbagikhalotunu gwaye nya wufumu.

³²Mayigo yatshavbo ma nata tshangana mbeli gwaye; avbovbo, a nata kasa vathu, kha nga idzo muhavisi a kasago khidzo dzinvuta ni dziphongo.

³³Dzinvuta a na dzi vega khu nyamudye; gasi dziphongo a na dzi vega khu nyambade.

³⁴Khavbo avbo, mufumeli a na embela avo va nyamudye gwaye, khuye: ‘Deluni, sigodwa sa Babe wangu, hakhani mufumo mu nga dongisedwani gukhugela gu girwa nya mafu.

³⁵Kholu nyi diri ni ndzala, mu nyi ninga guhodza; ni lidora, mu nyi ninga mati nya gusele; nyi diri muendri, mu nyi hakhide;

³⁶nyi diri ni wuhagadzo, mu nyi ambagiside; nyi di gu dwala, mu nyi wusela; nyi diri pasoni, muya nyi holela.’

³⁷“Khavbo avbo, va nya ndruda va na mu hakha, khavo: ‘Pfhumu, khu vbanyalini hi nga gu wona ni ndzala, hi gu ninga guhodza, mwendro ni lidora hi gu ninga mati nya gusele?

³⁸Khu vbanyalini hi gu wonego nuri muendri, hi gu hakha, mwendro nuri ni wuhagadzo, hi gu ambagisa?

³⁹Khu vbanyalini hi gu wonego nu gu dwala, mwendro nuri pasoni, hiya gu holela?’

⁴⁰Mufumeli a na va hakha, khuye: ‘Khu lisine nyi ngu mi embelani, kheni: Dzinyondro dzatshavbo mu nga bani mu gira kharato ga moyo nya vandriyangu nya gusolege, kheni mu nga bani mu nyi girela.’

⁴¹“Khavbo avbo, a na embela va nyambade gwaye, khuye: ‘Khugani mahoni gwangu, enu mu vadwego, indrani niloni nya gupindruge wu dongisedwego Sathane ni dzingilozi dzaye.

⁴²Kholu nyi diri ni ndzala, kha mwa nyi ninga guhodza; ni lidora, kha mwa nyi ninga mati nya gusele;

⁴³nyi diri muendri, kha mwa nyi hakha; nyi diri ni wuhagadzo, kha mwa nyi ambagisa; nyi di gu dwala, nyi diri pasoni, kha mwa nyi holela.’

⁴⁴Khavbo avbo, va na wudzisa navo, khavo: ‘Pfhumu, khu vbanyalini hi gu wonego ni ndzala, mwendro ni lidora, mwendro nuri muendri, mwendro ni wuhagadzo, mwendro nu gu dwala, mwendro nuri pasoni, hi si gu theli kota?’

⁴⁵A na va hakha, khuye: ‘Khu lisine, nyi ngu mi embelani gukheni: Dzinyondro dzatshavbo mu nga bani mu si giri isoso ga moyo nya vandriyangu nya gusolege, kheni mu nga bani mu si nyi theli kota.’

⁴⁶Ava vana hongola gusanisekani nya gupindruge; gasi va nya ndruda vana hongola guvbanyani nya gupindruge.”