Read gitonga Matewu 28 Bible Online

Matewu 28 - gitonga bible

Matewu 28

¹Na yi vbindride Sabhadho, khu mambagugya nya litshigu nya guphele nya semana, Mariya wa Madhalene ni mumbe Mariya va di ya holela lithowo.

²Avbovbo, khu githugedza, gu di manega girevareva, kholu ngilozi ya Pfhumu, yi di tshiga khu Ndzadzini yita liginya giwindri, yi khala khu vbatshani gakone.

³Makhalelo yaye yi di wonega kha nga gulasa nya ndzadzi; guambala gwaye gu di aga nga hunguva.

⁴Masotshwa ma nga bani ma ghadha lithowo ma di ndrendremela, ma gu dzima, khu hwanga.

⁵Aholu ngilozi yi di khusa lito, yi embela vanyamayi vale, khiyo: “Mu nga thavi; nyi ngu dziti nya gukheni mwa gu vbweta Jesu a nga khokhothedwago.

⁶Mwalo avba. Wugide, kha nga idzo a nga ganelago khidzo. Deluni muta wona avbo a nga bani lade avbo.

⁷Olu indrani khu guvbiredza muya tivisa vapizane vaye, khenu: ‘Uye wugide khu gufani, a na mi hegudzani gu vboha Galileya. Iyo mu na guya mu wonago.’ Khiso esi nyi nga vbweta gu mi tivisani!”

⁸Vanyamayi vale, na va tade khu hwanga, gumogo ni gunengela, va di khuga khu vbale khu guvbiredza, va gu tutuma, gasi guya tivisa vapizane.

⁹Jesu a di va khinga, a va losa, khuye: “Gugideni.” Avo va di mu hidzimelela, vaya dzi thesa migondroni gwaye va gu mu khozela.

¹⁰Jesu a di va embela, khuye: “Mu nga thavi gilo; indrani muya tivisa vandriyangu va hongole Galileya, va na nyi wonela iyoyo.”

¹¹Na va nga romo ndzilani vanyamayi vava, vambe vaghadhi va di tutuma va hongola dhoropani vaya tivisa vakhongolo nya vaphasi satshavbo iso si nga dugelelago.

¹²Ava va di gira tshangano ni madhota, va gu pwana gulivba dzitsapawu nya dzingi masotshwa yale,

¹³va ma laya, khavo: “Indrani khenu vapizane vaye va di ta ni vbakari nya wutshigu vata mu ba na hi lade.

¹⁴Sa gu tidwa isoso khu mwamangulu Pilato, mu nga thavi, ethu khethu hi na gu si tigo. Kha na mi gira gilo.”

¹⁵Na va hakhide dzitsapawu, va di gira kha nga idzo va nga embedwago khidzo. Khidzo kharati va embeledzanago khidzo Vajudha kala matshigu ya muhuno.

¹⁶Vale nya likhumi na moyo va di hongola Galileya, gigomoni gile va nga bani va leletedwe khu Jesu.

¹⁷Na va mu wone, va di mu khozela; vbakari gwawe va diromo vambe va nga bani va gu kanakana.

¹⁸Khavbo avbo, Jesu a di hidzimela, a va embela, khuye: “Nyi ningidwe tshivba yatshavbo nya gufume Ndzadzini ni mafuni.

¹⁹Khu kharato, indrani mu gimbila mu hevbudza mayigo yatshavbo, mu bhapatisa vathu khu lina la Babe, ni la Mwamana, ni la Liphuvbo nya Guage.

²⁰Va hevbudzeni gu landrisa satshavbo iso nyi nga mi hevbudzani. Gasi eni nyi na bani nyiri nanu gikhati gyatshavbo, kala guhegisani nya litigo.”