Read gitonga Matewu 9 Bible Online

Matewu 9 - gitonga bible

Matewu 9

¹Khavbo avbo, na bede ngalavani, a di tshatuga aya dhoropani gwaye.

²Va di mu yisela gilima khu lithatho. Jesu, khu gu wona gukhodwa gwawe, a di embela gilima, khuye: “Mwanangu, tiya. Sighoho sago si tsetseledwe.”

³Va di manega vahevbudzi nya Nayo va nga alakanya mapimoni gwawe, khavo: “Oyu mwama a ngu hembulula Nungungulu.”

⁴Aholu Jesu, na wonide maalakanyo yawe, a di va wudzisa, khuye: “Khu ginani mu khalago ni maalakanyo nya guvivbe kharato?

⁵Khu gevbini gi vbevbugidego gu ganela gukheni: ‘Sighoho sago si tsetseledwe’, mwendro gukheni, ‘Khuga u gimbile?’

⁶Kha nga ulo, gasi gu enu mu dziti nya gukhenu Mwamana wa Muthu a na ni tshivba nya gutsetselele sighoho mafuni momu; a di embela gilima, khuye: Khuga u eme, dzega lithatho lago u hongola gaya.”

⁷Khavbo avbo, gilima gi di dzegela gu khuga gi hongola gaya.

⁸Gidzemo, na gi wonide esi, gi di tala khu githawo, gi dhumisa Nungungulu a nga ningago vathu tshivba nya nga yile.

⁹Jesu na khugide khu vbale, a di wona mwama moyo nya gupwani khu Matewu, na khade wulangani gwaye nya gukhuphise, a mu embela, khuye: “Nyi landre!” Uye a di khuga a mu landra.

¹⁰Jesu, na romo vbamezatunu, ndrangani ga Matewu, a dita randredwa khu vakhuphisi ni sighohi, va ngata khalago navo vbamezatunu gumogo ni vapizane vaye.

¹¹Vafarisi na va wonide esi, va di embela vapizane vaye, khavo: “Khu ginani muhevbudzi wanu a hodzago ni vakhuphisi ni sighohi?”

¹²Jesu, na va pwide, a di va kawuka, khuye: “Khandri vale va gu ni womi va vbwetago nyanga, aholu, vadwali.

¹³ Indrani mu ya vbweta guti tshamuselo nya mahungu yaya: ‘Eni nya gu hatha wuhindzi guvbindra mhamba.’ Kholu kha nya tela guta rana va nya ndruda, aholu, sighohi.”

¹⁴Khavbo avbo, vapizane va Johane va di mu yela vaya mu wudzisa, khavo: “Khu ginani ethu ni Vafarisi hi halago dzinyondro nya dzingi, vapizane vago va si hali?”

¹⁵Jesu a di va hakha, khuye: “Ina gu ngu kodzega gu dziphelegedzi dza mwane dzi swihala na dziri naye, gani? Ma nguta matshigu va na gu dzegedwago mwane. Gikhati gyogyo va na hala!”

¹⁶“Mwalo a thelago giziva nya giphya vbamwendratunu wa gale, kholu giziva gi na pferula mwendra wa gale. Khu kharato, mwendra wu na engedzelana gu pferuga.

¹⁷Kha nga gambe, mwalo a thelago wadwa nya wuphya malowoni ya gale. Wa gu gira kharato, wadwa nya givhayi wu na pola malowo,[1] wu vbalaga wadwa ni gu luzega malowo. Aholu wadwa nya wuphya wa gu thedwa malowoni nya maphya, gasi satshavbo si pindruge.”

¹⁸Na nga gu va embela esi, a di vbohedwa khu moyo a nga bani ari muthangeli, a ngaya mu khidzimela, a mu lomba, khuye: “Nyamahegyane wangu a ngari gufa, aholu delu uta mu handzega mandza yago, a na vbanya.”

¹⁹Jesu a di khuga a hongola naye gumogo ni vapizane vaye.

²⁰Khavbo avbo, nyamayi moyo a nga bani a dwala khu gu dugelela novba gipimo nya likhumi na mivili myaga, a di hidzimela khu hwane gwaye aya kuha tshoka nya mwendra waye.

²¹Kholu a di gu pimisa, kharati: “Nya nga kuha guambala gwaye, nyi na hawuluga.”

²²Jesu na thendregedzide, a di mu khedza, khuye: “Mwanangu, tiya, gukhodwa gwago gu gu vbanyiside.” Gikhati gile kamwe, nyamayi wule a di dzegela gu hawuluga.

²³Jesu, na vbohide ndrangani ga muthangeli nya nyumba nya nombelo, a diya mana va nya gu womba sitoliyo ni vathu va nga bani va wombedzelana dzihuwa nya gililo, a va embela, khuye:

²⁴“Dugani, kholu nyamahegyane kha fa gilo, a di lala.” Aholu avo va di mu hega.

²⁵Na va dugide vatshavbo vbavbandze, Jesu a di bela. Na mu pharide khu libogo, nyamahegyane a di wuga.

²⁶Ndruma yakone yi di dzegela gu phalalega tigoni mule gwatshavbo.

²⁷Jesu, na gu khuga khu vbale, a di landrwa khu sikhumu sivili na si gu rana, khiso: “Mwamana wa Dhavhidhe, hi pwele wusiwana.”

²⁸Na vbohide ndrangani, sikhumu sile si di mu hidzimelela. Jesu a di si wudzisa, khuye: “Mu ngu khodwa nya gukhenu nyi na ni tshivba nya gugire isoso, gani?” Va di hakha, khavo: “Hi ngu khodwa, Pfhumu.”

²⁹Khavbo avbo, a di va kuha maho yawe, khuye: “Gu na girege gwanu kha nga idzo mu khodwago khidzo.”

³⁰Khu kharato, maho yawe ma di tulega. Jesu a di va laya, khuye: “Gwadi gwadi, mu nga embelini muthu.”

³¹Gani olu, na va khugide khavbo, va di phalalegisa ndruma yaye tigoni mule gwatshavbo.

³²Na va ngari gu duga, va di mu yisela gidudu, gi nga bani giri ni liphuvbo nya guvivbe.

³³Me ni gu tutumiswa liphuvbo lile, gidudu gi di ganela. Gidzemo gi di tala khu guliwuga, khigyo: “Gima hi si gu woni nya nga esi tigoni momu ga Israyeli.”

³⁴ Aholu, vafarisi va di khavo: “Uye a gu tutumisa maphuvbo nya guvivbe khu tshivba ya khongolo nya maphuvbo nya guvivbe.”

³⁵ Jesu a di gu gimbila gimbila ni madhoropa ni mitalala, na gu hevbudza dzinyumbani gwawe nya nombelo ni gutshumayela Ivhangeli nya mufumo, gumogo ni gu hawulugisa madwali yatshavbo ni dzingumbe dzinyumbani gwawe nya nombelo ni gutshumayela.

³⁶Na wonide gidzemo, a di gi pwela gisiro, kholu vatshavbo va di garade havo hokohoko, kha nga dzinvuta nyambana muhavisi.

³⁷Khavbo avbo, a di embela vapizane vaye, khuye: “Khu lisine, guvbwera gukhongolo! Aholu, sithumi sidugwana.

³⁸Khu kharato, lombani ga mune lithembwe a rumele vavbweri nya dzimbewu dzaye.”