Read gitonga Marko 11 Bible Online

Marko 11 - gitonga bible

Marko 11

¹Na va gu vbweta gu vboha Jerusalema, vari vbafuvbi ni Bhetifage ni Bhetaniya, gigomoni nya Miolivha, Jesu a di ruma vapizane vaye vavili, khuye:

²“Indrani mitalalani mule, mu yi wonago, mu naya mana giburwana na gi hungidwe egi gi si gu khiledwigo khu muthu. Gi tshuleni mu nyi resela.

³Mwa gu wudziswa pwani khu ginani mu girago isoso? Indrani khenu khu Pfhumu a gi vbwetago, hi na gi resa gambe khu guvbiredza.”

⁴Khavbo avbo, na va hongode, va diya mana giburwana na gi hungidwe nyangwani, vbafuvbi ni mwanya khu vbavbandze nya libhiyo, va gi tshula.

⁵Avo va nga bani va romo vbale va di khavo: “Ginani mu girago? Mwa gu gi tshulela ginani giburwana gyogyo?”

⁶Avo va di hakha kha nga edzi Jesu a nga va embela khidzo. Va di va diga va hongola nagyo.

⁷Na va vbohide nagyo, va di ladza dzingandzu dzawe vbatshani nya giburwana, Jesu a gu khilela.

⁸Nya vangi va di ladza dzingandzu dzawe ndzilani gasi vambe va di fanya matamo nya misimbo va ladzela ndzilani.

⁹ Ava va nga bani va thangide ni ava va nga bani va tshade khu hwane gwaye, vatshavbo va di kulungela khavo “Hosana; a na rungudzwe oyu atago khu lina la Pfhumu.

¹⁰Wu na rungudzwe wufumu wa babe wathu Dhavhidhe wu vbohago. Hosana vbatshani Ndzadzini!”

¹¹Jesu, na vbohide Jerusalema a di bela Nyumbani ga Nungungulu; na wonide satshavbo si nga bani si romo mule, khu gu wona gukhuye lidambo li hwide, a di hongola Bhetaniya ni vale nya likhumi na vavili.

¹²Khu mindru gakone, na va gu duga khu Bhetaniya, a dipwa ndzala.

¹³Na wonide khu hwindzo ngure na wu tade khu mahagane, a di hidzimela khuye mwendro a na mana dzikhure, aholu a diya mana basi mahagane, kholu khandri a di siri nango nya dzikhure.

¹⁴Khavbo avbo, Jesu a di embela ngure, khuye: “Gu khugela muhuno mwalo a na hodzago gambe mihandro yago.” Vapizane va dipwa magana yaya.

¹⁵Na va vbohide Jerusalema, a di bela Nyumbani ga Nungungulu a phela gu tutumisa varengisi ni varengi, a thesela dzimeza dza va nya wugwewo nya dzitsapawu ni sikhalo sa vale va nga bani va gu rengisa matuva.

¹⁶Kha nga dzumedzisa muthu gu tsemakanya Nyumba ya Nungungulu na rwade gilogyo.

¹⁷ A di va hevbudza, khuye: Kha ga lowa gupwani: “Nyumba yangu yi na ranwa khu mayigo yatshavbo gupwani nyumba nya milombelo, gani? Gasi enu mu yi giride liphala nya dzimbafa.”

¹⁸Vakhongolo nya vaphasi nya mhamba ni vahevbudzi nya Nayo, na va pwide esi, va di vbweta mano nya gu mu songe; aholu va di mu thava kholu vathu vatshavbo va di gu samala sihevbudzo saye.

¹⁹Aholu, na li hwide, va di duga dhoropani.

²⁰Ni dzimindru, na va gu vbindra khu ndzila, va di wona ngure wule na wu bangide ni mikhamba yaye.

²¹Pedro a di dundruga, a mu embela, khuye: “Muhevbudzi, nga wona ngure u nga wu vala, wu bangide.”

²²Jesu a di va hakha, khuye: “Khodwani ga Nungungulu.

²³ Kholu Khu lisine nyi ngu mi embelani gukheni, muthu a gu embela gigomo gegi khuye siguga khavba uya thegela phwani, na si kanakani monyoni gwaye, aholu a khodwa gukhuye esi a ganelago si na girega, khu lisine furi si na girega kharalo.

²⁴Khu magirelo yoyo, nyi ngu mi embelani gukheni satshavbo esi mu lombago umo nya nombelo wanu, khodwani gukhenu mu na si mana.

²⁵Mwa gu vbweta gu gira nombelo wanu, mwa gu bani na mu hoselane, phelani khu gu tsetselela ava va gu ni sihoso gwanu, gasi Babe wanu a guromo Ndzadzini a mi tsetselelani nenu sihoso sanu.

²⁶ [Kholu mwa gumba tsetselelana, Babe wanu nuye a guromo Ndzadzini kha na mi tsetselelani nenu sihoso sanu.”]

²⁷Khavbo avbo, va di bwelela Jerusalema, Jesu a di gu gimbilagimbila Nyumbani ga Nungungulu, va di hidzimela vbafuvbi gwaye vakhongolo nya vaphasi nya mhamba, ni vahevbudzi nya Nayo ni madhota,

²⁸va mu wudzisa, khavo: “Wa gu yi mana hayi tshivba nya gugire esi? Khu mani a nga gu ninga tshivba yoyo?”

²⁹Aholu Jesu a di va hakha, khuye: “Eni neni nyi na ni giwudziso gwanu. Mwa gu nyi hakhani nyi na mi embela neni umo yi dugelago umo tshivba nyi girago khiyo silo sesi.

³⁰Ina gubhapatisa ga Johane gu diri ga Ndzadzini, mwendro gu diri ga vathu? Nyi ningeni phindrulo.”

³¹Va di phela gu ganedzisana khu gyawe, khavo: “Ha gukhethu gu diri ga Ndzadzini, a na khuye khu ginani mu ngamba khodwa khugo?

³²Aholu ha gukhethu gu diri ga vathu, hi na wugedwa khu vathu, kholu vatshavbo va di gu wona Johane kha nga muprofeti nya guvbelele.”

³³Va di hegisa khu gukhavo: “Ahati.” Khavbo avbo, Jesu a di khuye: “Eni neni Kha nyi mi embelini omu nyi yi manago tshivba nya gugire esi.”