Read gitonga Matewu 8 Bible Online

Matewu 8 - gitonga bible

Matewu 8

¹Na gu relela khu gigomoni, Jesu a di landrwa khu gidzemo nya gikhongolo.

²Khavbo avbo, a di yedwa khu mudwali moyo nya sokono, a ngaya mu khidzimela, khuye: “Pfhumu, wa gu dzina, nyi hawulugise.”

³Jesu na mu handzegide mandza, a di mu embela, khuye: “Nyi ngu dzina, hawuluga!” Mudwali wule a di dzegela gu hawuluga.

⁴ Aholu Jesu a di mu laya, khuye: “U nga embeli muthu; indra dzi leyedza ga muphasi nya mhamba, gufela gu a ningela, khu guagiswa gwago, iso si rumwago khu Mosi, gasi gu khala nari wufakazi vbakari gwawe.”

⁵Na gu bela Khafarinawume, a di tedwa khu muthangeli moyo nya gikwata nya lizana masotshwa, a ngata mu lombago, khuye:

⁶“Pfhumu, ndrangani gwangu nyi na ni githumi gi sanisekago ngudzu. Gi khwenyede sivbango.”

⁷Jesu a di mu hakha, khuye: “Nyi nata mu hawulugisa.”

⁸Aholu muthangeli wule a di mu hakha, khuye: “Pfhumu, nyi mwalo fanelo nya gu uwe u bele ndrangani gwangu; aholu rumela lito limwedo lago basi, githumi gyangu gi na vbanya.

⁹Kholu eni neni, nyi muthu nyi gu na ni vakhongolo vangu, nyi na ni masotshwa nyi ma rumago. Mumbe gu mu ruma, kheni, indra, a gu hongola; mumbe, kheni: Delu, ata; ga githumi gyangu, kheni: Gira egi, gi gu gira.”

¹⁰Na pwide magana yaya, Jesu a di mu liwuga ngudzu, a gu embela avo va nga bani va gu mu landra, khuye: “Nyi ngu mi embelani, khu lisine, kheni: Gima nyi si gu mani muthu nya gukhodwe nga oyu tigoni momu ga Israyeli!

¹¹Nyi ngu mi embelani nya gukheni va nata nya vangi khu Khugadambo ni Muhwadambo vata khala vbamezatunu gumogo ni Abrahama, ni Isaki, ni Jakobe Mufumoni wa Ndzadzini,

¹²gasi va mune thomba va na rinywa vbavbandze, mugidemani, avbo va na guya lilago ni gu ketsa magwaha.”

¹³Khavbo avbo, Jesu a di embela muthangeli, khuye: “Indra, si na girege satshavbo kha nga idzo u khodwago khidzo.” Gikhati gile kamwe githumi gi di hawuluga.

¹⁴Jesu na bede ndrangani ga Pedro, a di ya mana ngogadzi wa Pedro na lade khu gupwa feveri.

¹⁵Na mu kuhide mandza feveri yi di dzegela guvbindra, a gu wuga a va sayisa.

¹⁶Ni silambo, va di mu yisela vathu nya vangi va nga bani vari ni madwali ni vatshavbo va nga bani na vari ni maphuvbo nya guvivbe gasi uye, khu magana yaye, a di ma tutumisa, gumogo ni gu hawulugisa vadwali.

¹⁷ Gasi gu tadzisega, kharati, iso si nga ganedwago khu muprofeti Isaya, nya gukhuye: “Uye dzegide madwali yathu, a gu rwala wuvi wathu.”

¹⁸Jesu na wonide gukhuye randredwe khu vathu nya vangi, a di embela vapizane vaye gukhuye va tshatugela khisikheyi.

¹⁹Khavbo avbo, a di hidzimela gwaye muhevbudzi nya Nayo a nga mu embelago, khuye: “Muhevbudzi, nyi na gu landrela ni hayini avbo u na gu hongolago.”

²⁰Jesu a di mu hakha, khuye: “Migehe yi na ni mavbala yawe; sinyoni sa damboni si na ni sihaga sawe. Aholu Mwamana wa Muthu mwalo avbo nya gukhihimele hungo waye.”

²¹Mumbe mupizane a di mu embela, khuye: “Pfhumu, nyi dige, guphela, nyi ya dzinga babe wangu.”

²²Jesu a di mu hakha, khuye: “Uwe nyi landre. Va dige vafi va dzinge vafi vakwawe.”

²³Uye na bede ngalavani vapizane vaye va di mu landrela.

²⁴Avbovbo gi di duga gingulu nya gikhongolo, gi nga gira gu ngalava yi pfhuledwa khu mavimbi. Aholu Jesu a di lade.

²⁵Vapizane vaye va di ya mu wusa, khavo: “Pfhumu, hi vbanyise, hi ngufa!”

²⁶Jesu a di va embela, khuye: “Mwa gu thava ginani, vathu nya gukhodwe vbadugwana?” Na khugide, a di kawuka phuvbo ni mavimbi. Khavbo avbo, gu di manega malenga nya makhongolo.

²⁷Vathu vale va di liwuga, khavo: “Gasi muthu muni oyu nya gu ambari phuvbo ni yiphwa si mu yingela?”

²⁸Na va vbohide tshatugo tigoni ga Vagadharenu, a di khingwa khu vama vavili va nga bani vari ni maphuvbo nya guvivbe na va gu dugela marowoni. Va di gu garadza gule nya gu mwalo a nga bani a tiya gu vbindra khu ndzila yoyo.

²⁹Avo va di gulumela, khavo: “Ginani hi nga gu ghohela, Mwamana wa Nungungulu? U tede guta hi tshanisela ginani, na gi si gu vbohi gikhati gyakone?”

³⁰Dzi diromo vbafuvbyana vbale dzikhumba nya dzingi dzi nga bani dzi gu haviswa.

³¹Maphuvbo yale ma di mu lomba, khayo: “Wa gu hi tutumisa, hi dzumedzise hi ya bela mudzikhumbani mule.”

³²Jesu a di ma embela, khuye: “Indrani!” Khavbo avbo, na ma dugide, ma diya bela mudzikhumbani, dzi nga tutumago dzi ya bela nondrwani, umo dzi nga ya mbembago dzatshavbo.

³³Vahavisi vakone va di tutuma, va hongola dhoropani vaya tivisa iso si nga dugelela vama vale nya maphuvbo nya mandriki.

³⁴Vathu vatshavbo va dhoropani va di yela Jesu gasi guya mu lomba gukhavo a khuge tigoni gwawe.