Read gitonga Matewu 7 Bible Online

Matewu 7 - gitonga bible

Matewu 7

¹“Mu nga lamuli vakwanu, gasi mu si lamudwi nenu.

² Kholu, idzo mu na lamulago khidzo vakwanu, mu na lamudwa nenu khidzo. Ndronga mu na pimago khiyo vakwanu, khiyo mu na pimwago nenu khiyo.

³Khu ginani u khedzago gitoti gi guromo lisoni ga ndriyago, u si khedzi vhambala wu guromo lisoni gwago?

⁴U na dzi kodza kharini gu embela ndriyago, khuwe: ‘Wandruye, hidzimela nyi gu dusa gitoti lisoni gwago’ nuri ni vhambala lisoni gwago nuwe?

⁵Nyamaliphawe! Dusa guphela vhambala wu guromo lisoni gwago, khavbo u na dzi kodzago gu dusa gitoti gi guromo lisoni ga ndriyago.

⁶“Mu nga dzegi silo nya gukatege mu ninga dzimbwa, dzi nga mi wugelani dzi mi hodza; kha nga gambe, mu nga dzegi dzindralama dzanu mu ninga dzikhumba, dzi nga gandredzedwa.

⁷“Lombani, mu na ningwa; vbwetani, mu na si mana; khokhothani, mu na tuledwa.

⁸Kholu muthu watshavbo a lombago, a ngu ningwa; uye a vbwetago a ngu si mana, ni uye a khokhothago, a ngu tuledwa.

⁹Khu wevbi melegi, vbakari gwanu, a ningago giwindri gyanana gyaye gya gu mu lomba gibaba?

¹⁰Mwendro gu gi ninga nyoga gya gu mu lomba ndzandzi?

¹¹Nga wonani: Ambari enu nya gukhenu mu vivbedwe khu myonyo mu dzi kodzago gu ninga silo nya sadi sanana sanu, ahati Babe wanu a guromo Ndzadzini kha na nga ninga silo nya sadi vale va mu lombago, gani?

¹² Khu kharato, iso mu vbwetago gukhenu vathu va mi girele, va gireleni nenu, kholu khidzo kharati wu hevbudzago Nayo ni sihevbudzo sa vaprofeti.

¹³“Belani khu mwanya nya dugwana! Kholu ndzila yi yisago gumbembani yi anamide ngudzu; mwanya wakone nuwo. Nya vangi khavo va belago khiyo!

¹⁴Gasi ndzila yi yisago guvbanyani yi hongide ngudzu; mwanya wakone nuwo. Vadugwana va belago khiyo.

¹⁵“Dzi woneleni ni vaprofeti nya malipha, va tago vbakari gwanu kha nga dzinvuta, gasi khu ndrani masolwa nya guvbelele.

¹⁶Mu na vati khu mihandro yawe. Ina gu ngu hawa dziuvha mu sikakaradzani, mwendro makandzu mu sirangalabwani, gani?

¹⁷Simbo watshavbo nya wadi wa gu thela mihandro nya yadi; gasi uwo nyamba wadi wa gu velega iyo nyamba yadi.

¹⁸Simbo nya wadi kha wu dzi kodzi gu velega mihandro nyamba yadi. Kha nga simbo nyamba wadi wu si dzi kodzigo gu velega mihandro nya yadi.

¹⁹Simbo watshavbo wu si velegigo mihandro nya yadi wu ngu kokwa wu rinywa niloni.

²⁰ Khu kharato, mu na vati khu mihandro yawe.”

²¹“Khandri watshavbo wule a gukhuye: Pfhumu, Pfhumu, a na belago Mufumoni wa Ndzadzini. Aholu a na bela basi uye a girago gugola ga Babe wangu a guromo Ndzadzini.

²²Nya vangi va na nyi embela litshigu lolo, khavo: ‘Ama Pfhumu, ina kamwe kha ha profeta khu lina lago, hi tutumisa maphuvbo nya guvivbe, gumogo ni gu gira siliwugiso nya singi khu lina lago, gani?’

²³ Khavbo avbo, eni nyi na va hakha, kheni: Kha nyi mutini ne vbadugwana. Leyani mbeli gwangu, enu mwatshavbo mu girago guvivba.

²⁴“Wule a pwago mahungu yangu a ma landrisa, a gu fanana ni mwama nya mapimo a nga vbaha nyumba yaye mugiwindrini.

²⁵Yi diwa ndzadzi nya yingi, yi gugumugisa mati nya mitsongo, gu manega talo; gumogo ni gu vetwa khu phuvbo nya gingulu nyumba yile; aholu kha ya thega, kholu yi tsitsidwe gwadi mugiwindrini.

²⁶Gasi uye a pwago mahungu yangu a si ma landrisi, a gu fanana ni gipumbu gi nga vbaha nyumba yaye mulipfuleni.

²⁷Yi diwa ndzadzi nya yingi, yi gugumugisa mati nya mitsongo, gu manega talo; gumogo ni gu vetwa khu phuvbo nya yikhongolo; nyumba yile yi di dzegela gu pfhungumuga yi thega wufendretiri.”

²⁸Na vbedzide gu ganela magana yaya, gidzemo gi di liwuga sihevbudzo saye.

²⁹Kholu a di gu va hevbudza kha nga uye a gu ni fanelo nya guhevbudze, nasiri kha nga vahevbudzi nya Nayo.