Read gitonga Matewu 27 Bible Online

Matewu 27 - gitonga bible

Matewu 27

¹Na gugide, vaphasi vatshavbo nya vakhongolo ni madhota va di gira tshangano nya guvbwete lipindru nya gusonge Jesu.

²Va di mu hunga va gu hongola naye vaya mu ningela ga mwamangulu Pilato.

³Khavbo avbo, Judha, a gu uye a nga mu ningelago, na wonide gukhuye lamudwe, a ningwa nandru, a di vetwa khu livhalo, a gu bweledza singerengere sile nya magumararu, a nga ningwago khu vaphasi nya vakhongolo ni madhota, aya va embela, khuye:

⁴“Nyi ghohide khu gu ningela muthu nyambana nandru.” Aholu avo va di khavo: “Wa guvbweta gukhuwe hi rini? Ahati uwe mune.”

⁵Khavbo avbo, Judha a di rinya singerengere sile ndrani nya Nyumba ya Nungungulu, a gu hongola aya tshwedza.

⁶Vakhongolo nya vaphasi va di rolela, singerengere, khavo: “Gu ngu lolela gu si thela gikhwamani nya mihengo, kholu i tengo nya novba.”

⁷Hwane nya gu bani va pwane, va di renga khidzo wulanga wu nga bani wu ranwa pwani “Lithembwe la muwumbi,” gasi gu dzingela umo va nya mayigo.

⁸ Khu kharato wulanga wule wu ranwago, ni muhuno, pwani “Lithembwe nya Novba.”

⁹Ma di tadzisega kharati, mahungu ya muprofeti Jeremiya, nya gukhayo: “Va di dzega singerengere nya silivha, khu tengo watshavbo nya magumararu, a gu tengo a nga rengiswago khuwo wule a nga rengiswa khu sanana sa Israyeli,

¹⁰ va gu renga khiso lithembwe la muwumbi, kha nga idzo Pfhumu a nga nyi rumago khidzo.”

¹¹Jesu a di yiswa ga mwamangulu Pilato, a ngaya mu wudzisago, khuye: “Khuwe uwe Mufumeli wa Vajudha?” Jesu a di mu hakha, khuye: “U ganede idzo.”

¹²Aholu, na gu ketsarwi khu vakhongolo nya vaphasi ni madhota, kha nga hakha gilo.

¹³Khavbo avbo, Pilato a di mu wudzisa, khuye: “Khupwi dziketso dzatshavbo dzedzi va gu girelago, gani?”

¹⁴Aholu uye kha nga phindrula gilo kala mwamangulu a gu liwuga ngudzu.

¹⁵Mibuzoni yatshavbo nya Phasika, Pilato a diri ni giolovedzo nya gutshule gibotshwa gimwegyo, gile va nga bani va gi lomba.

¹⁶Gikhati gyogyo gi diromo gibotshwa gimwegyo gi nga bani gi zivizwa; lina laye nya gupwani khu Bharabhasi.

¹⁷Pilato a di wudzisa gidzemo gyatshavbo gi nga bani gi tshanganide, khuye: “Khu wevbini mu vbwetago gukhenu nyi mi tshulelani: Bharabhasi, mwendro Jesu, a ranwago pwani khu Kristo?”

¹⁸A di gu dziti nya gukhuye va di mu ningela khu kotani nya lidiwo.

¹⁹Na khade phathani, a lamula, pfhumugadzi yaye yi di mu rumela lito, khiyo: “U nga dzi bedzi mahunguni ya muthu yoyo a lulamidego, kholu vbasilambo nyi sanisekide ngudzu khu dzindroro; khu kotani gwaye.”

²⁰Gasi vaphasi nya vakhongolo ni madhota va di kutsedzela gidzemo gu va lomba gu tshudwa Bharabhasi, a gu songwa Jesu.

²¹Khavbo avbo, mwamangulu Pilato a di va wudzisa, khuye: “Khu wevbini, nya ava va vavili, mu vbwetago gukhenu nyi mi tshulelani?” Avo va di hakha, khavo: “Bharabhasi!”

²²Pilato a di va wudzisa, khuye: “Ahati Jesu, a ranwago Kristo, nyi na mu gira kharini?” Vatshavbo va di hakha, khavo: “A na khokhothedwe!”

²³Pilato a di simamisa gu wudzisa, khuye: “Gighoho muni a giridego?” Aholu avo va di gulumela guvbindrisa, khavo: “A na khokhothedwe!”

²⁴ Pilato, na wonide khuye kha gu phasi gilo gu ganedzisana navo, bwelo khavbo, na wonide khuye ligwaha li diya na li engedzelana, a di ranisa mati, a gu hamba mandza mahoni nya gidzemo gyatshavbo, na gukhuye: “Nyi mwalo nandru vbalufutunu nya muthu yoyu nya ndruda! Ahati enu vamune.”

²⁵Gasi gidzemo gyatshavbo gi di hakha, khigyo: “Nandru yoyo nya lufu laye wu na thegele ethu ni sanana sathu!”

²⁶Khavbo avbo, a di va tshulela Bharabhasi; gasi Jesu, a di ruma gu mu kwamula a mu ningela va mu khokhothela.

²⁷Khavbo avbo, masotshwa ya mwamangulu Pilato ma di dzega Jesu ma gu hongola naye nyumbani nya wufumu, avbo ma ngaya tshanganago yatshavbo, ma mu randrela.

²⁸Va di mu tshulela dzitshalu, va mu fenengedza giwunguwungu;

²⁹va di luga gihugu nya miba va mu ambagisa, va mu pharisa sengele khu libogo la nyamudye. Va di vbindra khu khovbeni gwaye, va mu khidzimela, va mu kasuwari, khavo: “Sewe, Mufumeli wa Vajudha!”

³⁰Va di mu hetshela khovbeni, gumogo ni gu mu wandrela sengele wule va mu veta khuye hungoni.

³¹Hwane nya gu bani va mu kasuwaride, va di mu funungula giwunguwungu, va mu ambagisa dzingandzu dzaye, va mu dzega va gu hongola naye gasi guya mu khokhothela.

³²Avbo va nga bani va duga, va di tshangana ni mwama moyo wa Sirene, nya gupwani khu Simoni. Va di mu gurumedza gu rwala gihambano gya Jesu.

³³Na va vbohide naye wulanga wu ranwago Goligota, gu tshamusago, pwani: “Wulanga nya girwarwa,”

³⁴va di mu ninga wadwa nya gupatwe ni nyongwe gasi gu a sele; aholu, na wu lingide, a di wu bomba.

³⁵ Hwane nya gu bani va mu khokhothede, va di kabana dzingandzu dzaye, vaya khu gu gira nyatumbatumbane.

³⁶Va di khala vbale va mu ghadha.

³⁷Vbagihambanotunu khu vbatshani nya hungo waye va di vega milowo yi nga bani yi tshamusela givangelo nya lufu laye. Yi di gu khiyo. “OYU KHU JESU, MUFUMELI WA VAJUDHA.”

³⁸Gumogo naye gu di khokhothedwa dzimbafa dzimbili, mweyo khu nyamudye, yimbe khu nyambade.

³⁹ Vavbindri nya ndzila va di mu vala, na va gu khiniga mihungo, khavo:

⁴⁰ “Ah! Nga tshiga, na! Uwe u dzi kodzago gu khungumula Nyumba ya Nungungulu, u yi vbahedza khu matshigu mararu! Nga dzi vbanyisa, u tshiga khu vbagihambanotunu vbovbo, wa gu bani uri gyanana gya Nungungulu!”

⁴¹Khongolo nya vaphasi, gumogo ni vahevbudzi nya Nayo ni madhota va di mu vala navo, khavo:

⁴²“Vbanyiside vakwawe, aholu kha kodzi gu dzi vbanyisa! A gu ba nari uye Mufumeli wa Israyeli, a na tshige khu vbagihambanotunu, hi na khodwa gwaye.

⁴³ Tumbide Nungungulu; a na vbulugiswe khuye a gu bani a mu gola, kholu ganede, khuye: ‘Eni nyi gyanana gya Nungungulu!’ ”

⁴⁴Gu di dzega ni dzimbafa dzi nga bani dzi khokhothedwe naye dzi mu vala nidzo.

⁴⁵Gukhugela midiya kala ni silambo gu di manega gidema tigoni gwatshavbo.

⁴⁶Ni silambo, Jesu a di khusedza lito, khuye: “Eli, Eli, lema sabaktani?” Gu tshamusago, pwani “Nungungulu wangu, Nungungulu wangu, khu ginani u nyi digidego?”

⁴⁷Na va mu pwide, vambe nya vale va nga bani varomo vbale, va di khavo: “A gu rana Eliya!”

⁴⁸Moyo wawe a di tutuma khu guvbiredza, aya nega gipuryana nya wuluva umo nya ginageri, a gi tshomega vbatshavatunu, a mu ninga a sela.

⁴⁹Aholu vambe va di khavo: “Mu digeni, ha guvbweta gu wona mwendro Eliya a nata mu vbanyisa!”

⁵⁰Na wombide gimima, a difa.

⁵¹Khavbo avbo, mwendra nya makhuvi nya Nyumba ya Nungungulu wu di pferuga khu vbakari gukhugela vbatshani kala vbavbatshi; gi di manega girevareva, si gu pandrega siwindri;

⁵²ma di tulega marowo, sirumbi nya singi sa va nya ndruda si di wuswa;

⁵³na va dugide khu marowoni, hwane nya gu bani a wugide Jesu, va di bela dhoropani nya gukatege, va wonega ga va nya gutala.

⁵⁴Muthangeli nya gikwata nya lizana masotshwa, gumogo navo a nga bani a gu ghadha navo Jesu, na va wonide girevareva gile, gumogo niso si nga bani si dugelela, va di tala khu hwanga, va ganela, khavo: “Khu lisine oyu a diri Gyanana gya Nungungulu!”

⁵⁵Va diromo khu hwindzo, va khedzisela, vanyamayi nya vangi, va nga landrisela Jesu ni gu mu sayisa gukhugela Galileya.

⁵⁶ Vbakari nya vanyamayi vale, a di romo Mariya wa Madhalene, Mariya, mayi wa Jakobe ni Josefe ni mayi wa sanana sa Zebhedhewu.

⁵⁷Na li hwide, a di ta mwama moyo nya gitetema, nya gupwani khu Josefe wa Arimateya. Uye nuye a di dzi giride mupizane wa Jesu.

⁵⁸A diya ga Pilato aya lomba girumbi gya Jesu. Pilato a di ruma gukhuye va mu ninge.

⁵⁹Josefe a di dzega girumbi gya Jesu a gi fumbela khu mwendra nya lasoli nya guage,

⁶⁰a mu dzinga lithowoni nya liphya, a nga bani a li kembide mu giwindrini. Khavbo avbo, a di wumbulusa giwindri nya gikhongolo a tshika khigyo mwanya wakone, a gu hongola.

⁶¹Mariya wa Madhalene ni mumbe Mariya va diromo vbale, na va khade bambe nya lithowo.

⁶²Gandra ni dzimindru dzakone, a nga bani ari litshigu nya gudongisele Phasika, vakhongolo nya vaphasi ni Vafarisi va di ya tshangana ga Pilato, vaya, khavo:

⁶³“Mwamangulu, hi ngu dundruga nya gukhethu mukanganyisi wule na nga gu vbanya a di nga ganela, khuye: ‘Nyi na wuga hwane nya matshigu mararu.’

⁶⁴Khu kharato, rumela vathu vaya ghadha lithowo kala ma vbindra matshigu yaya ya mararu, va ngata vapizane vaye vata mu ba, va kodza gu embela vathu, khavo: Wugide khu gufani. Malipha yaya ma na khala makhongolo guvbindra ayo nya guphele.”

⁶⁵Pilato a di va phindrula, khuye: “Masotshwa khayo aya. Indrani nawo muya ghadha kha nga idzo mu wonago khidzo.”

⁶⁶Khavbo avbo, va di ya sega gwadi giwindri nya lithowo, va gu vega gitambo vbagiwindritunu gumogo ni gu vega vaghadhi.