Read gitonga Marko 10 Bible Online

Marko 10 - gitonga bible

Marko 10

¹Jesu na khugide khu vbale, a diya tigoni ga Judheya, tshatugo nya tsongo wa Joridhani. Na randredwe nyaluphye khu vathu, a di va hevbudza kha nga giolovedzo gyaye.

²Vafarisi nya gukari va di hidzimela va mu wudzisa gasi gu mu linga, khavo: “Ina gu ngu kodzega mwama gu hula mwangadzi waye, gani?”

³Uye a di va hakha, khuye: “Gasi umo nya Milowo, Mosi a di mi laya kharini?”

⁴ Va di mu hakha, khavo: “A di dzumedzisa gu lova lidangalila nya musi a mu hula.”

⁵Aholu Jesu a di va embela, khuye: “Mosi a mi dzumedziside khu kotani nya gulemele nya myonyo yanu;

⁶ aholu, gukhugela guhegulani Nungungulu a di gira mwama ni nyamayi.

⁷Khu kharato, mwama a na tshiya babe ni mayi aya patana ni mwangadzi waye.

⁸ Va vavili va na khala nyama mweyo basi. Khu kharato, kha va ngari vavili gambe, aholu nyama mweyo basi.

⁹Khu magirelo yoyo, kha dzi kodzi muthu gu tshula egi gi hungidwego khu Nungungulu.”

¹⁰Na va vbohide gaya, vapizane va di ya mu wudzisa nyaluphye khu mahungu yaya.

¹¹Jesu a di va embela, khuye: “Oyu a hulago mwangadzi waye a gu dzega mumbe a ngu bhaya naye.

¹² Nyamayi nuye a gu diga mwama waye a dzegwa khu mumbe a ngu bhaya.”

¹³Khavbo avbo, va di yisela sanana nya gukari gasi a si kuha, Aholu, vapizane va di si himbedzela.

¹⁴Jesu, na si wone, a di garadzega a va embela, khuye: “Digani sanana sita gwangu. Mu nga si himbedzeli, kholu Mufumo wa Nungungulu wa gu lumba iso.

¹⁵ Khu lisine nyi ngu mi embelani kheni oyu a si hakhigo Mufumo wa Nungungulu kha nga gyanana, gima kha na wu bela.”

¹⁶Jesu a di wugarela sanana mawogoni, a si handzega mandza a gu si kategisa.

¹⁷Na gu duga a hongola, a di khingwa khu mwama na gu tutuma, a ta khidzima migondroni gwaye a mu wudzisa, khuye: “Muhevbudzi nya wadi, ginani nyi fanelago gu gira gasi nyi mane guvbanya nya gupindruge?”

¹⁸Jesu a di mu hakha, khuye: “Khu ginani u nyi ranago nya wadi? Uye a gu wadi, khu Nungungulu basi.

¹⁹ U ngu yiti milayo yi gu, khiyo: ‘U nga songi; u nga bhayi; u ngabi; u nga singedzi; u nga kanganyisi; rungudza babe ni mayi wago.’ ”

²⁰Gasi uye a di hakha, khuye: “Muhevbudzi, nyi ngu landrisa satshavbo soso gukhugela wudzahani wangu.”

²¹Jesu, na mu khedzide, a di tsakiswa khuye a gu mu embela, khuye: “U nga gu keneledwa khu gimwegyo basi. Indra u ya rengisa satshavbo u gu naso, u ninga sisiwana, gasi u mane thomba ya Ndzadzini. Hwane nya iso delu uta nyi landrela.”

²²Aholu, mwama, na pwide magana yaya a di garadzega a gu hongola na swihade kholu a diri ni dzithomba nya dzingi.

²³Jesu, na va khedziside gwadi vatshavbo, a di embela vapizane vaye, khuye: “Gu ngu garadza ngudzu gubela Mufumoni wa Ndzadzini ava va gu ni dzithomba!”

²⁴Vapizane va di liwuga khu magana yoyo. Aholu Jesu a di engedza gambe, khuye: “Vanavangu, gu ngu garadza ngudzu gubela Mufumoni wa Ndzadzini vale va tumbago dzithomba!

²⁵Gu ngu vbevbuga guvbindra ngameriya khu vbatshinganotunu guvbindra gu dzega gitetema gi gu bela Mufumoni wa Ndzadzini.”

²⁶Avo va di liwuga ngudzu. Va wudzisana khu gyawe, khavo: “A gu bani nari kharato khu mani a na vbulugago?”

²⁷Khavbo avbo, Jesu a di va khedzisa a gu va hakha, khuye: “Ga vathu kha si kodzegi, aholu ga Nungungulu si ngu kodzega, kholu, gwaye gimwalo gi si kodzegigo.”

²⁸Khavbo avbo, Pedro a di mu embela, khuye: “Hi womo avba ethu hi nga diga satshavbo hi gu landrela.”

²⁹Jesu a di phindrula, khuye: “Khu lisine nyi ngu mi embelani gukheni: Mwalo uye a digidego ndranga yaye, vandriyaye nya vama ni vanyamayi, mayi ni babe waye ni sanana khu kotani yangu ni Ivhangeli,

³⁰a na gumba bweledzedwa lizana dzinyondro, dzindranga, vandruye, vamayi ni vababe, ni sanana marembwe gumogo ni sisaniso, na nga gu vbanya mafuni momu, gambe ga gikhati gitago a na hakha guvbanya nya gupindruge.

³¹ Vangi va nya guhegula va na hegisela, va nya guhegisa va na thanga.”

³²Na vari vbakari nya ndzila, na va gu hongola Jerusalema, Jesu a di thanga mbeli gwawe, vapizane va di samala, va mu landra na va tade khu hwanga. A di rana ava nya likhumi na vavili khu phuvbo, a va tugudzisa esi si na gu dugelelago gwaye, khuye:

³³“Wonani, olu hi ngu gwela, gu hongola Jerusalema, Mwamana wa Muthu a na ningedwa ga vakhongolo nya vaphasi nya mhamba, ni vahevbudzi nya Nayo, va na lamula gukhavo a na songwe, va na mu ningela mandzani ga va nya mayigo,

³⁴va na mu vala, va mu hetshela, va mu kwamula khu dzimboma, va hegisa khu gu mu songa. Aholu, khu litshigu nya wuraru a na wuga khu gufani.”

³⁵Khavbo avbo, Jakobe ni Johane, sanana sa Zebhedhewu, va di hidzimela ga Jesu vaya mu embela, khavo: “Muhevbudzi, ha guvbweta gukhethu u hi girela esi hi vbwetago gu gu lomba.”

³⁶Uye a di va wudzisa, khuye: “Ginani mu vbwetago gukhenu nyi mi girela?”

³⁷Avo va di mu hakha, khavo: “Hi dzumedzise gu khala wudhumoni gwago, mumbe khu nyamudye, mumbe khu nyambade gwago.”

³⁸Aholu Jesu a di va phindrula, khuye: “Negi mu lombago kha mu giti! Ina mu ngu dzi kodzani enu gu sela gikombe nyi na gu selago, ni gu hakha gibhapatiso eni nyi na gu hakhago, gani?”

³⁹ Avo va di hakha, khavo: “Ina, hi ngu dzi kodza.” Khavbo avbo, Jesu a di khuye: “Gikombe nyi selago, mu na selani, ni gubhapatisa nyi na gu hakhago mu na gu hakhani,

⁴⁰aholu, gu khala nyamudye mwendro nyambade gwangu kha si tidwi kheni; iso sa gu lumba vale va dongisedwego.”

⁴¹Na va pwide esi, vale vambe nya likhumi va di sola Jakobe ni Johane.

⁴²Khavbo avbo, Jesu a di va rana a gu va embela, khuye: “Kha nga mu dzitigo gwadi, vafumeli nya mayigo va gu ma fuma khu tshivba, ni dzindruna dzakone dza gu vbweta gu tidwa pwani khidzo dzi rumago.

⁴³Gu nga giregi kharato vbakari gwanu. Aholu, oyu a vbwetago gu khala khongolo vbakari gwanu, a na dzi gire githumi gyanu;

⁴⁴oyu a vbwetago gu khala nya guhegule vbakari gwanu, a na dzi gire khumbi yanu.

⁴⁵ Kholu, Mwamana wa Muthu nuye kha tela guta thumedwa aholu, guta thumela ni gu ningela womi waye gasi gudzegisa va nya gutala.”

⁴⁶Khu hwane, va di hongola dhoropani ga Jeriko, gikhati a nga vbweta guvbindra ni vapizane vaye, gumogo ni gidzemo nya gingi, mwamana wa Timewu nya gupwani khu Bharitimewu, gisiwana nya gikhumu, a di khade bambe nya ndzila na gu lomba zomola,

⁴⁷na pwide gupwani khu Jesu wa Nazareta a vbindrago, a di khusa lito a lomba, khuye: “Jesu, mwamana wa Dhavhidhe, nyi pwele wusiwana.”

⁴⁸Nya vangi va di mu kawuka khavo a degule. Aholu, uye a di engedzela gugulumela, khuye: “Mwamana wa Dhavhidhe, nyi pwele wusiwana!”

⁴⁹Jesu a di ema a ganela, khuye: “Mu raneni.” Khavbo avbo, va di rana gikhumu va gi embela, khavo: “Tiya, khuga u ema, a ngu gu rana.”

⁵⁰Khu vbale, gikhumu gi di rinya hwindzo gifenengelo gyaye gi khuga khu gu ndraga gi hongola ga Jesu.

⁵¹Jesu a di mu wudzisa, khuye: “Wa guvbweta gukhuwe nyi gu girela ginani?” Gikhumu gi di hakha, khigyo: “Muhevbudzi, nya guvbweta gukheni nyi wone!”

⁵²Khavbo avbo, Jesu a di gi embela, khuye: “Indra, gukhodwa gwago gu gu vbanyiside.” Gikhumu gi di dzegela gu tulega maho gi gu landrela Jesu.