Read gitonga Matewu 5 Bible Online

Matewu 5 - gitonga bible

Matewu 5

¹Na wonide mwandra, a di gwela mugigomoni avbo a ngaya khalago. Vapizane vaye va di hidzimela.

²Khavbo avbo, a di khusedza lito a gu va hevbudza, khuye:

³“Si kategide sisiwana liphuvboni, kholu khwawe Mufumo wa Ndzadzini.

⁴ Va kategide vale va lilago, kholu va na tangadziswa.

⁵ Va kategide va nya gurula, kholu va na hodza thomba nya litigo.

⁶ Va kategide vale va gu ni ndzala ni lidora nya ndruda, kholu va na khuriswa.

⁷Va kategide va nya wuhindzi, kholu va na giredwa wuhindzi.

⁸ Va kategide va nya myonyo nya yadi, kholu va na wona Nungungulu.

⁹Va kategide vakhongoteli nya vathu, kholu va na ranwa sanana sa Nungungulu.

¹⁰ Va kategide vale va saniswago khu gu landra ndruda, kholu khwawe Mufumo wa Ndzadzini.

¹¹ “Mu kategide enu, mwa gu vadwa, mu saniswa, mu singedzwa guvivba gwatshavbo khu kotani yangu.

¹² “Nengelani mu ghiya, kholu tshatshazelo wanu wu na bani wuri wukhongolo Ndzadzini. Kholu khidzo kharati va nga sanisago khidzo vaprofeti va gale.

¹³“Enu mu munyu nya litigo! Aholu munyu wa gu phusa, wu na lungwa khu ginani? Kha wu nga gu phasa gilo; wa gu vbaladzwa vbavbatshi, wu gandredzedwa khu vathu.

¹⁴“Enu mu wenengedzo nya litigo! Kha li kodzegi gu tshirwa lidhoropa li vbahidwego mugigomoni.

¹⁵Kha yi rothwi kandriya yi fenengedzwa khu gitundru, aholu ya gu vegwa avbo yi kodzago gu wenengedza khavbo vatshavbo va guromo nyumbani.

¹⁶ Khu kharato wu na dzure mwenge wanu mahoni nya vathu, gasi, va wone mithumo yanu nya yadi, va dhumise Babe wanu a guromo Ndzadzini.

¹⁷Mu nga pimisi nya gukhenu nyi tede guta tshipisa Nayo, mwendro sihevbudzo sa vaprofeti: Kha nya tela guta fuvisa; aholu, nyi tede guta tadzisa.

¹⁸ Kholu, khu lisine nyi ngu mi embelani, kheni: Kala yi gu vbindra ndzadzi ni mafu, mwalo ni thumo moyo wu na gu duswago Nayo nyamba tadzisega.

¹⁹Khu kharato, uye a na gu kanyisago siguruvedzo sesi nya sidugwana, a hevbudza kharato vathu, a na bani ari dugwana Mufumoni wa Ndzadzini. Aholu uye a si landrisago ni gu si hevbudza mu vathuni, a na bani ari khongolo Mufumoni wa Ndzadzini.

²⁰Kholu nyi ngu mi embelani; gululama gwanu gwa mba vbindra ugo nya vahevbudzi nya Nayo ni Vafarisi, gima kha mu na bela Mufumo wa Ndzadzini.

²¹“Mu pwide iso va nga embedwa va gale gupwani: ‘U nga songi; uye a songago a ni fanelo nya gulamudwe.’

²²Gasi eni nyi ngu mi embelani, kheni: Uye a zangarelago ndriyaye a na thethiswa; uye a ranago muthu kwawe khuye mbeveve fanede gu lamudwa khu madhota. Uye a ranago muthu kwawe khuye gipumbu a na rinywa phalani nya nilo.

²³Khu kharato, wa guya gira ningelo wago vbagiluvelotunu, nuri vbakari, u dundruga gukhuwe u hosede ndriyago,

²⁴diga ningelo wago vbagiluvelotunu, uya phela khu gukhongotelana ni ndriyago; khavbo u wuyago gwadi u ta gira ningelo wago.

²⁵“Wa gu hongola ni nala wago pfhumutunu, zama gu mu khongotela na mu ngari ndzilani; a ngaya gu ningela ga mulamuli, mulamuli a gu ningela ga vanyakasane, vanyakasane vaya gu khothela pasoni.

²⁶Khu lisine nyi ngu gu embela, kheni: Khu na duga khu mule nu si gu livbi mangava yatshavbo.

²⁷ “Mu pwide iso va nga embedwago vagale gupwani: ‘U nga bhayi.’

²⁸Gasi eni nyi ngu mi embelani, kheni: Watshavbo uye a khedzago nyamayi, khu gu mu dogorela, bhayide naye monyoni gwaye.

²⁹ Khu kharato, wa gu wona nya gukhuwe liso lago la nyamudye li ngu gu tshunganisa, li duse u dzudzuga, kholu i tshukwana gu luza givbango gimwegyo, guvbindra gu dzega givili gyago gyatshavbo gi rinywa phalani nya nilo.

³⁰Wa gu wona nya gukhuwe gyandza gyago gya nyamudye gi ngu gu tshunganisa, gi pile u dzudzuga hwindzo, kholu i tshukwana gu luza givbango gimwegyo, guvbindra gu dzega givili gyago gyatshavbo gi rinywa phalani nya nilo.

³¹“Gu ganedwe gambe gupwani: ‘Uye a hulago mwangadzi waye, a na mu ninge lidangalila nya musi nya guhulane.’

³²Gasi eni nyi ngu mi embelani, kheni: Watshavbo uye a hulago mwangadzi waye, vbavbandze nya wubhayi a ngu mu girisa gibhayi. Mwama a na mu dzegago a na khala nuye gibhayi.

³³ “Mu pwide gambe iso va nga embedwago va gale, gupwani: ‘U nga sambanyi malipha, aholu u na landrisa gisambanyo u nga girago ga Pfhumu.’

³⁴ Gasi eni nyi ngu mi embelani, kheni: Mu nga phazamini sanu mu gu sambanya, ambari khu ndzadzi, kholu gikhalo nya Mufumo wa Nungungulu;

³⁵ambari khu litigo, kholu khavbo a vegago avbo migondro yaye; ambari khu Jerusalema, kholu lidhoropa la mufumeli khongolo,

³⁶ambari khu hungo wago wunene, kholu khu dzi kodzi gu vbindrugedza ndzudzu wago, moyo basi, wu aga mwendro wu sivbala.

³⁷Guganela gwanu gu na khale ina nya gutiye, a gu bani ari ina; ahihi nya gutiye, a gu bani ari ahihi. Kholu iso si hambanago nesi sa gu vangwa khu liphuvbo nya guvivbe.

³⁸ “Mu pwide iso si nga ganedwa, nya gupwani: ‘Liso khu liso, likhwaha khu likhwaha.’

³⁹Gasi eni nyi ngu mi embelani gukheni: Mu nga dzi vhikeli ga valala vanu. Wa gu vetwa pama gihaya gya nyamudye, ningedzela gambe gya nyambade.

⁴⁰Uye a vbwetago gu gu ketsari, na gufela gu gu dzegela ngandzu yago, mu ninge gambe libhadzi.

⁴¹Uye a gu gurumedzago gu mu vbwelegedza pfhuka nya kilometro mweyo, engedzela gu mu vbwelegedza mumbe pfhuka yi khala mivili.

⁴²Uye a gu lombago, mu ninge. U nga pfhurareli uye a gu fiyarigo.

⁴³ “Mu pwide iso si nga ganedwa nya gupwani: ‘U na gola va na gyanu, u zondra nala wago.’

⁴⁴Gasi eni nyi ngu mi embelani gukheni: Golani valala vanu; lombelelani khu vale va mi sanisago.

⁴⁵Mwa gu gira kharato mu na khala sanana sa Babe wanu a guromo Ndzadzini. Kholu uye a ngu dugisa lidambo ga va nya gululama ni va nya guvivbedwa khu myonyo; a wisa ndzadzi ga va nya ndruda ni sighohi.

⁴⁶Kholu, mwa gu gola basi avo va mi golago, tshatshazelo muni mu na gu wu manago? Kha va ngu gira navo vakhuphisi, gani?

⁴⁷Mwa gu losa basi vandriyanu, gilo muni nya giphya mu girago? Kha va ngu gira navo va nya mayigo, gani?

⁴⁸ Khu kharato, lulamani mulisineni kha nga Babe wanu wa Ndzadzini a lulamidego.