Read gitonga Marko 1 Bible Online

Marko 1 - gitonga bible

Marko 1

¹Guphela nya Mahungu nya Yadi ya Jesu Kristo, Mwamana wa Nungungulu,[1]

² kha nga idzo gu lovidwego khidzo khu muprofeti Isaya, a nga khuye: “Nyi ngu rumela mwango wangu mbeli gwago, owu wu na gu dongiselago ndzila yago.”

³ “Lomo lito li huwelelago mu giwulani, khilo: Dongiselani ndzila ya Pfhumu, lulamisani sindzilana saye.”

⁴Khidzo kharati, Johane Mubhapatisi a di manega giwulani a huwelela gubhapatiswa nya gu dzi sodzise gasi gu ditshedzwa sighoho.

⁵Va di mu yela vatshavbo va nga bani va gu vbanya tigoni ga Judheya ni dhoropani ga Jerusalema, gasi guya bhapatiswa khuye tsongoni ga Joridhani; na va gu dawulela sighoho sawe.

⁶Johane a di gu ambala dzingandzu nya mawoya nya dzingameriya, giwununi gwaye a di hunga libhandri nya lidowo; guhodza gwaye a diri dzimbera ni wulombe nya likhabi.

⁷A di gu huwelela, khuye: “Khu hwane gwangu, a nguta uye a gu ni tshivba gu nyi vbindra, eni nyi gu mwalo fanelo nya gunoge nyi tshula dzingodzi nya silato saye.

⁸Eni nya gu mi bhapatisani khu mati, gasi uye a nata mi bhapatisa khu Liphuvbo nya Guage.”

⁹Khu matshigu yale, Jesu a di khuga Nazareta ga Galileya a gu hongola tsongoni wa Joridhani aya bhapatiswa khu Johane.

¹⁰Na gu duga khu matini, Jesu a di wona ndzadzi na yi tulegide, Liphuvbo li di mbaka vbatshani Gwaye kha nga lituva.

¹¹ Khu Ndzadzini li di pwala lito, li nga, khilo: “Uwe u Mwamana wangu nya gigodwa ngudzu, monyo wangu wu ngu tangadziswa khuwe.”

¹²Khavbo avbo, Liphuvbo nya Guage li di mu dzega li gu mu yisa giwulani.

¹³Iyo a ngaya khalago magumana matshigu vbakari nya sirengo nya likhabi na gu lingwa khu Sathane, dzingilozi dza Nungungulu dzi di mu thumela.

¹⁴Hwane nya gu na modwe Johane, Jesu adita Galileya gasi guta hevbudza Mahungu nya Yadi ya Nungungulu, khuye:

¹⁵ “Ma tadzisegide matshigu, Mufumo wa Nungungulu womo vbafuvbi. Vbindrugedzani mavbanyelo, mu khodwe khu Mahungu nya Yadi.”

¹⁶Na gu gimbila bambe nya yiphwa ya Galileya Jesu a di wona Simoni ni ndriyaye Andreya na va gu thesa dzikhoga kholu va diri vagogi.

¹⁷Jesu a di va embela, khuye: “Nyi landreni, nyi na mi girani vagogi nya vathu.”

¹⁸Va di dzegela gu diga dzikhoga va gu mu landra.

¹⁹Na gimbide pfhukanyana, a di wona Jakobe ni ndriyaye Johane, sanana sa Zebhedhewu na va gu sonedzela dzikhoga ngalavani.

²⁰A di va rana, avo va di tshiya babe wawe Zebhedhewu ni sithumi ngalavani, va gu mu landra.

²¹Va di bela dhoropani ga Kafarinawume. Na li vbohide litshigu nya Sabhadho, Jesu a di bela nyumbani nya nombelo a phela gu hevbudza.

²² Vatshavbo va di liwuga khu sihevbudzo saye, kholu a di hevbudza kha nga muthu moyo a gu ni fanelo nya guhevbudze, nasiri kha nga valovi nya Nayo.

²³Nyumbani mule nya nombelo, a di romo muthu moyo a nga bani ari ni liphuvbo nya guvivbe, li di ganela khu tshivba, khilo:

²⁴“Ginani hi nga gu ghohelago, Jesu wa Nazareta, wa gu tela guta hi mbembisa? Nyi ngu guti khuwe mani: Khuwe Gihathwa gya Nungungulu.”

²⁵Aholu Jesu a di li kawuka, khuye: “Degula, duga ga muthu yoyo.”

²⁶Khavbo avbo, liphuvbo nya guvivbe li di mu dzudza khu tshivba, li womba huwa, li gu duga.

²⁷Vatshavbo va di liwuga va gu wudzisana, khavo: “Nari ginani egi? Mu ngu wonani gihevbudzo giphya nya gutale khu tshivba! A dzi kodzago gu kawuka maphuvbo nya guvivbe ma gu mu yingisa.”

²⁸Ndruma yaye yi di phalalega gipandrengulu gyatshavbo gya Galileya ni mayigwana yatshavbo ya vbafuvbyana mule.

²⁹Na dugide khu nyumbani nya nombelo, a di hongola ndrangani ga Simoni ni Andreya, nari ni Jakobe ni Johane.

³⁰Va diya mana ngogadzi wa Simoni vbadawutunu na gu dwala, va tivisa Jesu.

³¹Na mu yede, a diya mu phara khu libogo a gu mu wusa. Khavbo avbo, feveri yi di dzegela guvbindra, a gu wuga a va sayisa.

³²Na li pfode lidambo, va di mu yisela vadwali vatshavbo ni va nya maphuvbo nya guvivbe.

³³Vathu vatshavbo va dhoropani va di tombanide mwanyani nya ndranga yile.

³⁴A di hawulugisa vathu nya vangi madwali yawe nya guhambanehambane, a gu tutumisa maphuvbo nya mangi nya guvivbe, a si ma dzumedzisi gu ganela, kholu ayo ma di gu muti khayo khuye mani.

³⁵Ni mambagugya, a di khuga a gu hongola giwulani, gasi guya gira nombelo.

³⁶Simoni ni ava a nga bani ari navo, va di gimbila va mu vbweta.

³⁷Na va mu mane, va di mu embela, khavo: “Vathu vatshavbo va ngu gu vbweta.”

³⁸Aholu, uye a di va hakha, khuye: “Hongoleni mambe malanga, mudzindranganani dza vbafuvbyana momu, gasi guya hevbudza gambe Ivhangeli, kholu khiso nyi nga si tela.”

³⁹A di gimbila tigoni gwatshavbo ga Galileya, na gu hevbudza Ivhangeli dzinyumbani gwawe nya nombelo, ni gu tutumisa maphuvbo nya guvivbe.

⁴⁰Mudwali moyo nya sokono a di mu yela aya mu khidzimela, a gu mu lomba, khuye: “Pfhumu, wa gu dzina nyi agise.”

⁴¹Jesu a di mu pwela wusiwana a mu handzega mandza, a mu embela, khuye: “Nyi ngu dzina. Agiswa.”

⁴²Na mu embede esi, sokonho yi di dzegela gu diga mudwali wule a agiswa.

⁴³Khavbo avbo, Jesu a di mu laya khu gigurumedza a gu mu diga a hongola na gukhuye:

⁴⁴“U nga embeli muthu esi nyi gu giredego, aholu indra dzi yeyedza ga muphasi nya mhamba gasi afela gu ningela, khu gu agiswa gwago, esi si rumwago khu Nayo wa Mosi, gasi gu khala wufakazi vbakari gwawe.”

⁴⁵Aholu, uye, me ni gu khuga khu vbale, a di huwelela ni litigo latshavbo esi si nga giregago gwaye. Khu kharato, Jesu kha nga dzi kodza gubela madhoropani, a di khala mu siwulani. Ambari ulo, vathu va di hongola gwaye na va guta khu malangani yatshavbo.