Read gitonga Luka 13 Bible Online

Luka 13 - gitonga bible

Luka 13

¹Khu gikhati gyogyo, va di vboha vathu nya gukari va ngata tivisa Jesu, khu mahungu ya Pilato a nga rumela gu songa Vagalileya a nga va manago na va gu paya sirengo nya miphaso, wu patwa kharato novba wawe nuwo nya sirengo nya mhamba.

²Jesu a di va hakha, khuye: “Mwa gu hingigedza gukhenu Vagalileya vovo sighohi sikhongolo guvbindra vambe Vagalileya, gani?

³Nyi ngu mi embelani, kheni: Khandridzo. Aholu mwa gumba vbindrugedza mavbanyelo mu na fisani nenu guralo.

⁴Ina mwa gu hingigedza nya gukhenu vale nya likhumi na livbandre na vararu va nga thegedwago khu langwe ya Silowe, va gufa, khavo vakone va nga bani vari ni nandru guvbindra vathu vatshavbo va Jerusalema, gani?

⁵Nyi ngu mi embelani, kheni: Khandridzo. Aholu mwa gumba vbindrugedza mavbanyelo yanu mu na fisa nenu guralo.”

⁶A di va embela gambe gipimaniso gegi: “Muthu moyo a diri ni nguyu a nga yalago thembweni gwaye. Adiya khedza khuye mwendro a naya mana maguyu, aholu kha ya mana gilo.

⁷Khavbo avbo, a di embela musayisi nya lithembwe, khuye: ‘Myaga miraru khoyu na nyita vbweta maguyu omu, kha nyi ma mani. Wu koke, kholu wa gu gundrela wulime mahala.’

⁸Aholu musayisi a di khuye: ‘Pfhumu, wu dige mwaga yoyu, gasi eni nyi na wu limela, nyi wu thedzela mati ni gitoromu.

⁹Wa gu velega mwakani, u na wu diga wu vbanya; wa gumba velega u na wu koka.’ ”

¹⁰Jesu a di bani a gu hevbudza khu litshigu nya Sabhadho nyumbani nya nombelo.

¹¹Avbovbo a di romo nyamayi moyo a nga bani ari ni liphuvbo nya guvivbe, li nga bani li gu mu sanisa gipimo nya likhumi na livbandre na miraru myaga: A di gimbila na nogide, a si dzi kodzi gu ololoka.

¹²Jesu, na mu wone, a di mu rana, a gu mu embela, khuye: “Nyamayi, hawuluga wudwali wago.”

¹³A di mu handzega mandza. Khavbo avbo, nyamayi a di dzegela gu ololoka, a phela gu rungudza Nungungulu.

¹⁴Aholu muthangeli nya nyumba nya nombelo, na wonide khuye Jesu hawulugiside muthu khu Sabhadho, a di goroga, a gu embela gidzemo, khuye: “Mu na ni livbandre na limwedo matshigu vbakari nya semana gasi gu girani mithumo yanu. Deluni khu matshigu yoyo gasi guta hawulugiswani, nasiri khu Sabhadho.”

¹⁵Pfhumu a di mu hakha, khuye: “Vanyamaliphanu! Ina kha mu ngu tula liphandro mu dusa dzimombe mwendro dziburu dzanu gasi guya dzi sedza mati khu litshigu nya Sabhadho, gani?

¹⁶Ina nyamayi yoyu, a gu gyanana gya Abrahama, a nga bani a gu saniswa khu Sathane gipimo nya likhumi na livbandre na miraru myaga, mwalo fanelo nya guvbanyiswe khu litshigu nya Sabhadho, gani?”

¹⁷Na ganede esi, valala vaye vatshavbo va di tala khu dzitshoni; gasi gidzemo gi di nengela khu mithumo yatshavbo nya gululame a nga bani a gu gira.

¹⁸Khavbo avbo, Jesu a di khuye: “Wu ngu fanana ni ginani Mufumo wa Nungungulu? Nyi na wu pimanisa ni ginani?

¹⁹Wu ngu fanana ni mbewu nya ginapi, yi nga dzegwago khu muthu a yala thembweni gwaye. Na yi dandride, yi ngu khala simbo, sinyoni sita vbaha sihaga sawe matamoni gwaye.”

²⁰A di ganela gambe, khuye: “Nyi na wu pimanisa ni ginani Mufumo wa Nungungulu?

²¹Wu ngu fanana ni mela wu nga dzegwago khu nyamayi moyo a wu pfanga ni ndrengo tharu nya wuguvbi, kala wu gugumugisa wuguvbi watshavbo.”

²²Guhongola gwaye Jerusalema, a di gimbila khu madhoropa ni mitalala, a gu hevbudza.

²³A di wudziswa, pwani: “Pfhumu, vadugwana avo va na vbanyiswago, gani?”

²⁴Uye a di va hakha, khuye: “Zamani gu bela khu mwanya yoyu nya wudugwana, kholu, nyi ngu mi embelani gukheni nya vangi va na zama gu bela khavbo, aholu kha va na dzi kodza.

²⁵A gu kala mune ndranga a khuga a sega lidimba, mu na khalani vbavbandze, mu khokhotha lidimba, na mu gukhenu: ‘Hi tulele, pfhumu!’ Aholu uye a na mi hakhani, khuye: ‘Kha nyi mi tini; mwa guta khu hayi?’

²⁶Khavbo avbo, mu na phela gu ganela, khenu: ‘Hi hodzide ni gu sela nago, gambe uwe u hevbudzide mitendrelani gwathu.’

²⁷ Uye a na mi hakhani, khuye: ‘Gale na nyi mi embedeni gukheni kha nyi mi tini umo mu tago khumo. Leyani mahoni gwangu, enu mwatshavbo mu girago guvivba.’

²⁸Gikhati mu na wonago Abrahama, Isaki, Jakobe ni vaprofeti vatshavbo Mufumoni wa Ndzadzini, enu mu gu tshidwe vbavbandze, avbovbo gu na manega gulila ni guketsa nya magwaha.

²⁹ Va nata va Khugadambo ni va Muhwadambo, va Wuronga ni Marandzi va ta khala vbamezatunu nya Mufumo wa Nungungulu.

³⁰ Wonani gukhenu va nya guhegisela va na bani vari va guphela khavo; navo va nya guphela va na bani vari mahegisela.”

³¹Gikhati gyogyo, va di vboha Vafarisi va ngata mu embela, khavo: “Khuga avba, kholu Herodhi a gu vbweta gu gu songa.”

³²Jesu a di va hakha, khuye: “Indrani muya embela ngeheyo, khenu: Muhuno ni mindru nyi nga gu tutumisa maphuvbo nya guvivbe ni gu hawulugisa vadwali; khu litshigu nya wuraru nyi na vbedzisa.”

³³Gasi muhuno, mindru ni libwagewo, gu vbwetega eni nyi landre ndzila yangu, kholu kha gu kodzegi gu muprofeti a songedwe vbavbandze ga Jerusalema.

³⁴“Jerusalema, Jerusalema, u songago vaprofeti ni gu pfara khu siwindri vale u rumedwago khu Nungungulu! Dzinyondro dzingani eni nyi dogoredego gu tshanganisa sanana sago, kha nga khugu yi fundramelago sitshondryana saye, uwe u bomba!”

³⁵ Olu ndranga yanu yi na khala marumbi. Khu lisine nyi ngu mi embelani gukheni: Kha mu na nyi wona gambe, kala li vboha litshigu mu no, khenu: A na rungudzwe uye atago khu lina la Pfhumu!