Read gitonga Matewu 4 Bible Online

Matewu 4 - gitonga bible

Matewu 4

¹Khavbo avbo, a di dzegwa khu Liphuvbo, li mu yisa giwulani, gasi aya lingwa khu Sathane.

²Na hade magumana matshigu, wutshigu ni mihani. Jesu a di pwa ndzala.

³Khavbo avbo, mulingi a di ta, khuye: “Wa gu bani uri Mwamana wa Nungungulu, ruma siwindri sesi si vbindrugedze si khala guhodza.”

⁴ Jesu a di mu hakha, khuye: “Gu lovidwe gupwani: Muthu kha vbanyi khu guhodza basi, aholu, khu mahungu yatshavbo ma dugago khu ga Nungungulu.”

⁵Khavbo avbo, Sathane a di mu dzega a gu hongola naye dhoropani nya gukatege; aya mu emisa gikolitunu nya Nyumba ya Nungungulu,

⁶a di mu embela, khuye: Wa gu bani uri Mwamana wa Nungungulu, nga dzi digeledza khavba, kholu gu lovidwe, pwani: “Nungungulu a na ruma dzingilozi dzaye dzi gu hakhe, gasi u si bayiswi migondro khu siwindri.”

⁷ Jesu a di mu embela, khuye: “Gu lovidwe gambe gupwani: U nga lingi Pfhumu Nungungulu wago!”

⁸Sathane a di mu dzega nyaluphye a hongola naye gigomoni nya gulaphe ngudzu, avbo a ngaya mu leyedza mifumo yatshavbo nya mafu ni dzithomba dzakone,

⁹a gu mu embela, khuye: “Nyi na gu ninga satshavbo sesi, wa gu khidzima u nyi khozela.”

¹⁰Khavbo avbo, Jesu a di mu hakha, khuye: “Suka, Sathane, kholu gu lovidwe, gupwani: U na khozela Pfhumu Nungungulu wago; khuye basi u na gu mu thumelago.”

¹¹Khavbo avbo, Sathane a di mu diga a hongola; dzingilozi dzi dita dzita mu thumela.

¹² Na pwide nya gupwani Johane khothedwe pasoni, Jesu a di bwelela Galileya;

¹³ a diga, kharati, Nazareta, aya khala Kafarinawume, a gu lidhoropa li manegelago siwoni ga Galileya, litigo la Zebhuloni ni Nafitali.

¹⁴Gasi gu di tadzisega kharati magana ya muprofeti Isaya, nya gukhayo:

¹⁵“Litigo la Zebhuloni ni litigo la Nafitali, vbafuvbi ni ndzila ya phwani wa tshatugo ga Joridhani, Galileya wa va nya mayigo.

¹⁶ Vathu va nga bani va gu vbanyela mugidemani, va wonide wenengedzo nya wukhongolo ni avo va nga bani va gu vbanyela mugusivbalani nya lufu, va tumbulugedwe khu wenengedzo.”

¹⁷ Khavbo avbo, Jesu a di phela gu hevbudza, na gu ganela, khuye: “Vbindrugedzani mavbanyelo, kholu Mufumo wa Ndzadzini womo vbafuvbi.”

¹⁸Na gu gimbila siwoni ga Galileya, a di wona Simoni, a ranwago pwani khu Pedro, ni ndriyaye Andreya, va nga bani va thesa dzikhoga, kholu va diri vagogi.

¹⁹Jesu a di va embela, khuye: “Nyi landreni, nyi na mi gira vagogi nya vathu.”

²⁰Khavbo avbo, va di dzegela gu diga dzikhoga, va mu landra.

²¹Na gimbide pfhukanyana, a di wona Jakobe ni ndriyaye Johane, sanana sa Zebhedhewu, va nga bani va andza dzikhoga ngalavani. A di va rana navo.

²²Va di dzegela gu tshiya babe wawe ngalavani, va mu landra.

²³ Jesu a di gimbila tigoni gwatshavbo ga Galileya, na gu hevbudza mudzinyumbani nya nombelo, gumogo ni gu tivisa Mahungu nya Yadi nya mufumo, na gu hawulugisa vathu dzingumbe dzawe dzatshavbo, ni madwali.

²⁴Ndruma yaye yi di phalalega ni Siriya gwatshavbo. Va di mu resela vatshavbo avo va nga bani vari ni madwali ni dzingumbe nya dzingi ni simbe sigaradzo; avo va nga bani vari ni maphuvbo nya guvivbe, va nya guhandruga ni va nya sitshira, ni sikhurubwa. A di va hawulugisa vatshavbo.

²⁵A di landrisedwa khu mwandra nya vathu, nya gute khu Galileya, khu Dhekapoli, khu Jerusalema, khu Judheya ni tshatugo ga Joridhani.