Read gitonga Matewu 3 Bible Online

Matewu 3 - gitonga bible

Matewu 3

¹Khu matshigu yale, Johane mubhapatisi a di wonega giwulani gya Judheya na gu hevbudza, khuye:

²“Vbindrugedzani mavbanyelo, kholu Mufumo wa Ndzadzini womo vbafuvbi gwanu.”

³Khuye oyu a nga thudwa khu muprofeti Isaya, gikhati a nga khuye: Lomo lito li huwelelago mugiwulani, khilo: Dongiselani ndzila ya Pfhumu, lulamisani sindzilana saye.

⁴Guambala gwa Johane gu diri gwa mawoya nya ngameriya; libhandri a nga bani a gu hunga mugiwununi gwaye a diri lidowo; guhodza gwaye a diri dzimbera ni wulombe nya likhabi.

⁵Va diya iyo gwaye vathu va Jerusalema, va Judheya gwatshavbo ni va tigoni gwatshavbo ga Joridhani,

⁶vaya bhapatiswa khuye tsongoni wa Joridhani, na va gu dawulela sighoho sawe.

⁷Aholu, na wonide nya gukhuye Vasadhusi nya vangi ni Vafarisi va di guta navo gasi guta bhapatiswa khuye, a di va embela, khuye: “Enu livelego nya dzinyoga! Khu mani a nga mi ruma gu thava likhulo litago?

⁸Wonegisani mihandro yi yeyedzago gu vbindrugedza gwanu.

⁹Mu nga dzi pembi sanu, khenu: ‘Hi na ni babe Abrahama!’ Kholu, nyi ngu mi embelani gukheni, Nungungulu a ngu dzi kodza gu tumbulugisa sanana sa Abrahama khu musiwindrini momu.

¹⁰Ambari ulo, gibhewula gi vegidwe mikhambani nya simbo; simbo watshavbo wu si ningigo mihandro wu na kokwa, wu gu rinywa niloni.

¹¹Eni nya gu mi bhapatisa khu mati, gasi mu vbindrugedze; aholu uye a tago khu hwane gwangu a na ni tshivba gu nyi vbindre; eni nyi mwalo fanelo nya gutshule silato saye. Uye a na mi bhapatisa khu Liphuvbo nya Guage ni nilo.

¹²A na ni gisalava mandzani gwaye; a na vbiyela githala gyaye, a vbevbera dzimbewu a thela mugisangalani, gasi mafisi a na ma vbisa niloni nyamba tshimega.”

¹³Khavbo avbo, khu Galileya Jesu a dita tsongoni wa Joridhani ga Johane, gasi guta bhapatiswa khuye.

¹⁴Aholu Johane a di bomba, khuye: “Eni kheni nyi gu ni fanelo nya gubhapatiswe khuwe, ni olu u tago gwangu!”

¹⁵Aholu Jesu a di mu hakha, khuye: “Si dige isoso. Gu vbwetega hi landrise, kharati, fanelo nya gululame gwatshavbo.” Khavbo avbo, Johane a di dzumela.

¹⁶Jesu na bhapatisidwe, a di duga khu matini. Avbovbo Ndzadzini gu di tulega, a wona Liphuvbo la Nungungulu na li gu relela kha nga lituva, li ta mbaka vbatshani gwaye.

¹⁷ Khavbo lito nya gute khu Ndzadzini li di, khilo: “Oyu khu Mwamana wangu nya guhaladzege ngudzu, a nengedzisago monyo wangu.”