Read gitonga Marko 7 Bible Online

Marko 7 - gitonga bible

Marko 7

¹Vafarisi ni vahevbudzi nya gukari nya Nayo, va ngatago khu Jerusalema, va di tshangana naye.

²Va di wona gukhavo vambe vapizane vaye va di gu hodza guhodza khu mandza nya ndzilo nyamba hamba.

³Kholu vafarisi ni Vajudha vatshavbo, khu nayo wawe, kha va hodzi nyamba phela khu gu hamba mandza, khu gulandra giolovedzo nya mikhuwo ya vagale.

⁴Gikhati va wuyago khu wugwewoni, kha va hodzi nyamba phela khu gu dzi agisa, yomo yimbe milayo nya yingi ya gale va yi landrisago, kha nga: Guhandza dzikhokho, dzikhali nya mati, sikalango nya sugu ni malawu.

⁵Vafarisi ni vahevbudzi nya Nayo va di mu wudzisa, khavo: “Khu ginani vapizane vago va si landrisigo tumbunugo wa vagale, olu va hodzago nyamba hamba mandza?”

⁶Jesu a di va hakha, khuye: “Khidzo muprofeti Isaya a nga ganelago na gu thula enu vapfhadzi nenu, khuye: ‘Ava vathu va gu nyi rungudza khu magana aholu myonyo yawe yomo hwindzo ni eni.

⁷ Milombelo va nyi girelago khya malipha kholu, milayo va hevbudzago khya gu yi khugela.’

⁸Mwa gu diga milayo ya Nungungulu mu gu landrisa tumbunugo nya vathu.”

⁹A di engedza gambe, khuye: “Mu ngu kodza gwadi gu tshiphisa milayo ya Nungungulu, gasi mufela gu landrisa tumbunugo wanu.

¹⁰ Kholu, Mosi a di khuye: ‘Rungudza babe wago ni mayi wago.’ Bwelo khavbo, khuye: ‘Uye a hembululago babe, gani mayi waye, tsayiso waye khu gufa!’

¹¹Gasi enu mwa gu hevbudza gukhenu: ‘Muthu a gu embela babe ni mayi waye, khuye: Kha nyi kodzi gu gu phasa khu esi nyi gu naso kholu khya Korobani, gu tshamusago pwani si phasedwe ga Nungungulu’;

¹²enu kha mu mu dzumedzisi gu gira simbe silo nya guphase babe ni mayi waye.

¹³Khu kharato, mu ngu tshipisa Nayo wa Nungungulu khu kotani nya mikhuwo ya vababe vanu mu yi hevbudzago. Mu ngu girani gambe simbe silo nya singi nya gufanane ni esi.”

¹⁴A di rana nyaluphye gidzemo, a gi embela, khuye: “Nyi yingiseni mwatshavbo gasi mu si mane gwadi esi nyi vbwetago gu mi embela!

¹⁵Muthu kha nyenyeziswi khu silo sa vbavbandze si belago ndrani gwaye, aholu a gu nyenyeziswa khu esi si dugago khu ndrani gwaye.

¹⁶[Oyu a gu ni ndzeve nya guyingise a napwe.”]

¹⁷Na digile gidzemo a gu bela nyumbani, vapizane vaye va di mu wudzisa tshamuselo nya gipimaniso gile.

¹⁸A di va hakha, khuye: “Gasi enu nenu mu lemede mihungo? Ina kha mu dziti nya gukhenu egi gi belago ndrani nya muthu kha gi dzi kodzi gu mu nyenyezisa,

¹⁹kholu kha gi beli monyoni, gya gu bela girumbuni gi gu duga vbavbandze khu ndzila yaye, gani?” (Khu magana yaya a gu hevbudza gukhuye guhodza gwatshavbo gu agide gu ngu yela gu hodzwa.)

²⁰A di engedza gambe, khuye: “Igyo gi dugago khu ndrani nya muthu khigyo gi mu nyenyezisago.

²¹Kholu, khu monyoni nya muthu, khumo gu dugago mahingigedzo nya guvivbe, wubhayi, wuvafa, wughevenga, wuphuphulu,

²²gumba khodwa, lidiwo, milembo, matshandza ni wupumbu.

²³Guvivba gogu gwatshavbo gwa gu duga khu ndrani, khugo gu nyenyezisago muthu.”

²⁴Na khugide khu vbale, Jesu a di hongola tigoni ga Tiro ni Sidhoni. Na bede ndrangani nya gukari, kha nga vbweta gu tidwa khu muthu, aholu kha nga kodza gu sihala;

²⁵nyamayi moyo, nyamahegyane waye a nga bani a gu saniswa khu liphuvbo nya guvivbe, na pwide gu ganedwa khu mahungu yaye, a dita dzi thesa migondroni gwaye.

²⁶Nyamayi yoyu a diri wa nya mayigo, kholu a diri Musiro-fenisiya, a di mu lomba khuye a tutumise liphuvbo nya guvivbe ga mwanaye.

²⁷Aholu uye a di khuye: “Nga diga si khure sanana guphela, kholu khandri gwadi gu dzega guhodza nya sanana u rinyela simbwana.”

²⁸Aholu nyamayi a di khuye: “Khidzo u ganelago, Pfhumu, aholu dziti nya gukhuwe simbwana niso si ngu roledzela khu vbavbatshi nya meza dzitsheta dzi theswago khu sanana.”

²⁹Jesu a di mu embela, khuye: “Khu kotani nya isoso u ganedego, indra basi; liphuvbo nya guvivbe li dugide ga mwanago.”

³⁰A di hongola gaya aya mana mwanaye na lade vbadawutunu; liphuvbo nya guvivbe na li mu digide li gu hongola.

³¹A di khuga nyaluphye khu tigoni ga Tiro a vbindra khu Sidhoni, a gu hongola phwani ga Galileya a tsemakanya khu tigoni ga Dhekapoli.

³²Va di mu resela muthu nya givbwiri nyamba ganela gwadi, va mu lomba gu mu handzega mandza.

³³Na ndreyide naye mwandrani nya vathu, a di bedza dzinyala dzindzeveni gwaye, a hetsha dzindrura a mu todza khidzo lidimi.

³⁴Khavbo avbo, a di khusa maho, a khedza a hefemula khu tshivba, a mu embela, khuye: “Efata” gutshamusago pwani, “Tulega.”

³⁵Dzindzeve dzaye dzi di tulega, lidimi li gu tshulega, a gu ganela gwadi nyamba khukhumela.

³⁶Khu gu vbiredza Jesu a di va laya gumba embela muthu, aholu avo va di simama gu laledza ndruma yaye.

³⁷Vatshavbo va di liwuga ngudzu va gu ganela, khavo: “Satshavbo a ngu gira gwadi: A ngu tula dzindzeve sivbwiri, ni gu tulela gu ganela sidudu.”