Read gitonga Marko 14 Bible Online

Marko 14 - gitonga bible

Marko 14

¹Na gu tshade matshigu mavili gasi gu hodza buzo nya Phasika, ni oyu nya sibaba nyambana mela, vakhongolo nya vaphasi nya mhamba ni vahevbudzi nya Nayo va di vbweta lipindru nya gumole Jesu khu gisihaledza va mu songa.

²Aholu, va di khavo: “Hi nga mu moli vbakari nya buzo hi nga wugedwa khu vathu.”

³Jesu, na romo Bhetaniya, ndrangani ga Simoni, a nga bani a gu ranwa pwani nya sokono. Na khade vbamezatunu, a di vboha nyamayi moyo ni gigasi nya mafura nya gunungele ngudzu, ma nga rengwa khu dzitsapawu nya dzingi. A di gi pandra a guhula mafura hungoni ga Jesu.

⁴Vambe va di sola va ganela khu gyawe, khavo: “Ma gu haganisedwa ginani mafura yale?

⁵Kholu nari pwani ma di rengiswa khu tengo nya guvbindre gipimo nya mazana mararu dzitsapawu nya parata na ma phaside sisiwana. Va di swireka va guhembulula nyamayi wule.”

⁶Aholu, Jesu a di khuye: “Mu digeni, mwa gu mu garadzela ginani? A nyi girede thumo nya wadi.

⁷ Kholu sisiwana mu naso gikhati gyatshavbo. Mu na si phasa mwa gu dzina. Gasi eni, kha nyi na khala nanu kala gupindruga.

⁸Uye giride khavbo a nga kodza khavbo: Hegulede gu todza mafura givili gyangu, gasi gu gi dongisela guya dzingwa.

⁹Khu lisine, nyi ngu mi embelani gukheni: Ni evbini yi na gu hevbudwago Ivhangeli yeyi tigoni gwatshavbo, gu na khumbugwa esi a giridego nyamayi yoyu, gasi a alakanywa khiso.”

¹⁰Khavbo avbo, Judha Sikarioti, moyo nya vale nya likhumi na vavili, adiya ga vakhongolo nya vaphasi nya mhamba, ni vahevbudzi nya Nayo gasi guya ningela Jesu.

¹¹Na va mu pwide, va di tala khu gutsaka, va mu tumbisa dzitsapawu. Gukhugela vbale, uye a di vbweta gikhati nya gyadi nya gu mu ningele khigyo.

¹² Khu litshigu nya guhegule nya Buzo nya Sibaba nyambana mela, a gu litshigu va nga bani va songa nvutana nya Phasika, vapizane va di mu wudzisa, khavo: “Khu hayini u vbwetago gukhuwe hi dongisela avbo Phasika?”

¹³Jesu a di ruma vapizane vavili vaye, khuye: “Indrani dhoropani, mu na khingwa khu mwama na rwade khali nya mati. Mu landreni.

¹⁴Avbo a na gu belago, embelani mune ndranga khenu, Muhevbudzi a ngu wudzisa, khuye: ‘Khu yevbini nyumba nyi na hodzelago umo Phasika ni vapizane vangu?’

¹⁵A na mi yeyedza nyumba nya yikhongolo yi gu ni gitezi, mu na mana meza na yi ladzidwe, dongiselani umo.”

¹⁶Khavbo avbo, vapizane va di hongola dhoropani, vaya mana satshavbo kha nga edzi a nga ganelago khidzo Jesu. Va diya dongisela Phasika.

¹⁷Na li hwide, a di hongola ni vale nya likhumi na vavili.

¹⁸Na vari vbamezatunu, va hodza, Jesu a di khuye: “Khu lisine nyi ngu mi embelani, moyo nya enu nyi hodzago nanu, a na nyi ningela.”

¹⁹Va di phela gu tshaniseka, muthu ni muthu a di wudzisa khu gipandre gyaye, khuye: “Kheni gani, Pfhumu?”

²⁰Aholu a di va hakha, khuye: “Moyo nya enu nya likhumi na vavili, oyu a bagago gumogo ni eni mbiyani.

²¹ Khu lisine, Mwamana va Muthu a gu landra ndzila yaye kha nga edzi gu lovidwego khidzo khu mahungu yaye; aholu libango li na ni wule a na ningelago Mwamana va Muthu. Adiri tshukwana muthu yoyo na sa velegwa.”

²²Na va gu hodza, Jesu a di dzega gibaba a gi kategisa, a gi pila a ningela ga vapizane vaye, khuye: “Dzegani, hodzani, egi khu givili gyangu.”

²³Khavbo avbo, a di dzega gikombe a bonga a va ninga va tshiyelana;

²⁴ a di va embela, khuye: “Owu novba wangu; novba nya gidzumeledzwano nya giphya, wu na vbaladzedwago va nya gutala.

²⁵Khu lisine nyi ngu mi embelani gukheni gima kha nyi na nga sela gambe nanu wadwa nya dziuvha, kala litshigu lile nyi na gu wu selago nyaluphye Mufumoni wa Ndzadzini.”

²⁶Na va embide ndzimo, va di duga va gu hongola Gigomoni nya Miolivha.

²⁷ Jesu a di va embela, khuye: “Enu mwatshavbo wutshigu wa muhuno mu na khunguvanyega, khu eni, kholu gu lovidwe pwani: ‘Nyi na bayisa muhavisi, dzi phalalega dzinvuta.’

²⁸ Aholu, hwane nya gu na nyi wugide, nyi na mi hegudzani gu vboha Galileya.”

²⁹Pedro a di khuye: “Ambari va phalalega vatshavbo, eni gima kha nyi na bwelela hwane nyi gu diga.”

³⁰Jesu a di mu hakha, khuye: “Khu lisine nyi ngu gu embela, wutshigu wa muhuno, u na nyi danga guraru khonge na wu si gu embi guvili.”

³¹Aholu, uye a di engedza gu sambanya a tiyisa, khuye: “Ambari ga gu lomba gufa nago, gima kha nyi na gu danga.” Vatshavbo va di ganela navo kharato.

³²Va di hongola wulanga wu ranwago pwani Getsemani, na va vbohide, Jesu a di embela vapizane vaye, khuye: “Khalani avba nyi ngu hongola nyi ya lombelela.”

³³A di dzega Pedro ni Jakobe ni Johane a gu hongola navo, a phela gupwa rerema ni gu tshaniseka.

³⁴A di va embela, khuye: “Hefemulo wangu wu tade khu gutshaniseka nya gufe. Khalani avba mu nyi bangaladza.”

³⁵Na thangide vbadugwana, a di khidzima a neredza khovbe vbavbatshi, a lomba ga Nungungulu khuye sa gu kodzega a vbuluga ga gikhati gile nya wuvi.

³⁶A di khuye: “Abba, gutshamuselago gupwani Baba! Avbo gwago si ngu kodzega satshavbo, nyi ndreyisele gikombe gegi. Ambari ulo gu nga giregi gugola gwangu, gu na girege gugola gwago.”

³⁷Khavbo avbo, a di bwelela avbo va nga bani varomo Vapostoli, aya va mana na va lade, a gu embela Pedro, khuye: “Simoni, wa gu lala? Khwa dzi kodza gu wona wora mweyo basi.

³⁸Lirelani na mu gu lombelela gasi mu si thegi gusengwani. Hefemulo wu tade khu tshivba, aholu givili gi mwalo tshivba.”

³⁹A di hongola nyaluphye aya lombelela khu magana ya mamowo.

⁴⁰Na wide gambe, a dita va mana na va lade, kholu maho yawe ma di tade khu ligovbe. Negi nya gu mu hakhe va di si giti.

⁴¹Na wide nya wuraru, a dita, khuye: “Olu lalani mu hefemula. Gi vbohide gikhati, Mwamana wa Muthu a na ningedwa mandzani ga sighohi.

⁴²Khugani hi hongole, a ngu vboha oyu a vbwetago gu nyi ningela.”

⁴³Khavbo avbo, Jesu na nga guganela a di vboha Judha, moyo nya vale nya likhumi na vavili, nari ni gidzemo nya gingi nya vathu, na va pharide matshari ni sighomba, va nga rumedwa khu vakhongolo nya vaphasi nya mhamba ni vahevbudzi nya Nayo ni madhota.

⁴⁴Oyu a nga mu ningelago, a di va ningide giyeyedzo, khuye: “Wule nyi na mu bhejarigo, khuye. Mu moleni mu nga mu digi, indrani naye nyamba mu nyesedza.”

⁴⁵Na vbohide, a di hidzimela ga Jesu aya, khuye: “Rabi,” a mu bhejari.

⁴⁶Avo va di dzegela gu mu mola va mu hunga.

⁴⁷Aholu khu vbale, moyo nya ava va nga bani vari ni Jesu, a di homola litshari a gu pila ndzeve ya githumi gya khongolo nya vaphasi nya mhamba.

⁴⁸Jesu a di khusa lito, khuye: “Mu di donga matshari ni sighomba khwatshi mwa guta mola gighevenga.

⁴⁹ Matshigu yatshavbo nyi diri nanu Nyumbani ga Nungungulu nyi gu hevbudza, kha mwa nyi mola. Aholu gu giregide kharato gasi gu tadzisega Milowo.”

⁵⁰Khavbo avbo, vapizane va di mu diga va gu thava vatshavbo.

⁵¹A di landrisedwa khu lidzaha limwedo li nga bani li fenengede lasolo basi. Va di li mola,

⁵²aholu, li di diga lasolo li thava wumbwiri.

⁵³Va di dzega Jesu va gu hongola naye ga khongolo nya vaphasi nya mhamba; avbo va diya tshangana vatshavbo vakhongolo nya vaphasi nya mhamba, madhota ni vahevbudzi nya Nayo.

⁵⁴Pedro a di landra khu hwindzo, kala aya bela ndrangani ga muphasi nya khongolo, aya khala ni dzindruna a gu wora nilo.

⁵⁵Vakhongolo nya vaphasi nya mhamba ni phatha watshavbo va di vbweta gilo nya gu mu singedze gasi va mane gu mu songa, aholu kha va gi mana.

⁵⁶Kholu nya vangi va di ninga wukustumunyu nya malipha aholu, wukustumunyu wawe wu di hambanelana.

⁵⁷Vambe va di khuga va mu singedza malipha, khavo:

⁵⁸ “Hi mu pwide na gu ganela, khuye: ‘Nyi na pfhungumula Nyumba ya Nungungulu yi nga vbahwa khu mandza nya vathu, khu matshigu mararu nyi vbaha yawalo nyamba vbahwa khu mandza nya vathu.’ ”

⁵⁹Ni ga egi gisingedzo, malipha yawe kha ma kotsana.

⁶⁰Khavbo avbo, muphasi nya khongolo a di khuga vbakari nya gidzemo a wudzisa Jesu, khuye: “Ina khu hakhi gilo khu satshavbo sesi va gu ketsarigo khiso, gani?”

⁶¹Aholu, uye a di degula nyamba mu hakha. Muphasi nya khongolo a di wudzisa gambe, khuye: “Ina khuwe Mesiya, Mwamana wa Nungungulu nya Gurungudzwe, gani?”

⁶² Jesu a di khuye: “Kheni. Mu na wona Mwamana wa Muthu na khade nyamudye ga Nungungulu nya Tshivba Yatshavbo, na gu tshiga khu Ndzadzini vbakari nya mapfhi.”

⁶³Khavbo avbo, muphasi nya khongolo a di pferula dzingandzu dzaye na gukhuye: “Wufakazi muni hi nga gu wu vbwetago gambe?

⁶⁴ Kha mwa gipwa givalo nugu-nugu olu? Mwari khenu ginani?” Vatshavbo va di khavo: “A na songwe!”

⁶⁵Khavbo avbo, vambe va di phela gu mu hetshela, va mu fenengedza khovbe khu mwendra; va mu veta khu dzipama, na va gukhavo: “Nga tumba.” Ni dzindruna nidzo dzi di mu veta khu dzipama.

⁶⁶Pedro nari vbavbandze a di tedwa khu nyamahegyane nya githumi gya muphasi nya khongolo.

⁶⁷Nyamahegyane, na wonide Pedro na gu wora nilo, a di mu khedza gwadi khuye: “Uwe nuwe u diri ni Jesu Munazarenu.”

⁶⁸Aholu, uye a di danga, khuye: “Kha nyi muti, ne vbadugwana.” Khavbo avbo, a di khuga aya khala vbamwanyatunu. Gikhati gyogyo wu di emba khonge.

⁶⁹Githumi gile gi di mu wona gambe, gi embela ava va nga bani varomo vbale, khigyo: “Oyu nuye moyo nya avo.”

⁷⁰Aholu, uye a di danga nya wuvili. Khadukhadu, vale va nga bani varomo vbale va di embela Pedro, khavo: “Khu lisine a nuwe u moyo wawe, kholu u Mugalilewu nuwe.”

⁷¹Khavbo avbo, Pedro a di phela gu danga na gu vbenyavbenya, a sambanya, khuye: “Kha nyi muti muthu yoyo mu mu thulago.”

⁷²Khu gikhati gyogyo khonge wu di emba. Khavbo avbo, Pedro a di dundruga magana ya Jesu a nga khuye: “Uwe u na nyi danga guraru khonge na si gu embi guvili,” a di garadzega, a duga na gulila.